អ្នកនាំពាក្យក្រសួងមហាផ្ទៃ បានឲ្យដឹងថា រដ្ឋមន្ត្រីមហាផ្ទៃ លោក ស ខេង បានសម្រេចច្រានចោលសំណើសុំដោះដូរអគារអគ្គស្នងការនគរបាលជាតិ ពីសង្កាត់ទន្លេបាសាក់ ខណ្ឌចំការមន ទៅខណ្ឌដង្កោ រាជធានីភ្នំពេញ ដែលចំណារបដិសេធនេះធ្វើឡើងតាំងពីជិត ១ឆ្នាំមុន។
ក្នុងលិខិតមួយកាលពីចុងខែធ្នូ ឆ្នាំ២០១៧កន្លងមក ដែល វីអូឌី ទើបទទួលបាននៅថ្ងៃនេះ អគ្គស្នងការនគរបាលជាតិ លោក នេត សាវឿន បានស្នើទៅរដ្ឋមន្ត្រីក្រសួងមហាផ្ទៃ លោក ស ខេង ឲ្យដោះដូរទីតាំងអគ្គស្នងការនគរបាលជាតិ ដោយអះអាងថា ទីតាំងសព្វថ្ងៃនេះ មានទំហំតូចចង្អៀត។
ប៉ុន្តែ លិខិតដដែលនោះ លោក ស ខេង បានបដិសេធសំណើនេះកាលពីថ្ងៃទី១១ ខែមករា ឆ្នាំ២០១៨នេះ ដោយលោកចារត្រឡប់ទៅវិញថា ក្រសួងមានថវិកាគ្រប់គ្រាន់ ដើម្បីកសាងកន្លែងថ្មី។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានបដិសេធបកស្រាយជុំវិញករណីនេះ ដោយឲ្យអ្នកសារព័ត៌មានស្រង់ខ្លឹមសារក្នុងលិខិតដែលរដ្ឋមន្ត្រីក្រសួងមហាផ្ទៃប្រកាសច្រានចោលនៅលើគេហទំព័រ Fresh News ទៅវិញ។
អ្នកនាំពាក្យរូបនេះ ត្រូវបានសារព័ត៌មាន Fresh News ដកស្រង់សម្ដីចុះផ្សាយថា លោក ស ខេង មិនឯកភាពនឹងសំណើដោះដូរទីតាំងអគ្គស្នងការនគរបាលជាតិនោះឡើយ។
បើតាមលិខិតដដែលនោះ ក្រុមហ៊ុន LONG MA INVEST AND REAL EASTATE CO., LTD បានស្នើដោះដូរទីតាំងអគ្គស្នងការនគរបាលជាតិ ដែលស្ថិតនៅក្នុងសង្កាត់ទន្លេបាសាក់ ខណ្ឌចំការមន ទៅកាន់ទីតាំងថ្មីមាន ស្ថិតនៅក្នុងសង្កាត់ដង្កោ ខណ្ឌដង្កោ។
នៅឯទីតាំងថ្មី ក្រុមហ៊ុនមួយនេះបានសន្យារសាងសង់អគារមួយកម្ពស់១០ជាន់ និងអគារ២ទៀតសម្រាប់ការស្នាក់នៅរបស់កងកម្លាំងនគរបាលជាតិ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា សម័យនេះរដ្ឋាភិបាលគួរតែបញ្ឈប់ការដោះដូរអគាររដ្ឋទៅទីតាំងផ្សេង ដោយថា គួរតែអភិរក្សកន្លែងចាស់ និងបង្កើតកន្លែងថ្មីបន្ថែម ដើម្បីកុំឲ្យមានអំពើពុករលួយ។
លោកមានប្រសាសន៍ថា៖ «ពាក្យដោះដូរគ្រាន់តែពាក្យបច្ចេកទេសទេ គឺលក់កន្លែងចាស់ទៅកន្លែងថ្មីដែលមានតម្លៃថោកជាងកន្លែងចាស់ ខ្ញុំចង់ឃើញការអភិរក្សកន្លែងចាស់ ឧទាហរណ៍នៅកន្លែងចាស់ ប្រភេទនៃការផ្តល់[សេវា]មានអ្វីខ្លះ កន្លែងថ្មីត្រូវការពង្រីកបន្ថែម ហើយមានការទំនាក់ទំនងគ្នាផ្នែករដ្ឋបាលមួយដែលធានានូវប្រសិទ្ធិភាពនៃប្រព័ន្ធរដ្ឋបាល ប្រព័ន្ធគ្រប់គ្រងរបស់ស្ថាប័ន»។
ទីតាំងរបស់ស្ថាប័នរដ្ឋមួយចំនួន ត្រូវបានរដ្ឋាភិបាលដោះដូរទៅជាយក្រុង ក្រោមរូបភាពធ្វើការអភិវឌ្ឍ។ អគារដែលដោះដូរនោះ រួមមាន ក្រសួងពាណិជ្ជកម្ម ក្រសួងបរិស្ថាន ស្នងការនគរបាលជាតិ ក្រសួងសុខាភិបាល និងមន្ទីរអប់រំរាជធានីភ្នំពេញជាដើម៕
