លោកនាយករដ្ឋមន្ត្រី ហ៊ុន សែន បានសម្រេចបង្កើតក្រុមការងារមួយ ជាអ្វីដែលលោកអះអាងថា ដើម្បីដោះស្រាយសំណើ និងសំណូមពររបស់អង្គការសង្គមស៊ីវិល ចំពេលដែលអ្នកជំនាញសិទ្ធិមនុស្សអង្គការសហប្រជាជាតិកំពុងស្ថិតក្នុងដំណើរបំពេញទស្សនកិច្ចនៅកម្ពុជា។
ក្នុងសេចក្ដីសម្រេចរបស់រាជរដ្ឋាភិបាលចេញផ្សាយកាលពីថ្ងៃទី២ ខែវិច្ឆិកា លោក ហ៊ុន សែន បានសម្រេចបង្កើតក្រុមការងារមួយមានសមាជិក៨រូប និងដឹកនាំដោយរដ្ឋលេខាធិការលោក ប៊ុន ហុន អតីតប្រធានគណៈមេធាវីកម្ពុជា។
ក្នុងសេចក្ដីសម្រេចដដែលនោះ លោក ហ៊ុន សែន បានចាត់តាំងក្រុមការងារមួយនេះ ឲ្យបំពេញភារកិច្ចនៅក្រោមការដឹកនាំពីរដ្ឋមន្ត្រីក្រសួងមហាផ្ទៃ លោក ស ខេង ដើម្បីសម្របសម្រួលជាមួយអង្គការសង្គមស៊ីវិល និងដោះស្រាយបញ្ហាប្រឈមរបស់ពួកគេ។
លោក ហ៊ុន សែន បានចាត់តាំងក្រុមការងារមួយនេះឡើង ក្រោយពីលោក ស ខេង បានណែនាំទៅមន្ត្រីថ្នាក់ក្រោមកាលពីចុងខែតុលាកន្លងមកនេះ កុំឲ្យរឹតត្បិតសកម្មភាពរបស់អង្គការសង្គមស៊ីវិល ជាអ្វីដែលលោកហៅថា ដើម្បីលើកកម្ពស់កិច្ចសហប្រតិបត្តិការអភិវឌ្ឍន៍ជាតិ។
រដ្ឋាភិបាលដឹកនាំដោយគណបក្សប្រជាជនកម្ពុជារបស់លោក ហ៊ុន សែន បានសម្រេចបង្កើតក្រុមការងារមួយនេះឡើង ចំពេលដែលអ្នករាយការណ៍ពិសេសអង្គការសហប្រជាជាតិទទួលបន្ទុកកិច្ចការសិទ្ធិមនុស្សកម្ពុជា លោកស្រី រ៉ូណា ស្មីត កំពុងស្ថិតក្នុងដំណើរទស្សនកិច្ចនៅកម្ពុជារយៈពេល ១១ថ្ងៃ។
ចាប់តាំងពីក្រោយការបោះឆ្នោតជាតិកាលពីចុងខែកក្កដាកន្លងមក ដែលគណបក្សកាន់អំណាចបានទទួលជ័យជម្នះបានអាសនៈទាំងអស់នៅក្នុងរដ្ឋសភាមក រដ្ឋាភិបាលរបស់លោក ហ៊ុន សែន បានដោះលែងក្រុមអ្នកទោសនយោបាយ ក្រុមសកម្មជនគាំទ្របក្សប្រឆាំង សកម្មជនដីធ្លី អ្នកសារព័ត៌មាន និងបានផ្ទេរការឃុំខ្លួនមេដឹកនាំបក្សសង្គ្រោះជាតិ លោក កឹម សុខា ពីពន្ធនាគារត្រពាំងផ្លុង មកឃុំខ្លួននៅក្នុងផ្ទះរបស់លោកនៅម្ដុំទួលគោក៕