អាជ្ញាធរវៀតណាម បានដោះលែងអ្នកសរសេរប្លុករិះគន់រដ្ឋាភិបាលរបស់ខ្លួនម្នាក់ ក្រោយពេលដែលរដ្ឋមន្រ្តីក្រសួងការពារជាតិអាមេរិកទៅបំពេញទស្សនកិច្ចនៅក្នុងប្រទេសនេះ។
តាមសេចក្តីប្រកាសព័ត៌មានរបស់់អង្គការលើកលែងទោសអន្តរជាតិ អ្នកស្រី ង្វៀនង៉ុក ញូឃ្វីញ ត្រូវបានអាជ្ញាធរវៀតណាមដោះលែងកាលពីថ្ងៃម្សិលមិញ។ នាយកអង្គការលើកលែង ទោសអន្តរជាតិប្រចាំតំបន់អាស៊ី លោក នីកូឡាស បេកេលីន បានលើកឡើងក្នុងសេចក្តីប្រកាសព័ត៌មាននោះថា អ្នកសរសេរប្លុករិះគន់រដ្ឋាភិបាលវៀតណាម អ្នកស្រី ង្វៀន ង៉ុក ញូឃ្វីញ ត្រូវបានដោះលែងដោយភ្ជាប់ជាមួយនឹងលក្ខខណ្ឌដែលតម្រូវឲ្យអ្នកស្រីត្រូវនិរទេសខ្លួនទៅរស់នៅបរទេស។
យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ការដោះលែងអ្នកស្រីធ្វើឡើងតែមួយថ្ងៃប៉ុណ្ណោះបន្ទាប់ពីរដ្ឋមន្រ្តីក្រសួងការពារអាមេរិកលោក ជីម ម៉ាទីស បានបំពេញទស្សនកិច្ចនៅវៀតណាមកាលពីថ្ងៃអង្គារកន្លងទៅ។ ប៉ុន្តែបើតាមព័ត៌មានរ៉យទ័រ គេមិនអាចសន្និដ្ឋានបានថាការដោះលែងអ្នកស្រី ង្វៀនង៉ុក ញូឃ្វីញ ជាប់ទាក់ទងនឹងដំណើរទស្សនកិច្ចរបស់លោក ជីម ម៉ាទីស ឬយ៉ាងណានោះទេ។ តាមប្រភពខាងលើ អ្នកស្រី ង្វៀនង៉ុក ញូឃ្វីញ រួមទាំងម្ដាយនិងកូនទាំងពីររបស់អ្នកស្រី បាននាំគ្នាចាកចេញទៅរស់នៅសហរដ្ឋអាមេរិកកាលពីម្សិលមិញនេះ។
អ្នកស្រី ង្វៀនង៉ុក ញូឃ្វីញ ត្រូវបានអាជ្ញាធរវៀតណាមចាប់ខ្លួនកាលពីខែតុលា ឆ្នាំ២០១៦ ហើយត្រូវបានកាត់ទោសឲ្យជាប់ពន្ធនាគាររយៈពេល១០ឆ្នាំក្រោមបទធ្វើការឃោសនាប្រឆាំងរដ្ឋាភិបាលកុម្មុយនីស្តវៀតណាម។ អ្នកស្រី ជាអ្នកសរសេរប្លុក ឬហៅអាចហៅម្យ៉ាងទៀតបានថាជាអ្នកសរសេរអត្ថបទដែលចែកចាយលើបណ្ដាញអិនធឺណិត។ អត្ថបទដែលអ្នកស្រីសរសេរភាគច្រើន ជាអត្ថបទដែលរិះគន់រដ្ឋាភិបាលកុម្មុយនីស្តវៀតណាមពីបញ្ហាសិទ្ធិមនុស្ស និងការបំពុលបរិស្ថានដែលបង្កឡើងដោយឧស្សាហកម្មធំៗ។
តាមការចុះផ្សាយរបស់សារព័ត៌មានវៀមណាមញូវ ក្នុងឆ្នាំ២០១៧ ប្រជាជនវៀតណាមប្រមាណ៥៤ភាគរយឬស្នើនឹង៥០លាននាក់ មានអិនធឺណិតប្រើប្រាស់។
តាមសេចក្តីប្រកាសព័ត៌មានរបស់់អង្គការលើកលែងទោសអន្តរជាតិ អ្នកស្រី ង្វៀនង៉ុក ញូឃ្វីញ ក៏ជាសហស្ថាបនិកបណ្ដាញអ្នកសរសេរប្លុកឯករាជ្យវៀតណាមដែលបង្កើតឡើងនៅឆ្នាំ២០១៣ផងដែរ។ អ្នកស្រី ក៏ជាអ្នកតស៊ូមតិក្នុងការលើកកម្ពស់សិទ្ធិនិងយុត្តិធម៌ក្នុងសង្គមវៀតណាមអស់រយៈពេលជាង១០ឆ្នាំមកហើយ។ ក្នុងរយៈពេលជាង១០ឆ្នាំមកនេះ អ្នកស្រីត្រូវបានអាជ្ញាធរកុម្មុយនីស្តវៀតណាម ហៅទៅសួរចម្លើយ និងចាប់ខ្លួនជាច្រើនលើកច្រើនសារ ហើយអ្នកស្រី ក៏ត្រូវបានហាមមិនឲ្យធ្វើដំណើរចេញទៅក្រៅប្រទេសផងដែរក្នុងអំឡុងពេលនោះ។
បើតាមអង្គការលើកលែងទោសអន្តរជាតិ ជនជាតិវៀតណាមជាង១០០នាក់ផ្សេងទៀត នៅតែបន្តជាប់ឃុំដោយសារតែពួកគេបានសរសេពាក្យជាការរិះគន់នៅលើរដ្ឋាភិបាលភិបាលវៀតណាមនៅលើប្លុក ឬ ក៏លើបណ្ដាញសង្គមហ្វេសប៊ុករបស់គេ។
កាលពីថ្ងៃទី១២ខែមិថុនា ឆ្នាំ២០១៨ ប្រទេសវៀតណាម បានអនុម័តច្បាប់ស្តីពីសុវត្ថិភាពតាមអិនធឺណិត ដែលបង្កក្តីបារម្ភដល់អ្នកដែលរិះគន់រដ្ឋាភិបាលប្រទេសនេះ ដោយថាអាជ្ញាធរនឹងយកច្បាប់នេះមករឹតបណ្ដឹងលើការប្រើប្រាស់សិទ្ធិបញ្ចេញមតិរបស់ពួកគេថែមទៀត។ ច្បាប់នេះ នឹងចូលជាធរមាននៅថ្ងៃទី១ខែមករា ឆ្នាំ២០១៩។ យោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ ច្បាប់នេះតម្រូវឲ្យក្រុមហ៊ុនអិនធីណិតនិងបណ្ដាញសង្គមធំៗដូចជា Facebook និង Google ជាដើមត្រូវរក្សាទុកទិន្នន័យផ្ទាល់ខ្លួនរបស់អ្នកប្រើប្រាស់និងត្រូវបើកការិយាល័យនៅប្រទេសវៀតណាម៕