កាលពីថ្ងៃទី១៧ ខែតុលា ឆ្នាំ២០១៨ គណៈកម្មការអឺរ៉ុប(EU)បានសម្រេចអនុម័តដាក់បញ្ចូលវៀតណាមឲ្យស្ថិតនៅក្នុងតំបន់ពាណិជ្ជកម្មសេរី (FTA=Free Trade Areas) ដែលអាចលុបបំបាត់ពន្ធរហូតដល់៩៩ភាគរយ លើប្រភេទមុខទំនិញដែលវៀតណាមនាំទៅលក់នៅអឺរ៉ុប។
មានសំនួរជាច្រើនចោទឡើងទៅលើទំនាក់ទំនងរវាងអឺរ៉ុប និងវៀតណាមនៅក្នុងដំណាក់កាលចុងក្រោយនេះ ថា ហេតុអ្វីបានជាវៀតណាមជាប្រទេសកុម្មុយនីស្តបែរជាទទួលបានប្រព័ន្ធអនុគ្រោះពន្ធពីសហភាពអឺរ៉ុប ជាបណ្តុំនៃប្រទេសកាន់របបសេរី ផ្តោតលើការគោរពសិទ្ធិមនុសុ្ស?
ឥរិយាបថការទូត
ប្រទេសកុម្មុយនីស្តមួយនេះ ហាក់រក្សាភាពទន់ភ្លន់មិនចោលរបបកុម្មុយនីស្ត ប៉ុន្តែស្រវាឱបប្រទេសសេរី ដើម្បីផលប្រយោជន៍នយោបាយ និងសេដ្ឋកិច្ច។
ភាពទន់ភ្លន់របស់វៀតណាមមិនមែនធ្វើឡើងតែចំពោះអឺរ៉ុបទេ គឺអាមេរិក ជប៉ុន និងបណ្តាប្រទេសលោកសេរីផ្សេងទៀត វៀតណាមមិនបានបង្កភាពតានតឹងជាមួយប្រទេសណាទេ។
បើទោះជាវៀតណាមជាប្រទេសកុម្មុយនីស្តមិនផ្តល់សិទ្ធិសេរីភាពដល់ពលរដ្ឋជ្រើសរើសមេដឹកនាំ និងមានការបង្ក្រាបលើអ្នកទាមទារសិទ្ធិសេរីភាព ក៏ប្រទេសនេះនៅតែរក្សាភាពស្ងប់ស្ងាត់និងហាក់បង្ហាញភាពសុភាពរាបសាពេលដែលប្រទេសលោកសេរីជំរុញឲ្យមានការគោរពសិទ្ធិមនុស្ស។
វៀតណាមក៏ធ្លាប់សន្យាធ្វើឲ្យប្រសើរឡើងនូវការគោរពសិទ្ធិសេរីភាព និងធ្លាប់ដោះលែងអ្នកតស៊ូមតិ ឬ អ្នកទោសមនសិការ តាមការទាមទាររបស់លោកសេរីដែរ។
ភូមិសាស្ត្រ
វៀតណាមអាចថា ជាប្រទេសកុម្មុយនីស្តតូច កំពុងរងការគំរាមកំហែងពីប្រទេសកុម្មុយនីស្តធំគឺចិន។ វៀតណាមតែងតែប្រកាសលើឆាកអន្តរជាតិថា ខ្លួនកំពុងតែរងគ្រោះពីការឈ្លានពានបូរណភាពទឹកដីពីសំណាក់ប្រទេសចិន។ បញ្ហានេះធ្វើឲ្យពលរដ្ឋវៀតណាមផ្ទុះការតវ៉ាម្តងហើយម្តងទៀតប្រឆាំងចិន។ កាលពីខែឧសភាឆ្នាំ២០១៤ បាតុកម្មធំផ្ទុះឡើងបណ្តេញចិនរាប់ម៉ឺននាក់ចេញពីភាគខាងត្បូងវៀតណាម ករណីជម្លោះដែនសមុទ្រ ចំណែកការតវ៉ាទូទាំងប្រទេសកាលពីខែមិថុនាឆ្នាំ២០១៨ ប្រឆាំងរដ្ឋាភិបាលផ្តល់ដីសម្បទានឲ្យចិន។ ព្រឹត្តិការណ៍តវ៉ាធំៗទាំងពីរសុទ្ធតែមានអ្នកស្លាប់ រងរបួស និងការចាប់ខ្លួន។ ទាំងនេះបង្ហាញថា ក្នុងកែវភ្នែករបស់វៀតណាម ចាត់ទុកចិនជាសត្រូវដែលគ្រោះថ្នាក់បំផុតសម្រាប់ប្រទេស ដូច្នេះត្រូវរកប្រទេសេរីឲ្យជួយ។
ចំណែកប្រទេសសេរីផ្សេងៗទៀត ក៏ត្រូវជ្រើសរើសយកវៀតណាម ដើម្បីពង្រឹងឥទ្ធិពលក្នុងតំបន់ និងបន្ថយឥទ្ធិពលចិនដែរ។
កាលពីខែមិថុនា ឆ្នាំ២០១៦ រដ្ឋាភិបាលអាមេរិកក្រោមការដឹកនាំរបស់លោក បារ៉ាក់ អូបាម៉ា បានសម្រេចដកទណ្ឌកម្មអាវុធពីវៀតណាម និងបានសរសើរពីទំនាក់ទំនងល្អរវាងប្រទេសទាំងពីរ។
កម្លាំងសេដ្ឋកិច្ច
ក្នុងសេចក្តីប្រកាសកាលពីថ្ងៃទី១៧ ខែតុលា អឺរ៉ុបក្រៅពីដាក់លក្ខខណ្ឌមួយចំនួន ក៏បានលើកឡើងពីឱកាសនៃការសហការជាមួយវៀតណាមដែរគឺលោកស្រី Cecilia Malmstrom ស្នងការសេដ្ឋកិច្ចអឺរ៉ុប បានលើកឡើងថា វៀតណាមជាទីផ្សារមួយមានអ្នកប្រើប្រាស់ជាង៩៥លាននាក់ និងកម្លាំងពលកម្មខ្លាំងក្លា។
វៀតណាមជាប្រទេសធំលំដាប់ទី២ក្នុងទំនាក់ទំនងពាណិជ្ជកម្មជាមួយអឺរ៉ុបបន្ទាប់ពីសិង្ហបុរី គឺពាណិជ្ជកម្មវៀតណាម-អឺរ៉ុប ក្នុង១ឆ្នាំលើតម្លៃទំនិញ៤៧,៦ ប៊ីលានអឺរ៉ូ ស្មើនឹងជាង៥៤ប៊ីលានដុល្លារ និងលើសេវាកម្ម៣,៦ប៊ីលានអឺរ៉ូ ស្មើនឹងជាង៤ប៊ីលានដុល្លារ។
ប្រធានគណៈកម្មការអឺរ៉ុបលោកJean-Claude Juncker ថ្លែងថា ទំនាក់ទំនងពាណិជ្ជកម្មអឺរ៉ុប និងវៀតណាមរីកចម្រើនលើសការរំពឹងទុកក្នុងមួយរយៈកាលចុងក្រោយ។
អត្ថទាក់ទង៖