សាលាដំបូងខេត្តក្រចេះ បានចេញដីការបង្គាប់ឲ្យឃុំខ្លួនអ្នកបិតស្រាម្នាក់ពីបទមនុស្សឃាតកម្មដោយអចេតនា។
យោងតាមដីការបង្គាប់ឲ្យឃុំខ្លួនរបស់សាលាដំបូងខេត្តក្រចេះ ចៅក្រមស៊ើបសួរ អេង ចំនាប់ បានបញ្ជាឲ្យភ្នាក់ងារមានសមត្ថកិច្ចនៃកំលាំងសាធារណៈធ្វើការនាំខ្លួនជនត្រូវចោទឈ្មោះ កុច សុខហេង ទៅពន្ធនាគារខេត្តក្រចេះ ក្រោមបទមនុស្សឃាតដោយអចេតនា តាមមាត្រា២០៧នៃក្រមព្រហ្មទណ្ឌ។ តាមប្រភពដដែល ជនត្រូវចោទរូបនេះមានមុខរបរបិទស្រា ហើយត្រូវបានសមត្ថកិច្ចខេត្តក្រចេះឃាត់ខ្លួនកាលពីថ្ងៃទី១៨ ខែតុលា ឆ្នាំ២០១៨។
មាត្រា២០៧ នៃក្រមព្រហ្មទណ្ឌចែងថា មនុស្សឃាតដោយអចេតនា គឺជាអំពើបណ្តាលឲ្យអ្នកដទៃស្លាប់ ដោយការធ្វេសប្រហែស មិនមានការប្រុងប្រយ័ត្ន។ បទល្មើសនេះត្រូវផ្តន្ទាទោសដាក់ពន្ធនាគារពី១ឆ្នាំទៅ៣ឆ្នាំ និងពិន័យជាប្រាក់ពី២លានរៀលទៅ៦លានរៀល។
រហូតមកដល់រសៀលថ្ងៃទី២២ ខែតុលា ឆ្នាំ២០១៨ននេះ VOD មិនអាចសុំការបំភ្លឺពីគ្រួសារអ្នកបិទស្រា«ស»នោះបានទេ។
នាយករងរដ្ឋបាលខេត្តក្រចេះ លោក អឹុម ពិសី បានប្រាប់VODថា គិតត្រឹមថ្ងៃទី២២ ខែតុលានេះ ប្រជាពលរដ្ឋមកពីឃុំចំនួន៤ គឺឃុំបឹងចារ ឃុំសំបូរ ឃុំក្បាលដំរី និងឃុំកោះខ្ញែ ស្ថិតនៅស្រុកសំបូរ ខេត្តក្រចេះ បានពុលស្រា«ស»ស្លាប់ចំនួន៥នាក់ និង៨៩នាក់ចាកចេញពីមន្ទីរពេទ្យខេត្តត្រឡប់ទៅផ្ទះវិញអស់កាលពីម្សិលមិញ។
នៅពេលសួរថា តើស្ថាប័នណាជាអ្នកទទួលខុសត្រូវលើករណីនេះ? លោក ពិសី អះអាងថា តាមច្បាប់ក្រសួងឧស្សាហកម្ម និងសិប្បកម្មជាអ្នកទទួលខុសត្រូវលើបញ្ហានេះ។
អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ំ សុផា មានប្រសាសន៍ថា ករណីពុលស្រា«ស»ស្លាប់នេះមិនមែនទើបតែកើតឡើងនៅក្នុងខេត្តក្រចេះតែមួយទេ ពោលមានច្រើនកន្លែងផ្សេងគ្នា។ ប៉ុន្តែលោកថា កន្លងមកក្រសួងមានផ្ទេរការគ្រប់គ្រងទីតាំងផលិតស្រា«ស»តូចតាចទៅឲ្យស្រុក និងក្រុងជាអ្នកគ្រប់គ្រងវិញ។
មន្ត្រីក្រសួងឧស្សាហកម្ម និងសិប្បកម្មរូបនោះ អះអាងថា បើក្រសួងរកឃើញថា មន្ត្រីរបស់ខ្លួនបើកដៃ ឬឃុបឃិតជាមួយម្ចាស់សិប្បកម្មឲ្យផលិតស្រា«ស»ខុសបច្ចេកទេស នឹងត្រូវប្រឈមចំពោះមុខច្បាប់។
លោកមានប្រសាសន៍ថា៖«បើយើងឃើញថាកំហុសគាត់ គាត់មានការបណ្តែតបណ្តោយ ខ្លួនគាត់ស៊ុំក្រលំអីបានយើងដាក់ទណ្ឌកម្ម តែបើសិនជាគាត់ណែនាំគេហើយ ឲ្យគេផ្តិតមេដៃទទួលខុសត្រូវហើយ គេនៅតែលួចធ្វើទៀត រឿងបុគ្គលអ្នកដែលធ្វើនោះទេ»។
នាយកប្រតិបត្តិនៃអង្គការចលនា ដើម្បីសុខភាពកម្ពុជា លោក មុំ គង់ មានប្រសាសន៍ថា ដើម្បីកុំឲ្យមន្ត្រីរដ្ឋាភិបាលរុញបញ្ហាឲ្យគ្នាទៅវិញទៅមក មានតែដំណោះស្រាយតែមួយគត់ គឺរដ្ឋាភិបាលបង្កើតច្បាប់ស្តីពីការគ្រប់គ្រងគ្រឿងស្រវឹង ទើបជួយកាត់បន្ថយផលប៉ះពាល់សុខភាពប្រជាពលរដ្ឋបាន។
លោកមានប្រសាសន៍ថា«យើងត្រូវការច្បាប់ជាបន្ទាន់ ដែលច្បាប់ចែងថាតើ់ការផលិតយ៉ាងម៉េច ការលក់ត្រូវយ៉ាងម៉េច ការផ្សាយពាណិជ្ជកម្មយ៉ាងម៉េច ការប្រើប្រាស់យ៉ាងម៉េច ហើយអ្នកណា អ្នកទទួលខុសត្រូវ នៅពេលយើងមានចែងច្បាស់ ខ្ញុំគិតថា វាងាយស្រួលក្នុងការអនុវត្តផង»។
ទាក់ទងនឹងបញ្ហានេះដែរ លោកនាយករដ្ឋមន្ត្រី ហ៊ុន សែន កាលពីឆ្នាំ២០១៥ ធ្លាប់បានអំពាវនាវឲ្យប្រជាពលរដ្ឋបង្កើនការប្រុងប្រយ័ត្នចំពោះអ្វីដែលពួកគាត់ទទួលទាន ជាពិសេសស្រា«ស» បន្ទាប់ពីពលរដ្ឋជិត២០នាក់នៅខេត្តក្រចេះបានស្លាប់ជាបន្តបន្ទាប់ ដោយសារការពុលមេតាណុលដែលដាក់លាយក្នុងស្រាសនេះផងដែរ៕
