ថៃនិងម៉ាឡេស៊ីគឺជាប្រទេសមានសេដ្ឋកិច្ចរីកចម្រើននៅក្នុងតំបន់អាស៊ានដែលមានទំនាក់ទំនងពាណិជ្ជកម្មធំជាមួយសហរដ្ឋអាមេរិកនិងចិន ប៉ុន្តែប្រទេសក្នុងតំបន់អាស៊ានទាំងពីរ កំពុង រកវិធីសាស្ត្រទប់ស្កាត់ឥទ្ធិពលអាក្រក់ពីសង្គ្រាមសេដ្ឋកិច្ចរបស់ប្រទេសមហាអំណាចសេដ្ឋកិច្ចទី១ និងទី២លើពិភពលោក។
ថៃជាប្រទេសមានសេដ្ឋកិច្ចធំលំដាប់ទី២នៅអាស៊ាន ហើយមានដៃគូពាណិជ្ជកម្មធំគឺទី១ ចិន ក្នុងទំហំទឹកប្រាក់ជាង២៩ប៊ីលានដុល្លារ ហើយទី២គឺអាមេរិក។ ចំណែកម៉ាឡេស៊ីជាប្រទេស មានសេដ្ឋកិច្ចធំលំដាប់ទី៣នៅអាស៊ាន មានដៃគូពាណិជ្ជកម្មធំទី១គឺសិង្ហបុរី ក្នុងទំហំទឹកប្រាក់ ជាង៣១ប៊ីលានដុល្លារ ហើយដៃគូធំបន្ទាប់គឺចិន និងសហរដ្ឋអាមេរិក។ នេះបើតាម របាយការណ៍ World Top Exports។
ចាប់តាំងពីខែកក្កដាមក អាមេរិកនិងចិនបានចាប់ផ្តើមធ្វើសង្គ្រាមពាណិជ្ជកម្ម ដោយដាក់ទណ្ឌកម្មគ្នាទៅវិញទៅមក ហើយរហូតដល់ពេលនេះស្ថានភាពកាន់តែធ្ងន់ធ្ងរឡើង។
ដោយបារម្ភពីបញ្ហាឥទ្ធិពលសង្គ្រាមសេដ្ឋកិច្ចនេះ ក្នុងដំណើរទស្សនកិច្ចរបស់លោក មហាធា ហាមេដ មេដឹកនាំម៉ាឡេស៊ីទៅប្រទេសថៃកាលពីថ្ងៃពុធសប្តាហ៍នេះ មេដឹកនាំទាំងពីរបាន ពិភាក្សាគ្នារកវិធីសាស្ត្រការពារលើបញ្ហាប្រឈមនៃសេដ្ឋកិច្ចនិងសន្តិសុខរបស់អាស៊ាននៅក្នុងតំបន់ និងពិភពលោក។ នេះបើតាមសារព័ត៌មានជប៉ុន Nikkei។
មេដឹកនាំទាំងពីរក៏បានជំរុញឲ្យប្រទេសអាស៊ានទាំងអស់ត្រូវសហការគ្នា ដើម្បីការពារកុំឲ្យរងគ្រោះដោយសារសង្គ្រាមពាណិជ្ជកម្មចិននិងអាមេរិក។
មេដឹកនាំថៃបានស្នើឲ្យបង្កើនការទំនាក់ទំនងក្នុងកម្រិតខ្ពស់បន្ថែមទៀតជាមួយម៉ាឡេស៊ី ដើម្បីរៀបចំផែនការយុទ្ធសាស្ត្រជំរុញល្បឿនសេដ្ឋកិច្ចអភិវឌ្ឍន៍តាមព្រំដែន ភ្ជាប់ការងារធ្វើពាណិជ្ជកម្ម វិនិយោគ និងទេសចរណ៍ជាដើម។
មេដឹកនាំម៉ាឡេស៊ីលោក មហាធា បានយល់ព្រមកសាងស្ពាន ចំនួនពីរបន្ថែមក្នុងការភ្ជាប់ប្រទេសទាំងពីរដើម្បីធ្វើឲ្យមានភាពប្រសើរឡើងក្នុងការធ្វើសកម្មភាព ពាណិជ្ជកម្មបាន២៤ ម៉ោងក្នុង១ថ្ងៃ។
បើពិនិត្យលើការធ្វើពាណិជ្ជកម្មជាមួយចិន គឺថៃនិងម៉ាឡេស៊ីមានការប្រុងប្រយ័ត្នខ្ពស់ក្នុងហេតុផល ប្រហាក់ប្រហែលគ្នាគឺភាពមិនច្បាស់លាស់នៃបំណុល និងអធិបតេយ្យភាពនៃប្រទេស។
កាលពីខែសីហាមេដឹកនាំម៉ាឡេស៊ីបានលុបចោលគម្រោងវិនិយោគរបស់ចិនចំនួន២ក្នុងទឹកប្រាក់ប្រមាណ២០ប៊ីលានដុល្លារ។ ចំណែកថៃក៏បដិសេធយ៉ាងស្ងប់ស្ងាត់ចំពោះគម្រោងរបស់ចិនកសាងផ្លូវដែកល្បឿនលឿន និងជីកផ្លូវទឹកនៅភាគខាងត្បូងនៃប្រទេសថៃ។
អត្ថបទទាក់ទង៖