រដ្ឋាភិបាលកម្ពុជា បានសម្រេចយក ខែឧសភា ឆ្នាំក្រោយនេះ សម្រាប់បោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ បើទោះបីសហគមន៍អន្តរជាតិទាមទារឲ្យស្តារប្រជាធិបតេយ្យឡើងវិញ តាមរយៈការបង្កបរិយាកាសឲ្យគណបក្សប្រឆាំងដែលបានរំលាយទៅហើយនោះបានដំណើរឡើងវិញក៏ដោយ។
សេចក្តីសម្រេចចុះថ្ងៃទី៣០ ខែតុលា ឆ្នាំ២០១៨ នាយករដ្ឋមន្ត្រីកម្ពុជា និងជាមេដឹកនាំគណបក្សកាន់អំណាច លោក ហ៊ុន សែន បានប្រកាសថាការបោះឆ្នោតអសកលដែលមានតែក្រុមប្រឹក្សាឃុំសង្កាត់ជាអង្គបោះឆ្នោត នឹងត្រូវធ្វើឡើងនៅថ្ងៃអាទិត្យទី ២៦ ខែឧសភា ឆ្នាំ២០១៩ ។
អតីតគណបក្សសង្គ្រោះជាតិត្រូវតុលាការកំពូលប្រកាសរំលាយកាលពីចុងឆ្នាំ២០១៧ តាមបណ្តឹងរដ្ឋាភិបាល។ ក្រោយរំលាយនេះ អាសនៈក្រុមប្រឹក្សាឃុំ សង្កាត់ ដែលជាប់ឆ្នោតឆ្នាំ២០១៧ ប្រហាក់ប្រហែលទៅនឹងគណបក្សកាន់អំណាចចំនួន៥០០៧ ត្រូវបានរឹបអូស។
ករណីនេះជំរុញឲ្យសហគមន៍អន្តរជាតិមាន សហរដ្ឋអាមេរិក សហភាពអឺរ៉ុប និងសហភាពអន្តរសភា(IPU)ផងដែរ ទាមទារទៅ បក្សកាន់អំណាចកម្ពុជា បើកផ្លូវឲ្យអតីតគណបក្សប្រឆាំង បានដំណើរការឡើងវិញ ។
ជាងនេះទៅទៀត សហរដ្ឋអាមេរិក កាលពីខែសីហា បានគំរាមពង្រីកទណ្ឌកម្មទិដ្ឋាការ និងបង្កកទ្រព្យសម្បត្តិ ដល់មន្ត្រីរដ្ឋាភិបាលមួយចំនួន និងប្រកាសមិនទទួលស្គាល់លទ្ធផលបោះឆ្នោតថ្ងៃទី២៩កក្កដា។ សហភាពអឺរ៉ុបវិញ បានគំរាមដកប្រព័ន្ធអនុគ្រោះពន្ធ«គ្រប់យ៉ាងលើកលែងតែអាវុធ»ពីកម្ពុជាទៀតផង។
អតីតតំណាងរាស្ត្រគណបក្សប្រឆាំងលោក អ៊ូ ច័ន្ធរ័ត្ន ហៅចរន្តនយោបាយពេលនេះថា ហាក់ផ្គើនទៅនឹងអនុសាសន៍របស់សហគមន៍អន្តរជាតិ។ លោកថាជម្រើសបែបនេះ មិនបានជួយការពារប្រយោជន៍ជាតិទេ។
លោកថា៖«បើសិនជាលោកអាចសម្របខ្លួនទៅតាមអនុសាសន៍របស់សហភាពអឺរ៉ុប ឬ IPUក្តី ដែលគេដាក់មកឲ្យហ្នឹងអាហ្នឹងវា សម្រាប់ប្រយោជន៍ជាតិទាំងមូលហើយ។ ទី១ បានប្រយោជន៍សម្រាប់ការផ្សះផ្សាជាតិ រឹងមាំមួយ។ ហើយទី២ យើងបានប្រយោជន៍សេដ្ឋកិច្ច។ ហើយយើងបានមុខមាត់លើឆាកអន្តរជាតិផ្នែកនយោបាយទៀត មានន័យថាយើងជាប្រទេសមួយដែលជាប្រទេស ដែលក្លាហាន អាចកែលំអរ ដើម្បីទទួលយកប្រជាធិបតេយ្យពិតប្រាកដ»។
អ្នកវិភាគវ័យក្មេង កញ្ញា លី ស្រីស្រស់ ហៅរបត់នយោបាយពេលនេះថា បានដើរបញ្ច្រាសទិសនៃចរន្តពិភពលោក ដោយថា ពិភពលោកជំរុញឲ្យថយក្រោយដើម្បីស្តារស្ថានការណ៍ តែមេដឹកនាំកម្ពុជាបែជាបន្តទៅមុខដោយអះអាងថាខ្លួនកំពុងដើរលើផ្លូវត្រូវ។
អ្នកវិភាគវ័យក្មេងរូបនេះ បន្តថា ចរន្តនយោបាយបែបនេះ នឹងជំរុញវិស័យការទូតរបស់កម្ពុជាឲ្យបន្តធ្លាក់ចុះ ហើយថាទីបំផុត កម្ពុជានឹងខាតបង់ផលប្រយោជន៍ ដោយថាដង្ហើមសេដ្ឋកិច្ច និងទីផ្សារការងារនៅពឹងផ្នែកលើប្រទេសលោកសេរីនៅឡើយ។
លោកថា៖«ព្រោះថា សេដ្ឋកិច្ចយើងពឹងផ្អែកខ្លាំងទៅលើទីផ្សារអឺរ៉ុបដែរ។ អញ្ចឹង រដ្ឋាភិបាលគួរតែពិចារណាឡើងវិញ ពីដំណើររបស់ខ្លួនដែលកំពុងឆ្ពោះទៅ។ព្រោះថា សព្វថ្ងៃនេះគាត់ទៅ ដើម្បីរៀបចំប្រព័ន្ធរដ្ឋបាល[កម្ពុជា] ប៉ុន្តែបញ្ហាខាងនោះ អត់ទាន់ដោះស្រាយទេ។ អញ្ចឹងធ្វើឲ្យប៉ះពាល់នូវអ្វីដែលគាត់កំពុងតែដើរទៅហ្នឹងដែរ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ថាការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ ខាងមុខធ្វើឡើងស្របតាមច្បាប់កម្ពុជា ហើយលោកថាមិនខ្វល់ពីការរិះគន់ឬសម្ពាធណាមួយនោះទេ។
លោកលើកឡើងថា៖«វាគ្មានឥទ្ធិពលពីខាងណាមកទេ អាហ្នឹងតែដល់ម៉ោងគេ គេបោះហើយដូចតំណាងរាស្ត្រ។ អញ្ចឹង៥ឆ្នាំគត់គេបោះៗទោះអ្ហែងថាម៉េចក៏ដោយ។ វាមិនចេះតែតម្រូវចិត្តបានទេ ព្រោះកម្មវិធីមានចែងក្នុងច្បាប់រួចហើយ»។
យ៉ាងណាក៏ដោយរដ្ឋាភិបាលកម្ពុជាធ្លាប់ព្រមាន តាមរយៈលិខិតបំភ្លឺទៅសហភាពអន្តរសភា IPU កាលពីថ្ងៃទី២៦ ខែតុលាកន្លងទៅថា កម្ពុជានឹងពិចារណាដកបេក្ខភាពពីស្ថាប័នអន្តរជាតិវិញ បើមានការរំលោភបំពានធ្ងន់ធ្ងរលើអធិបតេយ្យភាពរបស់កម្ពុជា៕