ក្រុមយុវជន និងអ្នកប្រើប្រាស់បណ្តាញសង្គមមួយចំនួន បានបង្ហាញក្ដីព្រួយបារម្ភថា សុវត្ថិភាពរបស់ពួកគេ ស្ថិតក្រោមការគំរាមកំហែង សម្រាប់ការនិយាយការរិះគន់ចំណុចខ្វះខាតរបស់រដ្ឋាភិបាល និងមន្ត្រីរាជការតាមបណ្ដាញសង្គម។
បន្ទាប់ពីសិក្ខាសាលាស្តីពីសេរីភាពបញ្ចេញមតិនៅក្នុងសម័យឌីជីថល និងបញ្ហាប្រឈមនាថ្ងៃទី២៨ ខែតុលានេះ តំណាងសហគមន៍ភូមិ ២៣ អ្នកស្រី នី សណ្តោស បានថ្លែងថា អ្នកស្រីបានជ្រើសរើសបណ្ដាញសង្គម ដើម្បីរិះគន់ និងបង្ហាញចំណុចខ្វះខាតរបស់រដ្ឋាភិបាល និងមន្ត្រីរាជការមួយចំនួន ដែលមិនយកចិត្តទុកដាក់ជួយដល់ប្រជាពលរដ្ឋ ដែលរងគ្រោះក្នុងជម្លោះដីធ្លី ប៉ុន្តែ អ្នកស្រីតែងបារម្ភពីសុវត្ថិភាព បន្ទាប់ពីអ្នកស្រី បានដឹងថា អ្នករិះគន់រដ្ឋាភិបាល រងការគំរាម និងមានការចាប់ខ្លួនជាដើម។
អ្នកស្រីព្រួយបារម្ភថា៖ «ដំបូងខ្ញុំអត់មានការព្រួយបារម្ភអ្វីទេ ខ្ញុំអត់ដឹងពីសុវត្ថិភាពយ៉ាងម៉េចទេ ប៉ុន្តែ ក្រោយពីមានការគំរាមកំហែង មានការចាប់ខ្លួនរបស់អ្នកបញ្ចេញមតិនៅក្នុងប្រព័ន្ធហ្វេសប៊ុកមានការចាប់គាត់ វាធ្វើឲ្យខ្ញុំមានការព្រួយបារម្ភដែរ នៅពេលដែលខ្ញុំសរសេរព័ត៌មាន ឬខ្ញុំស៊ែរព័ត៌មានខ្លះ។ យើងមានការព្រួយបារម្ភពីសេរីភាពបញ្ចេញមតិរបស់យើងដែលមានការរឹតត្បិត»។
ជនជាតិដើមភាគតិចកាចក់ លោក អាង ប៊ុនគឺត ដែលចូលរួមក្នុងសិក្ខាសាលានោះ បានថ្លែងថា ក្រោយពីអ្នកជំនាញលើកពីរបៀបសរសេរ ឬបង្ហោះឯកសារផ្សេងៗនៅលើបណ្តាញសង្គមត្រូវមានការប្រុងប្រយ័ត្ននោះ លោកថា ជាវិធីមួយជួយឲ្យគាត់ចេះការពារខ្លួនឯងកុំឲ្យរងការចោទប្រកាន់នានាពីសំណាក់អាជ្ញាធរ និងរដ្ឋាភិបាល។
លោក ប៊ុនគឺត អះអាងថា នឹងយកចំណេះដឹងដែលទទួលបានពីការសិក្សា និងអប់រំនេះ ជួយណែនាំដល់ប្រជាសហគមន៍ និងមិត្តភ័ក្តិរបស់លោកឲ្យចេះពីរបៀបប្រើប្រាស់បណ្តាញសង្គម នឹងចេះការពារសុវត្ថិភាពផងដែរ។
លោកថ្លែងថា៖ «បន្ទាប់ពីខ្ញុំចូលរួមកម្មវិធីសេរីភាពនៃការបញ្ចេញមតិសម័យឌីជីថល ខ្ញុំនឹងចែករំលែកព័ត៌មាននេះទៅដល់មិត្តិភ័ក្តិខ្ញុំ ក៏ដូចជាមិត្តភ័ក្តិខ្ញុំផ្ទាល់ ដែលកំពុងរងគ្រោះ ដែលកំពុងត្រូវការជំនាញហ្នឹង ដើម្បីបញ្ចេញមតិ ដើម្បីឲ្យគាត់យល់ដឹងថា តើការបញ្ចេញមតិហ្នឹងបែបណា ដើម្បីជៀសវាងការប្រឈមនឹងការចោទប្រកាន់ពីអ្នកដទៃ»។
ប្រធានមជ្ឈមណ្ឌលទស្សនវិជ្ជា និងសីលធម៌អនុវត្តន៍កម្ពុជា លោក ប៉ា ចន្ទរឿន ថ្លែងថា ទោះជាការបង្ហោះព័ត៌មានលើបណ្តាញសង្គមស្ថិតនៅក្នុងស្ថានភាពហានិភ័យក៏ដោយ លោកថា អ្នកប្រើប្រាស់បណ្តាញសង្គមទាំងអស់ ត្រូវចេះប្រើក្រមសីលធម៌របស់ខ្លួន បង្ហោះព័ត៌មានពីចំណុចល្អរបស់រដ្ឋាភិបាល និងចំណុចខ្វះខាត ដោយថា ដើម្បីឲ្យសង្គមមានការរីកចម្រើន។
លោកមានប្រសាសន៍ថា៖ «យើងត្រូវរៀនទាំងអស់គ្នា រៀនទាំងការសរសើរ កុំសរសើរខ្លាំងពេក លើកជើងរហូតដល់បាក់ជើង ហើយកុំជាន់ខ្លាំងពេករហូតដល់ក្បាលងើបមិនរួច។ រៀនច្បិចយកទិដ្ឋភាពណាមួយដែលល្អ ដែលរដ្ឋាភិបាល បុគ្គលណាមួយ អង្គភាពណាមួយ ធ្វើល្អយកទៅផ្សាយផង ដើម្បីជាគំរូឲ្យអ្នកដទៃទៀតបានឃើញ ហើយជាការលើកទឹកចិត្ត»។
ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា សិទ្ធិសេរីភាពបញ្ចេញមតិតាបណ្តាញសង្គមនៅកម្ពុជា ស្ថិតនៅក្រោមស្ថានភាពហានិភ័យនៅឡើយ។ ករណីនេះ លោកបង្ហាញការព្រួយបារម្ភថា បើរដ្ឋាភិបាលបង្កើតច្បាប់គ្រប់គ្រងឧក្រិតកម្មតាមប្រព័ន្ធអ៊ីនធឺណេត ដោយមិនមានការចូលរួមផ្តល់មតិពីសង្គមស៊ីវិលនិងភាគីពាក់ព័ន្ធទេ លោកបារម្ភថា សេរីភាពបញ្ចេញមតិកាន់តែរួមតូច។
លោកមានប្រសាសន៍ថា៖ «បើសិនជាយើង[រដ្ឋាភិបាល]បង្កើតច្បាប់ឲ្យបាន ហើយក្នុងគោលបំណងបម្រើប្រយោជន៍នយោបាយ វាជះឥទ្ធិពលមិនល្អទេ សម្រាប់សិទ្ធិសេរីភាពបញ្ចេញមតិរបស់ប្រជាពលរដ្ឋ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានជំរុញទៅក្រុមអង្គការសង្គមស៊ីវិល និងប្រជាពលរដ្ឋ កុំឲ្យព្រួយបារម្ភចំពោះការនិយាយរិះគន់មកលើរដ្ឋាភិបាល ប្រសិនបើការរិះគន់នោះ និយាយអំពីការពិត។
ចំណែកឯច្បាប់គ្រប់គ្រង់ឧក្រិដ្ឋកម្មតាមប្រព័ន្ធអ៊ីនធឺណេត លោកថា រដ្ឋាភិបាលគ្រោងបង្កើតឡើងនៅពេលឆាប់ៗខាងមុខនេះ ដើម្បីការពារសុវត្ថិភាពជូនប្រជាពលរដ្ឋ ធ្វើឲ្យប្រទេសមានសន្តិសុខ សណ្តាប់ធ្នាប់ល្អ។ ប៉ុន្តែ លោកថា មុនច្បាប់នេះចូលជាធរមាន រដ្ឋាភិបាលនឹងធ្វើសិក្ខាសាលាពិគ្រោះយោបល់ជាមួយឧត្តមក្រុមប្រឹក្សាអ្នកច្បាប់ អ្នកជំនាញ សង្គមស៊ីវិល និងដៃគូពាក់ព័ន្ធផ្សេងទៀតផងដែរ ដោយថា ដើម្បីឲ្យច្បាប់នោះចេញមកអនុវត្តមានស្តង់ដារល្អ។
លោកមានប្រសាសន៍ថា៖ «បើរដ្ឋាភិបាលធ្វើត្រឹមត្រូវហើយ និយាយឲ្យត្រឹមត្រូវ កុំនិយាយថា មិនត្រឹមត្រូវ មិនត្រូវថាខ្លួនមិនត្រូវម៉េចកើត ចឹងខ្ញុំយល់ថា មិនគួរកើតជំងឺព្រួយបារម្ភ ឬភ័យខ្លាចអ្វីទេ តែបញ្ហាសំខាន់ គឺអនុវត្តឲ្យបានត្រឹមត្រូវទៅតាមការពិតជាក់ស្តែង»។
ក្នុងរបាយការណ៍ស្រាវជ្រាវរបស់ internetworldstats.com បានឲ្យដឹងថា គិតមកដល់ឆ្នាំ២០១៧ អ្នកប្រើប្រាស់បណ្តាញសង្គមហ្វេសប៊ុកនៅកម្ពុជា មានប្រមាណ ៦លាន ៣សែននាក់ ឬប្រហែលនឹង ៣៩ភាគរយ នៃប្រជាជនជាង ១៦លាននាក់នៅទូទាំងប្រទេស។
របាយការណ៍អង្គការ Freedom House ដែលមានមូលដ្ឋាននៅសហរដ្ឋអាមេរិក បានវាយតម្លៃថា សេរីភាពអ៊ិនធឹណិតនៅក្នុងប្រទេសកម្ពុជា បានធ្លាក់ចុះខ្លាំងចាប់តាំងពីឆ្នាំ២០១៦មក បន្ទាប់ពីការបង្ក្រាបទៅលើសកម្មជនបក្សប្រឆាំង និងក្រុមអ្នករិះគន់ ដែលបានប្រើប្រាស់បណ្ដាញសង្គមរិះគន់រដ្ឋាភិបាលដឹកនាំដោយលោកនាយករដ្ឋមន្ត្រី ហ៊ុន សែន រួមទាំងការបិទប្រព័ន្ធផ្សព្វផ្សាយឯករាជ្យមួយចំនួន ដូចជា វិទ្យុ VOD វិទ្យុសំឡេងសហរដ្ឋអាេមរិក VOA វិទ្យុអាស៊ីសេរី និងកាសែតខេមបូឌេលី ជាដើម៕