រដ្ឋាភិបាលចល័តកម្លាំងទ័ព ៤៤០នាក់ ពីបណ្តាខេត្តចំនួន៤ ទៅកាន់ខេត្តកំពង់ឆ្នាំង ដើម្បីចូលរួមក្នុងពិធីរំលឹកខួបបុណ្យឯករាជ្យជាតិ និងថ្ងៃកំណើតកងយោធពលខេមរភូមិន្ទនាដើមខែក្រោយនេះ។
ក្នុងសេចក្តីប្រកាសព័ត៌មានរបស់កងរាជអាវុធលើផ្ទៃប្រទេសចុះផ្សាយកាលពីសប្ដាហ៍មុន កងរាជអាវុធហត្ថលើផ្ទៃប្រទេសបានប្រកាសថា ខ្លួននឹងចល័តទ័ពចំនួន ៤៤០នាក់ ពីបញ្ជាការដ្ឋានកងរាជអាវុធហត្ថខេត្តចំនួន ៤នោះ រួមមាន ខេត្តព្រះសីហនុ កំពង់ស្ពឺ ស្វាយរៀង និងខេត្តសៀមរាប ចូលទៅកាន់មជ្ឈមណ្ឌលហ្វឹកហ្វឺនភ្នំជុំរាយ ស្ថិតនៅក្នុងខេត្តកំពង់ឆ្នាំង ដើម្បីហ្វឹកហាត់ចូលរួមក្នុងពិធីខួបលើកទី៦៥ នៃបុណ្យឯករាជ្យជាតិ និងថ្ងៃកំណើតកងយោធពលខេមរភូមិន្ទ នៅថ្ងៃសុក្រទី០៩ ខែវិច្ឆិកា ឆ្នាំ២០១៨នាពេលខាងមុខ។
សេចក្តីប្រកាសដដែលបញ្ជាក់ថា កម្លាំងទ័ពនឹងធ្វើដំណើរចល័តតាមរថយន្តនៅថ្ងៃទី០១ ខែវិច្ឆិកា ឆ្នាំ២០១៨ ហើយនឹងវិលត្រឡប់ទៅកាន់អង្គភាពវិញនៅថ្ងៃទី១០ ខែវិច្ឆិកា៕
