រដ្ឋមន្ត្រីមហាផ្ទៃ លោក ស ខេង បានអះអាងថា គ្រោះថ្នាក់ចរាចរណ៍បានសម្លាប់ពលរដ្ឋកម្ពុជាជាមធ្យមជាង ៥នាក់ក្នុងមួយថ្ងៃ ហើយលោកបានបន្ទោសបញ្ហានេះ ទៅលើការបើកបរធ្វេសប្រហែស និងការបំពានច្បាប់ចរាចរណ៍។
ក្នុងទិវាអន្តរជាតិរម្លឹកដល់ជនរងគ្រោះដោយគ្រោះថ្នាក់ចរាចរណ៍លើកទី១៣ ដែលធ្វើឡើងនៅស្រុកបាកាន ខេត្តពោធិ៍សាត់ កាលពីថ្ងៃម្សិលមិញ រដ្ឋមន្រ្ដីក្រសួងមហាផ្ទៃ និងជាប្រធានគណ:កម្មាធិការជាតិសុវត្ថិភាពចរាចរផ្លូវគោក លោក ស ខេង មានប្រសាសន៍ថា មនុស្សដល់ទៅ ១៩៧៦នាក់ ត្រូវបានសម្លាប់ និងមនុស្ស ៤ ៨៧០នាក់ទៀត បានរងរបួស នៅក្នុងគ្រោះថ្នាក់ចរាចរណ៍នៅទូទាំងប្រទេសកាលពីឆ្នាំ២០១៧កន្លងមក។
លោក ស ខេង បានឲ្យដឹងទៀតថា បើតាមរបាយការណ៍ប្រព័ន្ធព័ត៌មានជនរងគ្រោះ គ្រោះថ្នាក់ចរាចរណ៍កាលពីឆ្នាំមុន បានសម្លាប់មនុស្សជាង ៥នាក់ជាធម្យម និងបង្ករបួសជិត ១៤នាក់ក្នុងមួយថ្ងៃ។
រដ្ឋមន្ត្រីមហាផ្ទៃរូបនេះ បានបញ្ជាក់ថា អត្រាអ្នកស្លាប់ និងរបួសខ្ពស់ដូចនេះ គឺបណ្ដាលមកពីការបើកបរហួសល្បឿនកំណត់ ការមិនគោរពសិទ្ធអាទិភាព ការបើកបរក្រោមឥទ្ធិពលគ្រឿងស្រវឹង ការបើកបរដោយមិនពាក់មួកសុវត្ថិភាព និងមិនពាក់ខ្សែក្រវ៉ាត់នៅពេលបើកបរជាដើម។
លោកបន្ដថា៖ «បញ្ហាគ្រោះថ្នាក់ចរាចរណ៍ ក៏នៅតែជាបញ្ហាបន្ដកើតមានក្នុងទិដ្ឋភាពរន្ធត់ សោកសង្រេង ដែលបានធ្វើឲ្យបាត់បង់ជីវិតមនុស្ស និងការខូចខាតទ្រព្យសម្បត្តិរបស់រដ្ឋ និងឯកជនអស់ជាច្រើនផងដែរ […] ចំនួនជនរងគ្រោះស្លាប់ដោយសារគ្រោះថ្នាក់ចរាចរណ៍មានចំនួនសរុប ១៩៧៦នាក់ និងរបួសចំនួន ៤៨៧០នាក់ គិតជាមធ្យម គឺស្លាប់ជាង ៥នាក់ និងរបួសជិត ១៤នាក់ក្នុងមួយថ្ងៃ»។
របាយការណ៍ចរចរណ៍ផ្លូវគោក បានបង្ហាញថា មនុស្សដល់ទៅ ៣៨៣នាក់ បានស្លាប់ ហើយ ១ ០២៨នាក់ទៀត បានរងរបួសនៅក្នុងគ្រោះថ្នាក់ចរាចរណ៍សរុប ៧៤៥លើកនៅទូទាំងប្រទេសអំឡុងត្រីមាសទី៣ ឆ្នាំ២០១៨នេះ ក្នុងនោះខេត្តកំពង់ស្ពឺមានអត្រាជនរងគ្រោះច្រើនជាងគេរហូតដល់ទៅ ៣០៤នាក់។
បើតាមរបាយការណ៍នេះ អត្រាពលរដ្ឋកម្ពុជាជាធម្យម ៤.៣នាក់ បានស្លាប់ និង ១១.៤នាក់ បានរងរបួស នៅក្នុងគ្រោះថ្នាក់ចរាចរណ៍ក្នុងមួយថ្ងៃ កាលពីត្រីមាសទី៣កន្លងមកនេះ៕
