នាយករដ្ឋមន្ត្រីលោក ហ៊ុន សែន បានអំពាវទៅម្ចាស់ផ្ទះជួលទាំងអស់ថា បើចង់ឡើងថ្លៃសូមកុំដំឡើងខ្ពស់ពេក ដោយថាដើម្បីជួយសម្រួលដល់ជីវភាពរបស់កម្មករ ។
កាលពីអំឡុងឃោសនារកសំឡេងឆ្នោតជ្រើសតាំងតំណាងរាស្ត្រនីតិកាលតី៦នេះ នាយករដ្ឋមន្ត្រី និងជាមេដឹកនាំបក្សកាន់អំណាច លោក ហ៊ុន សែន បានអំពាវនាវទៅដល់ម្ចាស់ផ្ទះកុំដំឡើងថ្លៃនៅឆ្នាំ២០១៨។
ក្នុងពិធីជួបសំណេះសំណាលជាមួយកម្មករនៅខេត្តកណ្តាល ព្រឹកថ្ងៃពុធនេះ លោក ហ៊ុន សែន ថ្លែងថារដ្ឋាភិបាលបានខាតបង់ប្រាក់ជាច្រើន ដើម្បីបញ្ចុះតម្លៃទឹក ភ្លើង ជូនពលរដ្ឋ និងកម្មករ។ លោកថា ពិសេសការដំឡើងប្រាក់ឈ្នួលអប្បបរមា សម្រាប់ឆ្នាំ២០១៩ រដ្ឋាភិបាល បានបន្ថែម៥ដុល្លារទៀត ដើម្បីបង្គ្រប់១៨២ដុល្លារក្នុង១ខែ សម្រាប់កម្មករ។
លោកថា៖«ឆ្នាំ២០១៨កន្លងទៅនេះ ម្ចាស់ផ្ទះមិនបានដំឡើងថ្លៃនោះទេ។ ខ្ញុំក៏សុំអំពាវនាវម្ចាស់ផ្ទះទាំងអស់ប្រសិនបើឡើង សុំមេត្តាកុំឡើងខ្លាំងពេកព្រោះជិតដល់ឆ្នាំ២០១៩ បូកទាំងអា២០១៨ អត់បានឡើង ថែមបូកទាំង១៩ទៀត។ ដូច្នេះសុំឲ្យអាជ្ញាធរដែនដីគ្រប់លំដាប់ថ្នាក់ជួយមើលបញ្ហាហ្នឹងផង»។
ទោះជាយ៉ាងណាក្នុងពិធីនោះដែរ លោក ហ៊ុន សែន បានបន្តរំឭកឲ្យក្រសួងសុខាភិបាលបន្តយកចិត្តទុកដាក់ ជំរុញដល់សេវាព្យាបាលឥតបង់ថ្លៃជូនកម្មករ ទាំងក្នុងប្រព័ន្ធ និងក្រៅប្រព័ន្ធ តាមរយៈបេឡាជាតិរបបសន្តិសុខសង្គម ។