ក្រុមហ៊ុនចិនមួយគ្រោងវិនិយោគលើការកែច្នៃសំរាមទៅជាថាមពលអគ្គិសនីនៅខេត្តចំនួនពីរក្នុងប្រទេសកម្ពុជា ខណៈទីលានចាក់សំរាមចាស់ស្ទឹងមានជ័យនិងនៅបឹងជើងឯកក្នុងរាជធានីភ្នំពេញ នៅមិនទាន់រកឃើញដៃគូវិនិយោគដែលមានលក្ខណៈសម្បត្តិគ្រប់គ្រាន់នៅឡើយ។
តាមសេចក្តីប្រកាសព័ត៌មានរបស់ក្រសួងបរិស្ថានកាលពីថ្ងៃទី២៦ ខែតុលា ឆ្នាំ២០១៨ បានឲ្យដឹងថា តំណាងក្រុមហ៊ុនចិនឈ្មោះ Shandong Wangeng Energy Technology Co.,LTD បានជួបជាមួយ លោក សាយ សំអាល់ រដ្ឋមន្ត្រីក្រសួងបរិស្ថានកាលពីថ្ងៃទី២៥ ខែតុលា ដើម្បីពិភាក្សាការងារអំពីការវិនិយោគលើការកែច្នៃសំរាមទៅជាថាមពលអគ្គិសនីនៅខេត្តចំនួនពីរគឺខេត្តសៀមរាប និងខេត្តព្រះសីហនុ។
អ្នកនាំពាក្យក្រសួងបរិស្ថាន លោក នេត ភក្រ្តា មានប្រសាសន៍ថា អំឡុងជំនួបពិភាក្សាការងារនេះ លោក សាយ សំអាល់ បានស្តាប់បទបង្ហាញរបស់តំណាងក្រុមហ៊ុន Shandong Wangeng Energy Technology Co.,LTD ជាក្រុមហ៊ុនមកពីប្រទេសចិននិងមានបទពិសោធន៍លើការងារផលិតចរន្តអគ្គិសនីដោយការដុតសំរាម ហើយថា ក្រសួងគាំទ្រគម្រោងរបស់ក្រុមហ៊ុនចិនដែលបានលើកឡើងនេះ។
លោក ភក្រ្តា បានមានប្រសាសន៍ថា៖ «យើងគាំទ្រគំនិតនេះ ដោយសារតែបញ្ហាសំខាន់គឺការប្រើប្រាស់សំរាមមកដុតនេះ គឺជាផ្នែកមួយជួយកាត់បន្ថយនូវទំហំនៃសំរាមនៅក្នុងប្រទេសកម្ពុជារបស់យើង»។
ក្រុមហ៊ុនគ្រោងចំណាយថវិកាជាង៨០លានដុល្លារលើគម្រោងវិនិយោគដុតសំរាមផលិតជាចរន្តអគ្គិសនីក្នុងខេត្តទាំងពីរ នេះបើតាមការលើកឡើងរបស់អ្នកនាំពាក្យរូបនេះ។
លោក ភក្រ្តា បានបន្ថែមថា ប្រសិនបើគម្រោងវិនិយោគនេះលេចចេញជារូបរាងមែន កម្ពុជាអាចទទួលបានផលប្រយោជន៍ពីការវិនិយោគ ដោយអាចកាត់បន្ថយការយកសំរាមទៅបោះចោលដោយគ្មានប្រយោជន៍ និងអាចជួយសម្អាតបរិស្ថានព្រមទាំងការពារបរិស្ថានមិនឲ្យមានសំរាមរាយប៉ាយ។
លោក ភក្រ្តា មានប្រសាសន៍ថា៖ «បើសិនជាយើងមានការវិនិយោគនេះឡើង គឺវាអាចជួយកាត់បន្ថយនូវអត្រាសំរាមយកទៅបោះចោល ហើយយើងអាចនឹងទាញយកផលពីសំរាមទាំងអស់នេះ»។
ទោះបីជាយ៉ាងណាលោក នេត ភក្ត្រា បានបញ្ជាក់ថា លោកមិនអាចកំណត់ពេលវេលាជាក់លាក់ថា គម្រោងនេះនឹងលេចចេញជារូបរាងនៅពេលណានោះទេ ដោយសារក្រសួងត្រូវការពេលវេលា ដើម្បីសិក្សាពិនិត្យលម្អិតសិន ថាតើគម្រោងនេះវាមានផលប៉ះពាល់យ៉ាងណាខ្លះ ហើយថា ការយកសំរាមមកដុតធ្វើជាអគ្គិសនី គឺត្រូវគោរពទៅតាមបទដ្ឋាននៃបច្ចេកទេស ដើម្បីកុំឲ្យមានផលប៉ះពាល់។
អាជ្ញាធររាជធានីភ្នំពេញបានបិទទីលានចាក់សំរាមដំបូងបង្អស់របស់ខ្លួននៅសង្កាត់ស្ទឹងមានជ័យ២ ខណ្ឌមានជ័យ កាលពីឆ្នាំ២០០៩ និងបានផ្ទេរទៅប្រើប្រាស់ទីលានចាក់សំរាមជើងឯកនៅលើផ្ទៃដី៣៤ហិកតា ស្ថិតនៅសង្កាត់ជើងឯក ខណ្ឌដង្កោ ដែលជាទីលានចាក់សំរាមថ្មីហើយមកទល់ពេលនេះ ផ្នែកខ្លះនៃទីលានថ្មីនេះចាប់ផ្តើមពេញរួចទៅហើយនោះ។
លោក ម៉េត មាសភក្តី ជាអ្នកនាំពាក្យសាលារាជធានីភ្នំពេញបានមានប្រសាសន៍ថា កន្លងមកមានក្រុមហ៊ុនឯកជនជាច្រើនបានធ្វើបទបង្ហាញពីសក្ដានុពលរបស់ខ្លួនឬពីគោលបំណងក្នុងការវិនិយោគកែច្នៃសំរាមនៅទីតាំងទាំងពីរនេះ ប៉ុន្តែដោយសារនេះគឺជាកិច្ចការងារសំខាន់ ដូច្នេះ ក្រុមហ៊ុនទាំងនោះបានត្រឹមសិក្សា ហើយរហូតមកទល់ពេលនេះមិនទាន់មានក្រុមហ៊ុនណាមួយមានលក្ខណៈសម្បត្តិគ្រប់គ្រាន់ ដើម្បីវិនិយោគពិតប្រាកដលើគំនរសំរាមទាំងពីរកន្លែងនេះនៅឡើយ។
លោក មាសភក្តី មានប្រសាសន៍ថា៖ «សរុបមកថា មិនមានក្រុមហ៊ុនណាដែលមានលក្ខណៈសម្បត្តិសមស្រប គ្រប់គ្រាន់ល្អ ដែលអាចធ្វើការវិនិយោគលើរឿងហ្នឹង»។
លោកបន្ថែមថា ស្របពេលកំណើនសំរាមបន្តកើនឡើងពីមួយថ្ងៃទៅមួយថ្ងៃទៅតាមកំណើនរបស់ប្រជាពលរដ្ឋ បញ្ហាសំរាមនៅតែជាកង្វល់មួយដែលត្រូវការគិតគូរនិងយកចិត្តទុកដាក់រកដំណោះស្រាយតាំងពីទីលានស្តុកសំរាម ការវិចខ្ចប់និងការប្រមូលជាដើម ហើយថា អាជ្ញាធររាជធានីកំពុងគិតគូរពីបញ្ហានេះនិងបន្តស្វាគមន៍បណ្តាក្រុមហ៊ុនដែលមានបំណងវិនិយោគលើកិច្ចការទាំងអស់នេះ។
លោក មាសភក្តី មានប្រសាន៍ថា៖ «នេះគឺជាកិច្ចការល្អ។ បើយើងមានលទ្ធភាពមួយដែលយើងត្រូវប្រើសំរាមរបស់យើងឲ្យកើតទៅជាប្រយោជន៍ រឿងអីយើងមិនធ្វើរឿងហ្នឹង»។
នាយកប្រតិបត្តិនៃអង្គការសមាគមធាងត្នោត លោក សឿង សារ៉ន បានមានប្រសាសន៍ថា តាមរយៈការជួបផ្ទាល់ជាមួយប្រជាពលរដ្ឋដែលរស់នៅសហគមន៍ក្បែរទីលានចាក់សំរាមនោះ លោកទទួលបានព័ត៌មាននិងការត្អូញត្អែររបស់ពួកគាត់អំពីក្លិនសំរាមនិងផលប៉ះពាល់ដល់សុខភាពរបស់ពួកគាត់ ជាពិសេសកុមារនិងស្ត្រីដែលពួកគាត់ចំណាយពេលភាគច្រើននៅផ្ទះ។
លោក សារ៉ន បានមានប្រសាសន៍ថា៖ «ប៉ុន្តែនៅភ្នំពេញវិញ យើងគួរពិចារណាឲ្យមានការធ្វើកែច្នៃសំរាមយ៉ាងណាឲ្យលឿន ដើម្បីបំបាត់ក្លិនស្អុយនិងផលប៉ះពាល់ដល់សុខភាពរបស់ប្រជាពលរដ្ឋ»។
ទាក់ទិននឹងគម្រោងវិនិយោគរបស់ក្រុមហ៊ុន Shandong លោកមានប្រសាសន៍ថា ក្នុងនាមអង្គការសង្គមស៊ីវិល លោកគាំទ្រគំនិតផ្តួចផ្តើមវិនិយោគបែបនេះ ប៉ុន្តែអាជ្ញាធរនិងក្រុមហ៊ុនដែលពាក់ព័ន្ធត្រូវសិក្សាឲ្យបានច្បាស់លាស់ថា តើការដុតសំរាម ដើម្បីផលិតជាអគ្គិសនីមានផលប៉ះពាល់តិចឬក៏ច្រើនលើបរិស្ថាន ហើយកន្លងមកលោកសង្កេតឃើញថា គម្រោងអភិវឌ្ឍមួយចំនួនមិនសូវមានការសិក្សាឲ្យបានច្បាស់លាស់ទេ។
លោក សារ៉ន បានបន្ថែមថា៖ «យើងអាចមើលគំរូថា តើប្រទេសណាខ្លះហើយដែលគេធ្វើបែបហ្នឹង។ ជោគជ័យឬបរាជ័យ?។ អាហ្នឹងគឺជាចំណុចមួយដែលយើងត្រូវការរៀនសូត្រ កុំឲ្យយកប្រទេសកម្ពុជាយើងជាកន្លែងដែលតេស្តនូវតិចណូឡូជីឬបច្ចេកវិទ្យាហ្នឹង»។
សំរាមដែលកើតចេញពីការប្រើប្រាស់នៅទូទាំងប្រទេសកម្ពុជាគឺមានប្រមាណ១ម៉ឺនតោនក្នុងមួយថ្ងៃ ហើយសម្រាប់រាជធានីភ្នំពេញគឺមានប្រមាណ៣០០០តោនក្នុងមួយថ្ងៃ ខេត្តព្រះសីហនុគឺមានចន្លោះពី៥០០តោនទៅ៦០០តោនក្នុងមួយថ្ងៃនិងខេត្តសៀមរាបមានពី៣៥០តោនទៅ៤០០តោនក្នុងមួយថ្ងៃ។