ស្ពានឆ្លងសមុទ្រដែលវែងជាងគេលើពិភពលោកភ្ជាប់តំបន់ស្វយ័តហុងកុងទៅតំបន់ស្វយ័តម៉ាកាវហើយត្រូវឆ្លងកាត់ក្រុងជូហៃនៃខេត្តគ័ងតុង ត្រូវបានប្រធានាធិបតីចិនលោក ស៊ី ជិនពីង សម្ពោធបើកឲ្យប្រើប្រាស់កាលពីថ្ងៃទី២៣ខែតុលាឆ្នាំ២០១៨។
តាមការផ្សាយផ្ទាល់របស់ទូរទស្សន៍រដ្ឋចិន ប្រជាជនក្នុងតំបន់ទាំងបីនេះបាននិយាយជាមួយអ្នកសារព័ត៌មានប្រហាក់ប្រហែលគ្នាថាពួកគេមានក្តីរំភើបជាខ្លាំងដែលស្ពានមួយនេះត្រូវបានកសាងឡើង ព្រោះវានឹងជួយកាត់បន្ថយរយៈពេលធ្វើដំណើរពីតំបន់មួយទៅតំបន់មួយ និងធ្វើឲ្យមានភាពងាយស្រួលក្នុងការធ្វើជំនួញរវាងគ្នានឹងគ្នាផងដែរ។
ទោះបីជាមានការសាទរពីសំណាក់ប្រជាជនមួយចំនួនក្នុងតំបន់ទាំងនេះក្តី ក៏ការកសាងស្ពានឆ្លងសមុទ្រវែងជាងគេលើពិភពលោកមួយនេះ បង្កជាបញ្ហាមួយចំនួនផងដែរ។
វត្តមាននៃស្ពានឆ្លងសមុទ្រវែងជាងគេមួយនេះ បានបង្កជាក្តីកង្វល់ដល់អ្នកអភិរក្សបរិស្ថានមួយចំនួនដែលធ្វើការកាពារជីវិតជីវចម្រុះក្នុងសមុទ្រ។ សារព័ត៌មាន South China Morning Post របស់ហុងកុង ផ្សាយនៅលើគេហទំព័របស់ខ្លួនថាកាលពីថ្ងៃទី២៣ ក្រុមអភិរក្សបរិស្ថាននៅទីក្រុងហុងកុង បានលើកឡើងថាការកសាងស្ពាននេះបានបំផ្លាញជម្រករបស់ផ្សោតសមុទ្រពណ៌ស ដែលជាប្រភេសសត្វដ៏កម្រហើយនៅសល់តិចតួចប៉ុណ្ណោះក្នុងដែនសមុទ្រហុងកុង។
របាយការណ៍របស់នាយកដ្ឋានអភិរក្សកសិកម្មនិងជលផលរបស់ហុងកុង បង្ហាញថាចន្លោះពីខែមេសាឆ្នាំ២០១៧ដល់ខែមីនាឆ្នាំ២០១៨ ក្រុមមន្រ្តីរបស់ខ្លួនរកឃើញវត្តមានសត្វផ្សោតប្រភេទនេះតែ៤៧ក្បាលប៉ុណ្ណោះ បើធៀបនឹងរយៈពេលដូចគ្នាកាលពីចន្លោះឆ្នាំ២០១៤-២០១៥ ថយចុះរហូតដល់៤០ក្បាល។ តាមសារព័ត៌មាន South China Morning Post របស់ហុងកុងដដែល ក្រុមសកម្មជនបរិស្ថានទាំងនោះ ថាស្ពាននេះនឹងធ្វើឲ្យចំនួនផ្សោតសមុទ្រពណ៌សទាំងនេះរឹតតែថយចុះខ្លាំងថែមទៀត ហើយសត្វទាំងនោះនឹងធ្វើការផ្លាស់ប្តូទីលំនៅពីដែនសមុទ្រហុងកុងទៅដែនសមុទ្ររបស់ចិនវិញ។
ក្រៅពីការរិះគន់របស់ក្រុមអ្នកអភិរក្សជីវចម្រុះពីផលប៉ះពាល់នៃកសាងស្ពានឆ្លងសមុទ្រដ៏វែងមួយនេះទៅលើជម្រករបស់ផ្សោតសមុទ្រពណ៌ស ក្រុមមន្រ្តីសិទ្ធិមនុស្សក៏បានរិះគន់ថាផងដែរ ថាក្រុមកម្មករដែលកសាងស្ពានត្រូវបានគេរំលោភសិទ្ធ។ តាមរបាយការណ៍ដែលចុះផ្សាយក្នុងសារព័ត៌មានSouth China Morning Post កម្មករចំនួន២០នាក់បានស្លាប់បាត់បង់ជីវិតនិងជាង៥០០នាក់ផ្សេងទៀតបានរងរបួសនៅពេលដែលពួកគេធ្វើស្ពានមួយនេះ។ តាមប្រភពដដែលក្រុមកម្មករដែលស្លាប់ទាំង២០នាក់នោះ១១នាក់មកពីតំបន់ស្វយ័តហុងកុង ចំណែក៩នាក់ទៀតមកពីចិនដីគោក។
តាមសារព័ត៌មាន South China Morning Post ដដែល កម្មករមួយចំនួនបានធ្លាក់ចូលក្នុងសមុទ្រហើយលងទឹកស្លាប់ ទោះបីជាពួកគេបានពាក់អាវពោងការពារក៏ដោយ។ ក្រុមមន្រ្តីការពារសិទ្ធិពលករ បានទម្លាក់ការទទួលខុសត្រូវទៅលើក្រុមហ៊ុនដែលជួលក្រុមកម្មករទាំងនោះ ព្រោះពួកគេ បានរកឃើញថាអាវពោងការពារដែលផ្ដល់ទៅឲ្យក្រុមកម្មករទាំងនោះមិនមានស្ដង់ដារនោះទេ។ ក្រុមមន្រ្តីការពារសិទ្ធិពលករ ក៏បានជម្រុញឲ្យមានការដាក់ទោសទណ្ឌទៅលើក្រុមហ៊ុនទាំងនោះបន្ថែមលើការផាកពិន័យ។
ស្ពានឆ្លងសមុទ្រដែលវែងជាងគេលើពិភពលោកដែលភ្ជាប់ហុងកុងទៅម៉ាកាវហើយត្រូវឆ្លងកាត់ក្រុងជូហៃនៃខេត្តគ័ងតុង មានប្រវែង៥៥គីឡូម៉ែត្រ ហើយចាប់ផ្ដើមសាងសង់នៅឆ្នាំ២០០៩។ ការកសាងស្ពាននេះ ត្រូវចំណាយអស់ទឹកប្រាក់ចំនួន២០ពាន់លានដុល្លា៕