របាយការណ៍របស់សមត្ថកិច្ចបង្ហាញនៅប៉ុន្មានថ្ងៃចុងក្រោយនេះ លើករណីរំលោភសម្លាប់ និងរំលោភលក្ខណៈធ្ងន់ធ្ងរកើតមានបន្តបន្ទាប់ដែលបានធ្វើឲ្យស្ថាប័នពាក់ព័ន្ធសម្តែងការព្រួយបារម្ភនិងថ្កោលទោស។
ហេតុការណ៍ដែលធ្វើឲ្យសាធារណជនថ្កោលទោសខ្លាំងក្លានោះគឹករណីរំលោភនិងសម្លាប់លើក្មេងស្រីជាបងប្អូនបង្កើតពីរនាក់កាលពីថ្ងៃទី១៧ខែតុលានៅស្រុកបរិបូរណ៍ខេត្តកំពង់ឆ្នាំងគឺម្នាក់អាយុ១៤ឆ្នាំ និងម្នាក់ទៀតអាយុ៧ឆ្នាំ។ អ្នកប្រើប្រាស់បណ្តាញសង្គមមួយចំនួនទាមទារឲ្យ បង្កើតច្បាប់ប្រហារជីវិតលើជននោះទៀតផង។
នៅថ្ងៃទី១៧ខែតុលានៅក្នុងក្រុងព្រះវិហារ មានករណីបុរសអាយុ៣៦ឆ្នាំរំលោភ លើកុមារី អាយុ៧ឆ្នាំម្នាក់ និង៨ឆ្នាំម្នាក់។ នៅរតនគិរីកាលពីថ្ងៃទី១៩ ឪពុករំលោភកូនស្រីអាយុ១៧ឆ្នាំ និងនៅពោធិ៍សាត់ កាលពីថ្ងៃទី១៣មានករណីបុរសអាយុ៤៧ឆ្នាំរំលោភកុមារអាយុ៩ឆ្នាំ។ករណីទាំងនេះកើតឡើងក្នុងចន្លោះពេល៦ថ្ងៃពីថ្ងៃទី១៣ដល់១៩ខែតុលាជាករណីដែលសមត្ថកិច្ចឃាត់ខ្លួនជនប្រព្រឹត្តិបាន។
មន្ត្រីជាន់ខ្ពស់ការិយាល័យឃ្លាំមើលការរំលោភស្ត្រី និងកុមារនៃអង្គការលីកាដូ លោកស្រី ណាប់ សុមាលី មានប្រសាសន៍ថា មូលហេតុចម្បងដោយសារតែការរីកសាយភាយគ្រឿង ស្រវឹង គ្រឿងញៀន វីឌីអូអាសអាភាស និងកង្វះការអប់រំ។ លោកស្រី ជំរុញឲ្យមានការ ផ្សព្វផ្សាយឲ្យបានទូលាយចំពោះទោសទណ្ឌដល់អ្នកប្រព្រឹត្ត ហើយការអនុវត្តទោសធ្វើតាម ច្បាប់ មិនត្រូវដោះស្រាយតាមការសម្របសម្រួលជាសំណងទេ។
លោកស្រី ណាប់ សុមាលី៖«មិនថា ជនរងគ្រោះជាសាច់ញាតិឬ អ្នកប្រព្រឹត្តិនោះទេ ធ្វើម៉េច កុំឲ្យសមត្ថកិច្ចសម្របសម្រួលក្រៅប្រព័ន្ធតុលាការតាមរយៈសំណង។ ជនរងគ្រោះជា ច្រើនបើសិនជាអ្នកប្រព្រឹត្តិជាអ្នកមានតួនាទីមានស័ក្តិមានយស ឬអ្នកលុយមានកាក់នោះ ច្រើនតែមានការសម្របសម្រួលជាសំណង ចឹងធ្វើឲ្យវប្បធម៌និទណ្ឌភាព នៅកម្ពុជានៅ តែមាន ។»
នាយិកាអង្គការកម្ពុជាដើម្បីជួយស្រ្តីមានវិបត្តិ លោកស្រី ប៉ុក បញ្ញាវិចិត្រ មានប្រសាសន៍ថា កុមាររងគ្រោះដែលអង្គការរបស់លោកស្រីបានជួយកើនឡើង។ លោកស្រីបន្តថា បញ្ហានេះធ្វើឲ្យប៉ះពាល់ខ្លាំងដល់សង្គមនិងអនាគតកុមាររងគ្រោះ។
លោកស្រី ប៉ុក បញ្ញាវិចិត្រ៖«ករណីរំលោភកុមារហ្នឹងធ្វើឲ្យសីលធម៌សង្គមធ្លាក់ចុះ អាហ្នឹងដឹង ទូទាំងសកលលោកហើយ ទី២ប៉ះពាល់ដល់អនាគតក្មេង។ ក្មេងតែប៉ះពាល់ចឹងការសិក្សា ក៏លែងចង់បាន ស្តីក៏លែងចង់ធ្វើឲ្យកើតជំងឺTrauma(ជំងឺផ្លូវចិត្ត) ចឹងរឿង ទាំងអស់នេះធ្វើ ឲ្យប៉ះពាល់អនាគតកុមារ។»
អ្នកស្រាវជ្រាវការអភិវឌ្ឍន៍សង្គមលោក ប៉ា ចន្ទរឿន យល់ឃើញថា បញ្ហាឃាតកម្មរំលោភក្មេងៗសម្លាប់ និងអំពើហិង្សាផ្សេងៗទៀតបានកើតឡើងក្នុងសង្គមខ្មែរហាក់មិនបានថមថយនោះទេ ដោយលោកថា បញ្ហានេះកើតឡើងដោយសារតែសីលធម៌និងគុណធម៌សង្គមធ្លាក់ចុះ ដែលការធ្លាក់ចុះនេះដល់ចំណុចប្រកាសអាសន្នហើយ។
អនុប្រធាននាយកដ្ឋានប្រឆាំងការជួញដូរមនុស្ស និង ការពារអនីតិជននៃក្រសួងមហាផ្ទៃ លោក ជីវ ផល្លី មិនអាចទាក់ទងសុំយោបល់បានទេនៅថ្ងៃនេះដោយលោកថា ជាប់ប្រជុំ។
កាលពីខែកក្កដា របាយការណ៍របស់សម្ព័ន្ធបងប្អូនស្រី ជាបណ្តុំអង្គការចំនួន៤បង្ហាញថា ក្នុង១ថ្ងៃមានករណីហិង្សាផ្លូវភេទយ៉ាងតិច១កើតឡើង ហើយបានកើតឡើងចំពោះកុមារ អាយុក្រោម១៥ឆ្នាំ។ របាយការណ៍បញ្ជាក់ថា ជនល្មើសសុទ្ធតែធ្លាប់មាន ទំនាក់ទំនង ជាមួយ ជនរងគ្រោះដូចជា សាច់ញាតិ មិត្តភ័ក្តិ ឬ សង្សារជាដើម។
មាត្រា៣៩នៃច្បាប់ស្តីពីការរំលោភបំពានផ្លូវភេទចែងថា ជនដែលប្រព្រឹត្តិប្រឈម ជាប់ពន្ធនា គារ ពី៥ទៅ១០ឆ្នាំ។ ចំពោះករណីរំលោភសម្លាប់បើអចេតនាមាត្រា២៤៤អាច ជាប់ពន្ធនាគារ ពី១៥ទៅ៣០ឆ្នាំ បើមានចេតនាតាមមាត្រា២០៥ ជនប្រព្រឹត្តិអាចជាប់ពន្ធនាគារមួយជីវិត។
ក្នុងចំណុចមួយនៃគោលនយោបាយភូមិឃុំមានសុវត្ថិភាពក៏បានចែងពីការប្រឆាំងលើអំពើហិង្សាផ្លូវភេទ ឬ ការរំលោភបំពានផ្លូវភេទដែរ។