របាយការណ៍អង្គការWWF-កម្ពុជាបានឲ្យដឹងថា រយៈពេល១០ខែក្នុងឆ្នាំ២០១៨នេះ សត្វ ផ្សោតរបស់កម្ពុជានៅក្នុងទន្លេមេគង្គកើតថ្មីចំនួន៩ក្បាល និងផ្សោតដែលងាប់វិញមាន ចំនួន៥ក្បាល។
តាមសេចក្តីប្រកាសរបស់អង្គការWWF-កម្ពុជា កាលពីម្សិលមិញបានឲ្យដឹងទៀតថា ក្នុងរយៈ ពេលដូចគ្នាកាលពីឆ្នាំ២០១៧គឺចាប់ពីខែមករាដល់ខែតុលា មានផ្សោត កើតឡើង៩ក្បាលដែរ ប៉ុន្តែផ្សោតដែលងាប់មានតែ២ក្បាល។
ទន្ទឹមនឹងការលើកឡើងពីលទ្ធផលល្អដោយសារការប្រឹងរបស់អង្គការWWF-កម្ពុជា និងអាជ្ញាធរ ក្នុងការអភិរក្សសត្វផ្សោត អង្គការនេះក៏បាន ជំរុញភាគីពាក់ព័ន្ធ បន្ថែមការចូល រួមអភិរក្ស។
អង្គការ WWF-កម្ពុជា៖ «បច្ចុប្បន្ន សត្វផ្សោតទន្លេមេគង្គមានចំនួនតែ ៩២ ក្បាលប៉ុណ្ណោះក្នុងទន្លេមេគង្គ។ ចំនួននេះតិចតួចណាស់ បើប្រៀបធៀបទៅនឹងមួយសតវត្សរ៍មុន ដែលចំនួនសត្វផ្សោតទន្លេមេគង្គត្រូវបានគេប៉ាន់ប្រមាណថាមានប្រហែលជា ៣០០០ ក្បាល រស់នៅក្នុងទន្លេមេគង្គ និងបឹងទន្លេសាប។ ជាមួយនឹងចំនួនសត្វផ្សោតដែលនៅសេសសល់តិចតួចនេះ យើងបានប្រឹងប្រែងធ្វើការយ៉ាងខ្លាំង ដើម្បីអភិរក្សប្រភេទសត្វផ្សោតនេះ តាមរយៈការពង្រឹងច្បាប់ឱ្យបានតឹងរឹង កាត់បន្ថយ និងលុបបំបាត់ចោលរាល់ការសកម្មភាពនេសាទខុសច្បាប់នានា ក្នុងតំបន់ការពារសត្វផ្សោត កម្មវិធីលើកកម្ពស់ការយល់ដឹង កម្មវិធីស្រាវជ្រាវ និងត្រួតពិនិត្យ ព្រមទាំងកម្មវិធីផ្តល់ជម្រើសជីវភាពដល់សហគមន៍មូលដ្ឋាន។»
អង្គការនេះលើកឡើងទៀតថា កត្តាគំរាមកំហែងចម្បងលើសត្វផ្សោតទន្លេមេគង្គគឺការ នេសាទខុសច្បាប់ ជាពិសេសគឺ ការប្រើមងក្នុងតំបន់ការពារសត្វផ្សោយ។ ចំណែកគម្រោងវារីអគ្គិសនីថ្មីៗនៅតាមបណ្តោយទន្លេមេគង្គក៏អង្គការនេះចាត់ទុកជា បញ្ហាប្រឈមមួយធំដែរដល់ ការរស់នៅរបស់សត្វផ្សោតទន្លេមេគង្គនិងជីវភាពប្រជាសហគមន៍នៅមូលដ្ឋានទាំងនោះ។
