រដ្ឋសភាប្រទេសវៀតណាម បានបោះឆ្នោតជ្រើសរើសលោក ង្វៀង ហ៊្វូជុង ជាប្រធានាធិបតីថ្មីរបស់ខ្លួនកាលពីថ្ងៃទី២៣ ខែតុលាឆ្នាំ២០១៨។ ការបោះឆ្នោតជ្រើសរើសលោក ង្វៀង ហ៊្វូជុង គឺធ្វើឡើងដើម្បីជំនួសអតីតប្រធានាធិបតីលោក ជឹន ដៃគ័ង ដែលបានទទួលមរណៈភាពកាលពីខកញ្ញាកន្លងមកនេះ។
តំណែងប្រធានាធិបតីដែលលោក ង្វៀង ហ៊្វូជុង ទើបទទួលបាននេះ ជាតំណែងថ្មីមួយបន្ថែមទៀតទៅលើតំណែងដែលលោកកំពុងកាន់ក្នុងដៃ គឺតំណែងជាអគ្គលេខាធិការបក្សកុម្មុយនីស្ដវៀតណាម ដែលជាតំណែងមួយដែលមានអំណាចបំផុតក្នុងបក្សកុម្មុយនីស្ដ។ តាមរដ្ឋធម្មនុញ្ញវៀតណាម អំណាចក្នុងការគ្រប់គ្រងនិងដឹកនាំប្រទេសមិនស្ថិតនៅក្រោមបុគ្គលតែមួយនោះទេ ពោលគឺស្ថិតក្រោមសរសរស្តម្ភសំខាន់ៗចំនួនបួនដែលត្រូវធ្វើការត្រួតពិនិត្យគ្នាទៅវិញទៅមក។ សរសរស្តម្ភទាំងបួននោះរួមមានអគ្គលេខាធិការបក្សកុម្មុយនីស្ដ ប្រធានាធិបតី ប្រធានសភា និងនាយករដ្ឋមន្រ្តី។
ការទទួលបានអំណាចពីរក្នុងដៃរបស់ប្រធាធិបតីវៀតណាមរូបនេះ ត្រូវបានមតិមួយចំនួួនចោទជាសំណួរឡើងថាតើលោក ង្វៀង ហ៊្វូជុង អាចនឹងប្រើវិធីដូចលោក ស៊ី ជីនពីង ក្នុងការក្តោបក្ដាប់អំណាចដែរឬទេ?
សកម្មភាពកន្លងមករបស់លោក ង្វៀង ហ៊្វូជុង ត្រូវបានគេមើលឃើញថាមានភាពស្រដៀងគ្នាទៅនឹងអ្វីដែលលោក ស៊ី ជីនពីង បានធ្វើក្នុងពេលកន្លងគឺការបង្រ្កាបមន្រ្តីពុករលួយ។ ចាប់តាំងពីឆ្នាំ ២០១២ ភ្លាមៗបន្ទាប់ពីត្រូវបានជ្រើសរើសជាប្រធានាធិបតីចិន លោក ស៊ី ជីនពីង បានធ្វើយុទ្ធនាការប្រឆាំងអំពើពុករលួយដ៏ធំបំផុតនៅក្នុងប្រវត្តិសាស្រ្តចិនសម័យទំនើប។ លោក ស៊ី ជីនពីង បានចាប់ខ្លួនមន្រ្តីជាច្រើនក្នុងជួររដ្ឋាភិបាលដែលរកឃើញថាបានប្រព្រឹត្តអំពើពុករលួយ។ យុទ្ធនាការប្រឆាំងអំពើពុករលួយដែលលោក ស៊ី ជីនពីង បានធ្វើត្រូវបានគេមើលឃើញថាជាផ្នែកមួយក្នុងការបង្រ្កាបទៅលើអ្នកដែលមាននិន្នាការប្រឆាំងនឹងលោកផងដែរ។
ចំពោះលោក ង្វៀង ហ៊្វូជុង វិញ ចាប់តាំងពីត្រូវបានសមាជិកបក្សជ្រើសរើសធ្វើជាអគ្គលេខាធិការបក្សកុម្មុយនីស្ដវៀតណាមជាថ្មីម្ដងទៀតនៅឆ្នាំ២០១៦ លោកង្វៀង ហ៊្វូជុង បានដឹកនាំធ្វើយុទ្ធនាការណ៍បង្រ្កាបអំពើពុករលួយដោយបានចាប់ខ្លួនមន្រ្តីធំៗនិងអ្នកជំនួញជាច្រើននាក់។ លោក គូហ៊ុយ ហាវូ អតីតអ្នកទោសនយោបាយនិងជាអ្នករិះគន់រដ្ឋាភិបាលក្រុងហាណួយ បានលើកឡើងក្នុងអត្ថបទរបស់លោកដែលបានចុះផ្សាយក្នុងសារព័ត៌មាន ឌឹឌីប្លូម៉ាត ថាលោក ង្វៀង ហ៊្វូជុង កាលពីឆ្នាំ២០១៦កន្លងទៅបានរួមគ្នាជាមួយអតីតប្រធានាធិបតី ប្រធានសភា បោះឆ្នោតទម្លាក់លោក ង្វៀន តិនយុង អតីតនាយរដ្ឋមន្រ្តីឲ្យចេញពីជួរគណៈកម្មធិការគណ្ដាលបក្សកុម្មុយនីស្ដវៀតណាម។ ប្រភពដដែលបន្ថែមថាលោក ង្វៀង ហ៊្វូជុង បានរិះគន់ អតីតនាយរដ្ឋមន្រ្តីលោក ង្វៀន តិនយុង បានធ្វើឲ្យប្រទេសវៀតណាមទន់ខ្សោយដោយសារតែរដ្ឋាភិបាលក្រោមការដឹកនាំរបស់លោកមានការប្រព្រឹត្តនូវអំពើពុករលួយធ្ងន់ធ្ងរ។
បញ្ហាមួយទៀតដែលគេលើកយកមកប្រៀបធ្រៀបជាមួយចិននោះគឺថាតើលោក ង្វៀង ហ៊្វូជុង អាចនឹងការប្រែរដ្ឋធម្មនុញ្ញដូចអ្វីដែលលោក ស៊ី ជីងពីង បានធ្វើដែរឬទេ?
លោក ឡេ ហុងហៀប អ្នកជំនាញផ្នែកនយោបាយផ្ទៃក្នុងនិងកិច្ចការបរទេសវៀតណាម នៃវិទ្យាស្ថានសិក្សាអាស៊ីអាគ្នេយ៍ប្រទេសសិង្ហបុរី បានថ្លែងប្រាប់សារព័ត៌មាន AL Jazeera ថា ទោះបីលោក ង្វៀង ហ៊្វូជុង កាន់តំណែងអគ្គលេធិការបក្សផង និងប្រធាធិបតីផងក៏ដោយ លោកមិនអាចមានអំណាចខ្លាំងក្លាដូចលោក ស៊ី ជីងពីង ដែរ។ លោកបន្តថានៅវៀតណាមខុសពីចិនត្រង់ថាមុននឹងលោក ង្វៀង ហ៊្វូជុង សម្រេចធ្វើអ្វីមួយ លោកត្រូវពិគ្រោះជាមួយសហការីរបស់គាត់នៅក្នុងការិយាល័យនយោបាយជាមុនសិន។
ប៉ុន្តែសម្រាប់លោក ង្វៀន កាក់ចាង អ្នកស្រាវជ្រាវនៅវិទ្យាស្ថានស្រាវជ្រាវសេដ្ឋកិច្ចនិងគោលនយោបាយវៀតណាមនៅហាណូយ យល់ថាការធ្វើជាអគ្គលេខាធិការនិងជាប្រធាធិបតីក្នុងពេលតែមួយរបស់លោក ង្វៀង ហ៊្វូជុង អាចធ្វើឱ្យចុះខ្សោយភាពប្រព័ន្ធនៃការដឹកនាំរបស់បក្សកុម្មុយនីស្តវៀតណាម។ ការដឹកនាំរបស់បក្សកុម្មុយនីស្តវៀតណាមឲ្យតម្លៃលើការដឹកនាំដែលមានលក្ខណៈជាសមូហភាព ពោលគឺមានលក្ខណៈប្រជាធិបតេយ្យជាងចិន ដោយសារតែការសម្រេចចិត្តត្រូវមានការចូលរួមពីសរសរស្តម្ភទាំងបួនដែលរួមមានលេខាធិការបក្សកុម្មុយនីស្ដ ប្រធានាធិបតី ប្រធានសភា និងនាយករដ្ឋមន្រ្តី។
លោក ង្វៀង ហ៊្វូជុង ត្រូវបានសមាជិកសភាវៀតណាមបោះឆ្នោតឲ្យធ្វើជាលេខាធិការបក្សកុម្មុយនីស្ដវៀតណាមនៅឆ្នាំ២០១១។ លោកមានអាយុ៧៤ឆ្នាំ ហើយលោកបានចូលបម្រើការងារក្នុងការិយាល័យនយោបាយបក្សកុម្មុយនីស្តវៀតណាមតាំងពីឆ្នាំ១៩៩៧មកម៉្លេះ៕
