មេដឹកនាំបក្សកាន់អំណាចលោក ហ៊ុន សែន ប្រាប់កម្មករកុំឲ្យជឿការឃោសនា ដែលថាសម្ពាធអន្តរជាតិនឹងជំរុញកម្ពុជា ឲ្យជួបវិបត្តិអត់ការងារ ខណៈសភាពអឺរ៉ុបព្រមានដកប្រព័ន្ធអនុគ្រោះពន្ធ ទាក់ទិននឹងកម្តៅនយោបាយ។
សហភាពអឺរ៉ុបនៅដើមខែនេះ បានប្រាប់រដ្ឋាភិបាលម្ពុជាពីវិធានការដកប្រព័ន្ធអនុគ្រោះពន្ធ(EBA)ក្រោយពីរកឃើញថា រដ្ឋាភិបាលមិនព្រមស្តារប្រជាធិបតេយ្យឡើងវិញ តាមលក្ខខណ្ឌរបស់ខ្លួន ដែលបានជំរុញឲ្យបើកផ្លូវឲ្យអតីតគណបក្សប្រឆាំងបានដំណើរការឡើងវិញ ។
លោក ហ៊ុន សែន ក្នុងពិធីជួបសំណេះសំណាលជាមួយកម្មករ នៅខេត្តកណ្តាល នាព្រឹកថ្ងៃពុធនេះ ថ្លែងថា បច្ចុប្បន្នមានមជ្ឈដ្ឋានប្រឆាំងមួយចំនួនឃោសនាថា លោក ហ៊ុន សែន នឹងបន្ធូរបន្ថយស្ថានការណ៍ ក្រោយពីត្រូវមាត់សហគមន៍អន្តរជាតិ។ លោកថា ការឃោសនានេះ ជាការភូតកុហក។
មេដឹកនាំរូបនេះ បញ្ជាក់ថា ឥឡូវនេះកម្ពុជា កំពុងស្ថិតក្នុងស្ថានភាព ដែលត្រូវឈានទៅមុខជាបន្ត គ្មានអ្វីត្រូវព្រួយបារម្ភនោះទេ។
លោកថា៖«ពេលណាដែលក្មួយៗនៅមានការងារធ្វើ នៅតែមានប្រាក់ចំណូល គឺក្មួយៗបន្តទៅ កុំស្តាប់ស្អីតទៅទៀត អារឿងនរណាឃោសនា ជារឿងរបស់គេ។ សូមផ្តាំទៅមនុស្សខ្លះ រង់ចាំទៅអាខ្មោចដែលវាងាប់ហើយ វាមិនអាចរស់ឡើងវិញទេ»។
អតីតអ្នកតំណាងរាស្ត្រគណបក្សប្រឆាំង លោក អ៊ូ ច័ន្ទរ័ត្ន និយាយថា បើរដ្ឋាភិបាលសមេ្រចដើរផ្លូវនេះមែន នឹងជំរុញកម្ពុជា ឲ្យធ្លាក់ក្នុងវិធានការរបស់សហគមន៍អន្តរជាតិ ។ លោកថា ពេលនោះ ពលរដ្ឋកម្ពុជានឹងជួបវិបត្តិការងារ និងបញ្ហាសេដ្ឋកិច្ចធ្ងន់ធ្ងរ ។
លោកថា៖«ពីដើមមកប្រទេសណាក៏អាចទៅមុខរបៀបហ្នឹងដែរ គ្រាន់តែថា បើយើងគិតពីសុខទុក្ខប្រជាពលរដ្ឋមិនគួរទៅទាំងត្រដាបត្រដួសបែបហ្នឹងទេ។ គួរតែជ្រើសរើសយកផ្លូវប្រសើរជាងហ្នឹង ដែលយើងអាចធានាបានពីការអភិវឌ្ឍសង្គមច្បាស់លាស់ យើងអាចធានាបានពីការគោរពសិទ្ធិមនុស្ស និងលទ្ធិប្រជាធិបតេយ្យ ហើយយើងអាចធានាបានពីសុខសន្តិភាពបានយូរអង្វែង។»
ប្រធានសហភាពការងារកម្ពុជា លោក អាត់ ធន់ និយាយថា ក្រុមអ្នកការពារសិទ្ធិកម្មករ នៅតែបារម្ភពីការបាត់បង់ការងាររបស់កម្មករ បើប្រព័ន្ធអនុគ្រោះពន្ធនេះត្រូវបានបាត់បង់ ដោយមិនបានជំនួសយន្តការអ្វីផ្សេង ដើម្បីរក្សាទុកទីផ្សារការងារក្នុងវិស័យកាត់ដេរនោះ។
លោក អាត់ ធន់ និយាយទៀតថា ប្រព័ន្ធអនុគ្រោះពន្ធនេះ បានផ្តល់ប្រាក់ចំណូលដល់កម្មករក្នុងវិស័យកាត់ដេរជាង៨០ម៉ឺននាក់ និងពលរដ្ឋជាង២លាននាក់ផ្សេងទៀត ទទួលផលដោយប្រយោលទៀតផង។
លោកថា៖«ការងាររាល់ថ្ងៃបើតាមយើងដឹង កម្មករប្រហែលជាជាង៨០ម៉ឺននាក់ ជាអ្នកទទួលបានប្រាក់ចំណូលផ្ទាល់ដែលមានប្រាក់ប្រហែលជាចន្លោះពី១៣០០ទៅ១៥០០ រយលានដុល្លារក្នុង១ឆ្នាំ ហើយចំនួនលុយនេះវាបានជះឥទ្ធិពលទៅដល់គ្រួសារ ដល់អ្នកលក់ដូរដែលជាអ្នកទទួលផលមិនផ្ទាល់ផ្សេងទៀតប្រហែលជា២លាននាក់ផ្សេងទៀត។ អញ្ចឹងច្រើនដែរ! »
កាលពីថ្ងៃទី២០ ខែតុលានេះ សមាគមរោងចក្រកាត់ដេរកម្ពុជា GMAC បានដាក់លិខិតស្នើសហភាពអឺរ៉ុប ឲ្យពិចារណាឡើងឡើងវិញពីវិធានការនេះ ដោយ GMACបង្ហាញការព្រួយបារម្ភថា ការដកប្រព័ន្ធអនុគ្រោះពន្ធពីកម្ពុជានឹងធ្វើឲ្យប៉ះពាល់ដល់កម្មករជាង៧០ម៉ឺននាក់រយៈពេលវែង និងគ្រួសាររបស់ពួកគេ។
ប្រព័ន្ធអនុគ្រោះពន្ធ របស់សហភាពអឺរ៉ុប បានភ្ជាប់លក្ខខណ្ឌ គោរពសិទ្ធិមនុស្ស និងលទ្ធិប្រជាធិបតេយ្យ ហើយវិធានការរបស់ហភាពអឺរ៉ុបនេះ ធ្វើឡើងក្រោយពីការទាមទារជិត១ឆ្នាំមកនេះ គណបក្សប្រឆាំង នៅតែត្រូវបានគេផាត់ចេញពីឆាកនយោបាយ។
របាយការណ៍របស់គណៈកម្មការអឺរ៉ុប ចេញផ្សាយកាលពីខែមេសាកន្លងទៅ បង្ហាញថា កម្ពុជាបាននាំចេញទំនិញទៅសហគមន៍អឺរ៉ុបក្នុងឆ្នាំ២០១៧ មានទំហំជាសាច់ប្រាក់ជាង៦ពាន់លានដុល្លារ។ទំនិញទាំងនោះភាគច្រើនជាផលិតផលសម្លៀកបំពាក់កាត់ដេរ ហើយក្នុងលក្ខខណ្ឌ EBA កម្ពុជាទទួលបានផលចំនេញដោយមិនបង់ពន្ធជិត៧រយលានដុល្លារ។
