សមត្ថកិច្ចខេត្តព្រះសីហនុ បានឃាត់ជនជាតិចិនចំនួន៤ នាក់ បន្ទាប់ពីជនជាតិចិនទាំងនោះ បានវាយរថយន្តមន្ត្រីនគរបាលនៅចំណុចមុខកាស៊ីណូមួួយកាលពីម្សិលមិញ។
តាមការចុះផ្សាយរបស់អគ្គស្នងការដ្ឋាននគរបាលជាតិបានឲ្យដឹងថា ជនជាតិចិនទាំង ៤ នាក់ បានប្រើប្រាស់ដំបងវាយរថយន្តមន្ត្រីនគរបាល០១គ្រឿង ដែលកំពុងបើកនៅត្រង់មុខកាស៊ីណូយ៉ាឌូលី ស្ថិតនៅក្រុមទី១៤ ភូមិ៤ សង្កាត់៤ ក្រុងព្រះសីហនុ បណ្ដាលឲ្យខូចខាតទាំងស្រុង។
ក្រោយពីមានហេតុការណ៍នេះ សមត្ថកិច្ចបានដកហូតយក កាំបិតប៉័ងតោ ចំនួន ០២ដើម, ដំបងដែកទីប ចំនួន ០៥ដើម, រថយន្តចំនួន ០១គ្រឿង ពីជនជាតិចិនទាំង៤ នាក់នោះ និងបញ្ជូនពួកគេទៅស្នងការដ្ឋាននគរបាលខេត្តព្រះសីហនុ ដើម្បីចាត់ការតាមនីតិវិធី។
វីអូឌីមិនអាចសុំការអធិប្បាយបន្ថែមពីស្នងការដ្ឋាននគរបាលខេត្តព្រះសីហនុ លោក ជួន ណារិន បានទេនៅព្រឹកនេះ។ ចំណែកអ្នកនាំពាក្យខេត្តព្រះសីហនុលោក ឱ សារឿន លើកឡើងថា លោកមិនទាន់ទទួលបានព័ត៌មានលំអិតនោះទេ។
កាលពីថ្ងៃទី ១៣ ខែកញ្ញា កន្លងទៅ មន្ត្រីជាន់ខ្ពស់ក្រសួងមហាផ្ទៃ លោក សុខ ផល អះអាងថា ជនជាតិចិនមកស្នាក់នៅប្រទេសកម្ពុជាបានកើនឡើងរហូតដល់ជាង ២១ ម៉ឺននាក់ ក្នុងនោះមានជាង ៧៨០០០ នាក់កំពុងរស់នៅខេត្តព្រះសីហនុ៕
