ស្នងការនគរបាលខេត្ដព្រះសីហនុ លោក ជួន ណារិន ឲ្យដឹងថា សមត្ថកិច្ចកំពុងស្វែងរកចាប់ខ្លួនបុរសជាអ្នកបើកម៉ូតូកង់បីម្នាក់ ដែលកំពុងរត់គេចខ្លួន ក្រោយពីបង្កអគ្គិភ័យលើផ្ទះលក់សាំងមួយកន្លែងនៅក្រុងព្រះសីហនុនៅព្រឹកថ្ងៃនេះ បណ្ដាលឲ្យខូចខាតរថយន្ត ៤គ្រឿង និងម៉ូតូកង់បី ១គ្រឿង។
លោក ជួន ណារិន ឲ្យ VOD ដឹងថា នៅវេលាម៉ោង១១ព្រឹកថ្ងៃនេះ ផ្ទះលក់សាំងមួយកន្លែង ដែលមានទីតាំងស្ថិតនៅមុខផ្សារលើ សង្កាត់លេខ៤ ក្រុងព្រះសីហនុ ត្រូវបានភ្លើងឆាបឆេះឡើង និងបណ្ដាលឲ្យខូចខាតរថយន្ដដែលចតនៅក្បែរនោះ ប៉ុន្ដែលោកថា ក្រុមពន្លត់អគ្គិភ័យ បានព្យាយាមពន្លត់បានទៅវិញនៅម៉ោង ១២ថ្ងៃត្រង់។
លោកបន្ដថា អគ្គិភ័យនេះបង្កឡើងដោយម្ចាស់ម៉ូតូកង់បី ដែលបានទៅចាក់សាំងនៅទីនោះ ហើយបានជក់បារី និងបង្កឲ្យមានភ្លើងឆាបឆេះឡើង។
លោកបន្ដថា៖ «តូបហ្នឹងរបៀបលក់សាំងកាដុងសាំងអីហ្នឹង។ មានពូម៉ូតូកង់បីមួយ គាត់ទៅចាក់សាំងនៅហ្នុង ដល់ចាក់ទៅគាត់ធ្វេសប្រហែស គាត់ជក់បារី ដល់ជក់បារីទៅវាមានការឆាបឆេះ ហើយកាណុងវាធ្លាយហូរពីលើមក។ វាមានទួល អាឡានឯកជនគេ RX300 បួនគ្រឿង […] ចតនៅក្បែរៗហ្នឹងទៅ ក៏ឆាបឆេះអស់បួនគ្រឿងទៅ»។
ស្នងការនគរបាលខេត្ដព្រះសីហនុ លោក ជួន ណារិន បញ្ជាក់ថា អគ្គិភ័យនេះបានឆាបឆេះដល់រថយន្ដចំនួន ៤គ្រឿង និងម៉ូតូកង់បីមួយគ្រឿង ហើយថា សមត្ថកិច្ចកំពុងតាមរកម្ចាស់ម៉ូតូកង់បីដែលថា ជាជនបង្កហេតុ៕
