មន្ដ្រីជាន់ខ្ពស់អង្គការសហប្រជាជាតិ(UN)ប្រចាំកម្ពុជាជំរុញឲ្យរដ្ឋាភិបាលធានាការចូលរួមរបស់យុវជននៅក្នុងការអភិវឌ្ឍសង្គម និងនយោបាយ ជាពិសេសជំរុញឲ្យយុវជនហ៊ានចូលរួមនៅក្នុងការធ្វើសេចក្ដីសម្រេចចិត្តនានាដែលប៉ះពាល់ដល់ពួកគេ។
នៅថ្ងៃពុធនេះ អង្គការសហប្រជាជាតិប្រចាំកម្ពុជាបានប្រារព្ធខួបលើកទី៧៣ឆ្នាំ នៃធម្មនុញ្ញអង្គការសហប្រជាជាតិដែលបានចូលជាធរមាន កាលពីឆ្នាំ១៩៤៥ ដោយផ្ដោតសំខាន់លើប្រធានបទ «លើកកម្ពស់នវានុវត្តន៍ថ្ងៃនេះ ដើម្បីថ្ងៃស្អែកកាន់តែល្អប្រសើរ» និងគោលដៅអភិវឌ្ឍន៍ប្រកបដោយចីរភាព (SDGs) ធ្វើឡើងនៅរាជធានីភ្នំពេញ។
ក្នុងពិធីនេះ តំណាងអង្គការសហប្រជាជាតិប្រចាំកម្ពុជា លោកស្រី Pauline Tamesis ប្រាប់អ្នកសារព័ត៌មានថា អង្គការសហប្រជាជាតិបានសហការជាមួយរដ្ឋាភិបាលកម្ពុជា ដើម្បីធ្វើយ៉ាងណាជំរុញឲ្យយុវជនអាចចូលរួមក្នុងការងារសហគមន៍របស់ពួកគេ ការអភិវឌ្ឍសេដ្ឋកិច្ច និងនយោបាយ។
ប៉ុន្ដែ លោកស្រីយល់ថា យុវជនខ្លួនឯងក៏ត្រូវមានសេចក្ដីក្លាហាន និងហ៊ានចូលរួមក្នុងបញ្ហាសង្គមទាំងឡាយ ដែលប៉ះពាល់ដល់ពួកគេ ដូចជា ការអប់រំ សេវាសុខភាព វិសមភាពសង្គម ឱកាសការងារ ការគោរពសិទ្ធិមនុស្ស ការបន្ថយភាពក្រីក្រ បញ្ហាបរិស្ថាន និងប្រើប្រាស់បច្ចេកវិទ្យាទំនើបនាពេលបច្ចុប្បន្ន។
លោកស្រី Pauline Tamesis បន្ដថា៖ «ឥឡូវនេះ អង្គការសហប្រជាជាតិមានកម្មវិធីមួយស្ដីពីការងារសម្រាប់យុវជន ដែលយើងកំពុងធ្វើការជាមួយក្រសួងការងារ ហើយយើងក៏កំពុងធ្វើការជាមួយក្រសួងអប់រំ ដើម្បីផ្ដល់នូវឪកាស ជំនាញ ការអប់រំ ដើម្បីពង្រីកការចូលរួមរបស់ក្នុងជីវភាពសេដ្ឋកិច្ច […] ឲ្យពួកគេអាចចូលរួមបន្ថែមទៀតក្នុងការកសាងសហគមន៍ និងការចូលរួមក្នុងនយោបាយនៅក្នុងប្រទេសនេះ»។
ក្នុងពិធីនេះដែរ រដ្ឋមន្ដ្រីក្រសួងអប់រំ យុវជន និងកីឡា លោក ហង់ ជួនណារ៉ុន មានប្រសាសន៍ថា យុវជនកម្ពុជាត្រូវខិតខំពង្រឹងចំណេះដឹង និងសមត្ថភាព ត្រៀមខ្លួនសម្រាប់ឱកាសការងារ និងសិក្សាពីភាពជឿនលឿនផ្នែកបច្ចេកវិទ្យានាពេលបច្ចុប្បន្ន ដោយថា ដើម្បីចូលរួមអភិវឌ្ឍន៍សង្គមជាតិ និងពិភពលោកទាំងមូល។
លោកបន្ដថា៖ «ទី១ រកចំណេះដឹង ទី២ ឲ្យមានបំណិន ទី៣ ត្រៀមខ្លួនដើម្បីទីផ្សារការងារ ទី៤ គឺទទួលយកបច្ចេកវិទ្យា ដើម្បីបង្កើតពិភពលោកល្អមួយ ដោះស្រាយបញ្ហា។ ដូច្នេះដើម្បីដោះស្រាយបញ្ហា សូមឲ្យយុវជនចូលរួម ប្រសិនបើយុវជនមិនចូលរួម ដូច្នេះមិនអាចដោះស្រាយបញ្ហាបានទេ។ ដូច្នេះការចូលរួមរបស់យុវជន ការផ្ដល់ឲ្យយុវជននូវជំនាញ បំណិន បច្ចេកវិទ្យា គឺជាកត្ដាចាំបាច់»។
នាយកប្រតិបត្តិអង្គការយុវជនស្ម័គ្រចិត្តដើម្បីសង្គម លោក ប៉ែន សុមុនី សង្កេតឃើញថា យុវជននៅកម្ពុជាកំពុងជួបប្រឈមនឹងបញ្ហាជាច្រើន ដូចជា ទាក់ទងនឹងវិស័យអប់រំ ការងារ សុខាភិបាល បញ្ហាបរិស្ថាន សិទ្ធិទទួលបានព័ត៌មាន និងមជ្ឈដ្ឋានសុវត្ថិភាពសម្រាប់យុវជនជាដើម។
លោកថា បញ្ហាទាំងអស់នេះ គឺជាឧបសគ្គដែលធ្វើឲ្យយុវជនកម្ពុជាពិបាកប្រកួតប្រជែងជាមួយយុវជនផ្សេងទៀតនៅក្នុងតំបន់ និងការត្រៀមខ្លួនដើម្បីចាប់យកឱកាសការងារក្នុងស្រុក។
លោកបន្ដថា៖ «ទី១ ពាក់ព័ន្ធនឹងបញ្ហាអប់រំ ទី២ ពាក់ព័ន្ធនឹងបញ្ហាការងារ ទី៣ ពាក់ព័ន្ធរឿងសុវត្ថិភាពរបស់យុវជន ទី៤ ពាក់ព័ន្ធរឿងសុខភាព ហើយទី៥ ពាក់ព័ន្ធនឹងនិរន្ដរភាពបរិស្ថាន»។
របាយការណ៍របស់អង្គការយុវជនស្ម័គ្រចិត្តដើម្បីសង្គម បង្ហាញថាក្នុងចំណោមពលរដ្ឋកម្ពុជាជិត ១៦លាននាក់ មាន ៣៣ភាគរយ គឺជាយុវជន ដែលជាកម្លាំងចលករដ៏សំខាន់ ដើម្បីអភិវឌ្ឍប្រទេសជាតិទៅថ្ងៃអនាគត។ ប៉ុន្ដែរបាយការណ៍ក៏បង្ហាញផងដែរថា យុវជននៅមិនទាន់ទទួលបានសិទ្ធិអំណាចពេញលេញ និងត្រូវបានគេដាក់បញ្ចូលក្នុងដំណើការធ្វើសេចក្ដីសម្រេចចិត្តនោះឡើយ៕
