រដ្ឋាភិបាលប្រកាសអនុវត្តយុទ្ធសាស្ត្រចំនួនប្រាំពីរ ដើម្បីបញ្ចប់អំពើហិង្សាគ្រប់ទម្រង់លើកុមារក្នុងរយៈពេល១២ឆ្នាំខាងមុខ។
ក្នុងសន្និសីទថ្នាក់តំបន់ឆ្ពោះទៅអនុវត្តយុទ្ធសាស្ត្រ INSPIRE ចំនួនប្រាំពីរដែលមានប្រទេសចំនួន ២១ ចូលរួម នាថ្ងៃនេះ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត ថ្លែងថា កម្ពុជានឹងអនុវត្តយុទ្ធសាស្ត្រ INSPIRE ចំនួនប្រាំពីរ ដោយមានការចូលរួមគ្រប់ស្ថាប័នពាក់ព័ន្ធទាំងអស់ ដើម្បីបញ្ចប់អំពើហិង្សាលើកុមារនៅឆ្នាំ២០៣០។
លោកថា៖«ខ្ញុំសូមបង្ហាញចំណាប់អារម្មណ៍ក្នុងការចូលជាសមាជិកនៃប្រទេសជាដៃគូរសកល ដើម្បីលុបបំបាត់លើកុមារ! ជាមួយគ្នានោះដែរ ខ្ញុំសូមស្វាគមន៍ជាមួយភ្នាក់ងារអង្គការសហប្រជាជាតិដៃគូរអភិវឌ្ឍន៍ អន្តរជាតិសង្គមស៊ីវិល វិស័យឯកជន អាជ្ញាធរគ្រប់លំដាប់ថ្នាក់ លោកគ្រូ អ្នកគ្រូ ឪពុកម្ដាយ អាណាព្យាបាល និងកុមារខ្លួនឯង ដែលជាកម្លាំងចលករមិនអាចខ្វះបាន ដើម្បីរួមគ្នាបញ្ចប់អំពើហិង្សាលើកុមារដែលមានចែងនៅក្នុងគោលដៅអភិវឌ្ឍន៍ប្រកបដោយចីរភាព»។
យុទ្ធសាស្ត្រទាំងប្រាំពីរនោះរួមមាន ពង្រឹងការអនុវត្តច្បាប់, បទដ្ឋាននិងគុណតម្លៃ, បរិយាកាសសុវត្ថិភាព,ការគាំទ្រពីឪពុកម្តាយ និងអ្នកថែទាំ, ប្រាក់ចំណូល និងការពង្រឹងសេដ្ឋកិច្ច, ការឆ្លើយតប និងសេវាកម្មគាំទ្រ, ហើយនិងការអប់រំ និងជំនាញជីវិត។
តំណាងអង្គការយូនីសេហ្វប្រចាំប្រទេសកម្ពុជាលោកស្រី Lucia Soleti លើកឡើងថា កាលពីឆ្នាំ២០១៣ អង្គការនេះបានរកឃើញថា កុមារម្នាក់ក្នុងចំណោមពីរនាក់ធ្លាប់ទទួលរងអំពើហិង្សាផ្នែករាយកាយ កុមារម្នាក់ក្នុងចំណោម៤ នាក់ធ្លាប់ទទួលរងអំពើហិង្សាផ្លូវចិត្ត និងមានម្នាក់ក្នុងចំណោម២០ នាក់ធ្លាប់ទទួលរងគ្រោះផ្លូវភេទ។
លោកស្រីថា៖«អ្វីជាអកុសលទៀតនោះអំពើហិង្សាទាំង៣ប្រភេទនេះ គឺកើតឡើងនៅកន្លែងដែលកុមារត្រូវទទួលបានការពារ និងមានសុវត្តិភាពបំផុត ជាពិសេសគឺនៅផ្ទះ នៅសាលារៀន។ បន្ទាប់ពីសិក្សាស្រាវជ្រាវនោះមក ក្រសួងសង្គមកិច្ចរួមទាំងក្រសួង១២ទៀត ដែលមានការគាំទ្រពីយូនីសេហ្វបានស្វែងរកដំណោះស្រាយដោយបានបង្កើតនៅផែនការសកម្មភាពមួយ ដើម្បីធ្វើការរួមគ្នាបញ្ចប់អំពើហិង្សា ហើយយើងបានប្រកាសផែនការសកម្មភាពនេះនៅខែធ្នូ ឆ្នាំ២០១៧កន្លងមកនេះ»។
តាមរបាយការណ៍អង្គការទស្សនៈពិភពលោកចេញផ្សាយកាលពីថ្ងៃទី២០ ខែវិច្ឆិកា ឆ្នាំ២០១៧ ឲ្យដឹងថា កុមារកម្ពុជាដល់ទៅជាង ៧៥ភាគរយ ជួបប្រទះអំពើហិង្សាយ៉ាងហោចណាស់មួយទម្រង់ មុនពេលពួកគេឈានដល់វ័យ ១៨ឆ្នាំ ក្នុងនោះ កុមារកម្ពុជាជាង ៥០ភាគរយរងអំពើហិង្សាលើរាងកាយ ២៥ភាគរយរងអំពើហិង្សាផ្លូវចិត្ត និង ៥ភាគរយទៀត រងអំពើហិង្សាផ្លូវភេទ។