សហជីពរបស់លោក រ៉ុង ឈុន ស្នើសុំសមាគមរោងចក្រកាត់ដេរកម្ពុជា(GMAC) ឲ្យសហការគ្នា ដើម្បីទាមទារទៅរដ្ឋាភិបាល ឲ្យទទួលយកលក្ខខណ្ឌសហភាពអឺរ៉ុប ដើម្បីរក្សាប្រព័ន្ធអនុគ្រោះពន្ធ «អ្វីគ្រប់យ៉ាងលើកលែងតែអាវុធ» ហៅកាត់ថា EBA ដោយថា កូនសោរនៅក្នុងដៃរដ្ឋាភិបាល។
សហភាពអឺរ៉ុប កាលពីដើមខែតុលានេះ បានជូនដំណឹងអំពីដំណើរការដកប្រព័ន្ធអនុគ្រោះពន្ធពីកម្ពុជាវិញ បន្ទាប់ពីរកឃើញថា រដ្ឋាភិបាលមិនបានស្តារប្រជាធិបតេយ្យតាមលក្ខខណ្ឌរបស់ខ្លួន ដោយទុកពេលឲ្យ ១ឆ្នាំ។
ករណីនេះ GMAC កាលពីថ្ងៃទី២០ ខែតុលា បានស្នើទៅសហភាពអឺរ៉ុបឲ្យពិចារណាឡើងវិញ ដោយថា វិធានការនេះនឹងប៉ះពាល់ដល់កម្មករជាង ៧០ម៉ឺននាក់ រយៈពេលវែង និងគ្រួសាររបស់ពួកគេ។
ប៉ុន្តែ លិខិតចុះថ្ងៃទី២៤ តុលា ប្រធានសភាពសហជីពកម្ពុជា លោក រ៉ុង ឈុន លើកឡើងថា កង្វល់របស់ប្រធានសមាគមរោងចក្រកាត់ដេរកម្ពុជា លោក វ៉ាន់ ស៊ូអៀង ដូចគ្នាទៅនឹងសហជីពរបស់លោកដែរ គ្រាន់តែការស្វែងរកអន្តរាគមន៍នោះមានគោលដៅខុសគ្នា។
លោក រ៉ុង ឈុន បន្តថា កូនសោរនៃការដក ឬបន្តប្រព័ន្ធអនុគ្រោះពន្ធឲ្យកម្ពុជា ស្ថិតក្នុងដៃរដ្ឋាភិបាល។ លោកបន្តថា ដើម្បីឲ្យសហភាពអឺរ៉ុបបន្តរក្សាប្រព័ន្ធអនុគ្រោះពន្ធដល់កម្ពុជា GMAC ត្រូវបញ្ចុះបញ្ចូលរដ្ឋាភិបាលកម្ពុជា និងគួរតែចូលរួមជាមួយសហជីពរបស់លោក ធ្វើការទាមទារទៅរដ្ឋាភិបាល ឲ្យទទួលយកលក្ខខណ្ឌរបស់សហភាពអឺរ៉ុប។
VOD មិនអាចសុំអត្ថាធិប្បាយពីប្រធានសមាគមរោងចក្រកាត់ដេរកម្ពុជា លោក វ៉ាន់ ស៊ូអៀង បានទេនៅថ្ងៃនេះ ដោយលោកអះអាងថាកំពុងជាប់ប្រជុំ ខណៈអគ្គលេខាធិការរង លោក កាំង ម៉ូលីការ មិនអាចទាក់ទងបាន។
ប្រព័ន្ធអនុគ្រោះពន្ធរបស់សភាពអឺរ៉ុប បានភ្ជាប់លក្ខខណ្ឌគោរពសិទ្ធិមនុស្ស និងលទ្ធិប្រជាធិបតេយ្យ។
ការប្រកាសវិធានការរបស់សហភាពអឺរ៉ុប បានធ្វើឡើងក្រោយពីមានការរំលាយគណបក្សប្រឆាំង ការចាប់ឃុំខ្លួនមេដឹកនាំគណបក្សសង្គ្រោះជាតិ លោក កឹម សុខា និងវិធានការនានាដែលក្រុមប្រទេសលោកសេរីវាយតម្លៃថា ធ្វើឲ្យប្រជាធិបតេយ្យនៅកម្ពុជារួមតូច។
នាយកប្រតិបត្តិសម្ព័ន្ធភាពការងារ និងសិទ្ធិមនុស្ស លោក មឿន តុលា លើកឡើងថា ការបាត់បង់ EBA មិនមែនបង្កផលប៉ះបាល់ត្រឹមតែកម្មករ និងគ្រួសាររបស់ពួកគេប៉ុណ្ណោះទេ ប៉ុន្តែ លោកថា វិស័យកាត់ដេរទាំងមូលក៏ប៉ះពាល់ដែរ រួមទាំងវិស័យផ្សេងទៀតៗ ដូចជា គ្រឹះស្ថានមីក្រូហិរញ្ញវត្ថុ ដែលកម្មករជាប់បំណុល ប៉ះពាល់ដល់សេដ្ឋកិច្ចជាតិ និងអាចបង្កឲ្យមានវិបត្តិសង្គមផងដែរ។
លោក មឿន តុលា ឲ្យដឹងទៀតថា ការដែល GMAC បង្ហាញការព្រួយបារម្ភទៅសហភាពអឺរ៉ុបពីអត្ថប្រយោជន៍របស់ EBA នេះ ជារឿងល្អមួយ ប៉ុន្តែ លោកថា GMAC គួរបញ្ចុះបញ្ចូលរដ្ឋាភិបាលផងដែរពីកង្វល់របស់ខ្លួន ដោយថា គន្លឹះនៃការរក្សាទុក EBA ស្ថិតនៅលើដៃរដ្ឋាភិបាល។
លោកថា៖ «ខ្ញុំគិតថា បើមេដឹកនាំខ្មែរ នៅគិតពីប្រយោជន៍ជាតិ ប្រយោជន៍ប្រជាពលរដ្ឋ ប្រយោជន៍សង្គមទាំងមូលមែន ហើយពិតជាស្នេហាជាតិដូចខ្លួនអះអាងមែន វាអត់មានខាតអ្វីសោះ នូវអ្វីដែល EU ទាមទារ ប៉ុន្តែ ផ្ទុយទៅវិញ យើងចំណេញបានច្រើនទៀត»។
ដូចគ្នានេះដែរ អ្នកវិភាគនយោបាយ លោក ឯម សុវណ្ណារ៉ា និយាយថា កម្ពុជាអាចរក្សាបានប្រព័ន្ធអនុគ្រោះពន្ធនេះបាន អាស្រ័យលើឆន្ទៈនយោបាយថា តើរដ្ឋាភិបាលបានស្តារប្រជាធិបតេយ្យឡើងវិញ ឲ្យប្លុកលោកសេរីជឿបានកម្រិតណា។
លោកថា៖ «EUគេបានដាក់លក្ខខណ្ឌក្នុងកម្រិតណាមួយហើយ រដ្ឋាភិបាលត្រូវឆ្លើយតបក្នុងកម្រិតណាមួយ ហើយឆ្លើយបានកម្រិតណាជារឿងរបស់គណបក្សកាន់អំណាចហ្នឹងហើយ ហើយបើសិនជាសហភាពអឺរ៉ុបគេមិនព្រៀមព្រៀងតាមការឆ្លើយតបរបស់រដ្ឋាភិបាលទេ ពេលនោះ គេនឹងដក EBAហ្នឹង។ កត្តាគន្លឹះ វានៅលើពីរភាគីហ្នឹងឯង គឺរដ្ឋាភិបាល និងសហភាពអឺរ៉ុបត្រូវចរចាគ្នាហ្នឹងឯង»។
របាយការណ៍របស់គណកម្មការអឺរ៉ុប ចេញផ្សាយកាលពីខែមេសាកន្លងទៅ បង្ហាញថា កម្ពុជាបាននាំចេញទំនិញទៅសហគមន៍អឺរ៉ុបក្នុងឆ្នាំ២០១៧ មានទំហំជាសាច់ប្រាក់ជាង ៦ពាន់លានដុល្លារ។ ទំនិញទាំងនោះ ភាគច្រើនជាផលិតផលសម្លៀកបំពាក់កាត់ដេរ៕