មន្ត្រីតុលាការខេត្តកំពង់ចាម បានឲ្យដឹងថា តុលាការខេត្តនេះ បានសម្រេចដោះលែងអគ្គនាយកទូរទស្សន៍អនឡាញ TNM លោក សែម បូរ៉ា វិញ ប៉ុន្តែ ត្រូវបានដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការនិងសមត្ថកិច្ច បន្ទាប់ពីសមត្ថកិច្ចចាប់ខ្លួនលោក។
អ្នកនាំពាក្យសាលាដំបូងខេត្តកំពង់ចាម លោក ជុំ ណារ៉ាន់ ប្រាប់វីអូឌីនៅថ្ងៃនេះថា ចៅក្រមស៊ើបសួរបានសម្រេចមិនធ្វើការឃុំខ្លួនលោក សែម បូរ៉ា នោះទេ ប៉ុន្តែ លោកថា តុលាការតម្រូវឲ្យអ្នកកាសែតរូបនេះ ទៅបង្ហាញខ្លួនទៅតាមការកោះហៅរបស់តុលាការ និងត្រូវទៅបង្ហាញខ្លួននៅប៉ុស្តិ៍នគរបាលជាប់ទីលំនៅនៅរៀងរាល់ខែ។
នៅពេលសាកសួរអំពីមូលហេតុនៃការដោះលែងអ្នកកាសែតរូបនេះ ឲ្យនៅក្រៅឃុំនោះ អ្នកនាំពាក្យសាលាដំបូងខេត្តកំពង់ចាមរូបនេះ សុំមិនធ្វើអត្ថាធិប្បាយលម្អិតនោះឡើយ។
លោក ជុំ ណារ៉ាន់ ប្រាប់ថា៖ «អាហ្នឹង យើងដាក់ឲ្យនៅក្រោមការត្រួតពិនិត្យ អាហ្នឹងដូចជាឲ្យនៅក្រៅឃុំបណ្ដោះអាសន្នអញ្ចឹង។ ខ្ញុំមិនអាចឆ្លើយបានទេ អាហ្នឹង វាអាស្រ័យលើចៅក្រមស៊ើបសួរទេ។ អាហ្នឹង កិច្ចការខ្ញុំបានតែប៉ុណ្ណឹងទេ»។
អគ្គនាយកទូរទស្សន៍អនឡាញ TNM លោក សែម បូរ៉ា ត្រូវបានស្នងការនគរបាលខេត្តកំពង់ចាមចាប់ខ្លួនកាលពីថ្ងៃទី២៦ ខែតុលាកន្លងមកនេះ បន្ទាប់ពីរងបណ្ដឹងចោទថា បានឆបោកប្រាក់នៅក្នុងជំនួញដីធ្លីមានតម្លៃជិត៣០ម៉ឺនដុល្លារជាមួយពលរដ្ឋ៨គ្រួសារនៅឯឃុំសំបូរ ស្ថិតក្នុងស្រុកបាធាយ។
វីអូឌីមិនអាចសុំការអត្ថាធិប្បាយពីលោក សែម បូរ៉ា បានទេ ប៉ុន្តែ និពន្ធនាយកសារព័ត៌មាន TNM លោក ម៉ែន សុជាតា ថ្លែងថា លោក សែម បូរ៉ា បានដាក់តម្កល់ប្លង់ផ្ទះ ដើម្បីបាននៅក្រៅឃុំ។ លោកចាត់ទុកករណីប្រឆាំងលោក សែម បូរ៉ា ថា ធ្វើឡើងតក់ប្រហល់។
លោក ម៉ែន សុជាតា មានប្រសាសន៍ថា៖ «សមត្ថកិច្ចហាក់បានចាត់វិធានការលឿនពេក។ នេះខ្ញុំនិយាយទាក់ទងរឿងប្រឆាំងលោក សែម បូរ៉ា នៅកំពង់ចាម»។
ដើមបណ្ដឹង លោក ទេព ភារម្យ ប្រាប់វីអូឌីនៅថ្ងៃនេះថា លោក និងប្រជាពលរដ្ឋ ២គ្រួសារទៀត បានប្ដឹងអគ្គនាយកទូរទស្សន៍អនឡាញ TNM ដើម្បីទាមទារឲ្យលោក សែម បូរ៉ា ប្រគល់ដី និងសងប្រាក់ទៅឲ្យពួកគាត់វិញតែប៉ុណ្ណោះ ដោយថា លោកមិនចង់ឲ្យតុលាការចាប់លោក សែម បូរ៉ា ដាក់ពន្ធនាគារ។ លោកបន្តថា ប្រាក់ដែលលោកប្ដឹងទាមទារពីលោក សែម បូរ៉ា មានចំនួនជិត ៣០ ម៉ឺនដុល្លារ។
លោកថា៖ «ពូចង់បានដីរបស់ពូដែលបានទិញពីលោក សែម បូរ៉ា នោះទេ ពូមិនចង់បានអី យកមនុស្សដាក់គុក ឬយកមនុស្សដាក់ច្រវាក់អីទេ។ ទី១ ពូចង់បានដីដែលទិញពី បូរ៉ា ហើយអ្នកម្ចាស់លុយក៏ពូប្រាប់គេដែរ យើងយកមនុស្សដាក់គុកធ្វើអី ឲ្យមនុស្សនៅក្រៅឃុំទៅ គ្នារកលុយមកឲ្យយើងវិញទៅ។ ដល់ពេលនេះ តុលាការធ្វើអញ្ចឹងមែន ពូក៏សប្បាយចិត្តដែរ ពេលដែលគេចេញវិញនេះ ពូសប្បាយដែរតើ!»។
ប្រធានក្លឹបអ្នកកាសែតកម្ពុជា លោក ប៉ែន បូណា យល់ថា ករណីចាប់ខ្លួនអគ្គនាយកស្ថាប័នសារព័ត៌មាន TNM មិនពាក់ព័ន្ធនឹងការប្រតិបត្តិវិជ្ជាជីវៈសារព័ត៌មាននោះឡើយ ហើយលោកថា វាពាក់ព័ន្ធនឹងរឿងឯកជនរបស់បុគ្គលតែប៉ុណ្ណោះ។
លោកថា៖ «អញ្ចឹង វាខុសគ្នាណាស់ បើសិនជាអូខេ ចុះទៅរឿងយកព័ត៌មានហើយអ្នកណាគំរាមកំហែង ចាប់ខ្លួនដោយសារគាត់ធ្វើព័ត៌មានឬមួយគាត់ចុះទៅយកព័ត៌មាន អាហ្នឹង វាពាក់ព័ន្ធវិស័យសារព័ត៌មាន ប៉ុន្តែ លោក សែម បូរ៉ា យើងឃើញទាំងអស់គ្នាមិនមែនទេ គឺរឿងដីធ្លីអញ្ចឹងណាស់»។
អ្នកកាសែត២រូបរបស់ស្ថាប័នសារព័ត៌មានអនឡាញ TNM ប្រចាំខេត្តពោធិ៍សាត់ ក៏ត្រូវបានសមត្ថកិច្ចចាប់ខ្លួនផងដែរកាលពីថ្ងៃទី១៧ ខែកញ្ញា អំឡុងពេលពួកគេចុះទៅចុះយកព័ត៌មានអំពីការឈូសឆាយដីព្រៃពីសំណាក់ក្រុមហ៊ុន ទ្រី ភាព នៅឃុំថ្មបាំង ស្រុកវាលវែង ខេត្តពោធិ៍សាត់។
អ្នកកាសែតទាំង ២រូបនោះ ត្រូវបានក្រុមហ៊ុនលោកឧកញ៉ា ទ្រី ភាព ប្ដឹងចោទថា បានញុះញង់និងផ្សាយព័ត៌មានមិនពិត ប៉ុន្តែ ត្រូវបានដោះលែងវិញមួយថ្ងៃក្រោយការចាប់ខ្លួន។
ចំណែកឯអ្នកកាសែតមួយរូបទៀតរបស់ស្ថាប័នសារព័ត៌មាន TNM ប្រចាំនៅខេត្តមណ្ឌលគិរី ក៏ត្រូវបានតុលាការខេត្តនេះកោះហៅផងដែរកាលពីថ្ងៃទី១២ ខែកញ្ញាកន្លងមកនេះ បន្ទាប់ពីប្រធានការិយាល័យដែនជម្រកសត្វព្រៃកែវសីមា លោក ឌិន ប៊ុនធៀន បានប្ដឹងចោទថា បានបរិហារកេរ្តិ៍ជាសាធារណៈ៕
