របាយការណ៍រដ្ឋាភិបាល បង្ហាញថា ពលករខ្មែរ ១៨៥នាក់ បានស្លាប់នៅឯក្រៅប្រទេស ខណៈពលករខ្មែរជិត ២ម៉ឺននាក់ ត្រូវបានអជ្ញាធរបរទេសបញ្ចូនឲ្យត្រឡប់មកកម្ពុជាវិញ បន្ទាប់ពីបានរកឃើញថា ពលករទាំងអស់នោះ បានចាញ់បោកមេខ្យល់ និងក្រុមហ៊ុននាំទៅរកការងារធ្វើនៅក្រៅប្រទេស។
របាយការណ៍បូកសរុបសកម្មភាព និងការងារប្រយុទ្ធប្រឆាំងអំពើជួញដូរមនុស្សរបស់ក្រសួងមហាផ្ទៃ ឲ្យដឹងថា រយៈពេល ៦ខែ ឆ្នាំ២០១៨ ពលករខ្មែរចំនួន ១៩ ៨៦៩នាក់ ត្រូវបានជួយសង្គ្រោះ និងបញ្ជូនត្រឡប់មកពីប្រទេសចំនួន ១៨ បន្ទាប់ពីពួកគេចាញ់បោកមេខ្យល់ និងក្រុមហ៊ុននាំពលករទៅធ្វើការដោយខុសច្បាប់។
របាយការណ៍ដដែលនេះ បានឲ្យដឹងទៀតថា ក្រៅពីពលករជិត ២ ម៉ឺននាក់នោះ ពលករខ្មែរចំនួន ១៨៥នាក់ បានស្លាប់ ហើយត្រូវបានបញ្ជូនត្រឡប់មកកម្ពុជាវិញតាមច្រកព្រំដែនផងដែរ។
បើតាមរបាយការណ៍ដដែលនេះ ពលករខ្មែរបម្រើការងារនៅឯបរទេស បានរងការរំលោភបំពានពីសំណាក់និយោជក ការជួញដូរផ្លូវភេទ ការរៀបការក្លែងក្លាយ និងការកេងប្រវ័ញ្ចកម្លាំងពលកម្ម។
របាយការណ៍ក្រសួងមហាផ្ទៃ បានឲ្យដឹងផងដែរថា ពលករខ្មែរ ១លាន ៥ម៉ឺននាក់ កំពុងបម្រើការងារនៅក្នុងប្រទេសថៃ ក្នុងនោះមានពលករស្របច្បាប់ចំនួន ៥៤៨ ៤៧០នាក់ គិតត្រឹមពាក់កណ្ដាលឆ្នាំ២០១៨នេះ។
ក្នុងឆ្នាំ២០១៧ ក្រសួងការបរទេស និងសហប្រតិបត្តិការអន្តរជាតិ បានជួយសង្គ្រោះ និងរៀបចំបញ្ជូនពលករ-ពលការិនីខ្មែរមកកម្ពុជាវិញចំនួន ៩៨៦នាក់។
កាលពីថ្ងៃទី២៥ ខែតុលាកន្លងមកនេះ រដ្ឋាភិបាលកម្ពុជា គ្រោងបញ្ជូនពលករខ្មែរចំនួន៥ពាន់នាក់ ឲ្យទៅបម្រើការងារនៅប្រទេសគុយវ៉ែត ស្ថិតនៅឆ្នាំ២០១៩ខាងមុខនេះ៕