អាជ្ញាធរ ហាមក្រុមអ្នកសារព័ត៌មានមិនឲ្យចូលទៅយកព័ត៌មានពីក្រុមពលរដ្ឋមានជម្លោះដីធ្លីដែលត្រូវអាជ្ញាធរដឹកពីរដ្ឋសភាទៅដាក់នៅទីលានប្រជាធិបតេយ្យថ្មី។
អ្នកសារព័ត៌មានដែលអាជ្ញាធររាជធានីភ្នំពេញ ហាមមិនឲ្យចូលទៅយកព័ត៌មានកន្លែងពលរដ្ឋតវ៉ានោះ មានអ្នកសារព័ត៌មានមកពីវីអូឌី អ្នកសារព័ត៌មានទូរទស្សន៍ NiceTV កាសែតខ្មែរថែមស៍ កាសែតភ្នំពេញប៉ុស្តិ៍ និងអ្នកថតរូបមកពីអង្គការផ្សេងៗជាដើម។
ខណៈពេលរារាំងមិនឲ្យអ្នកសារព័ត៌មានចូលយកព័ត៌មាន និងផ្តិតយករូបភាពក្នុងព្រឹត្តការណ៍នោះ អភិបាលរងរាជធានីភ្នំពេញលោក កើត ឆែ បានប្រាប់ក្រុមអ្នកសារព័ត៌មានថា ការហាមមិនឲ្យអ្នកសារព័ត៌មានចូលយកព័ត៌មានពីនិងផ្តិតយករូបភាពពីក្រុមពលរដ្ឋមានជម្លោះដីធ្លីនេះ ដោយសារមិនចង់ឲ្យមានការរំខានដល់ការធ្វើការងាររបស់អាជ្ញាធរ។
លោកបន្ថែមថា៖ «ខ្ញុំមិនទាន់ថា ហាមមិនឲ្យចូលទេ តែឥលូវចាំឲ្យពួកខ្ញុំធ្វើការងារហ្នឹងសិន។ ចាំខ្ញុំធ្វើកិច្ចការងារហ្នឹង ចប់សព្វគ្រប់ចាំខ្ញុំផ្តល់កិច្ចសម្ភាសន៍ជូន ព្រោះអីរដ្ឋបាលរាជធានីភ្នំពេញមានអ្នកនាំពាក្យ។ អញ្ចឹងពេលយើងធ្វើការចប់យើងនឹងសង្ខេបព្រឹត្តិការណ៍ទាំងអស់ទៅឲ្យអ្នកនាំពាក្យ ហើយអាចតេទៅលោក ម៉េត មាសភក្តី បាន។ គាត់ឆ្លើយទៅភ្លាម»។
និពន្ធនាយកប្រតិបត្តិកាសែតខ្មែរថាមស៍លោក ម៉ៃ ទិត្យថារ៉ា យល់ថា អាជ្ញាធរគួរតែអនុញ្ញាតឲ្យក្រុមអ្នកសារព័ត៌មានបានចូលយកព័ត៌មានពីក្រុមពលរដ្ឋទាំងនោះ ប្រសិនបើមិនមានអ្វីបិទបាំង។ លោកបន្តថា ការហាមបែបនេះគឺជាការព្យាយាមបិទសិទ្ធសេរីភាពរបស់ក្រុមអ្នកសារព័ត៌មាន។
លោកបន្ថែម៖ « មែនទែនទៅ វាជាការពិតហើយ ទង្វើនេះជាការព្យាយាមបំបិទសិទ្ធិអ្នកសារព័ត៌មានហើយ។ អាជ្ញាធរលោកគួរតែស្វែងយល់ដោយខ្លួនឯង ថាអ្នកសារព័ត៌មានគឺអាចយកព័ត៌មាននៅគ្រប់ទីកន្លែងដែលជាកន្លែងសាធារណៈ ឬជាកន្លែងណាដែលគេត្រូវឲ្យចូលឬមិនឲ្យចូល។ ដូចករណីនេះ មិនមានហេតុផលណាមួយដែលថាអាជ្ញាធរហាមឃាត់អ្នកសារព័ត៌មានមិនចូលយកព័ត៌មានទេ ដោយសារតែពលរដ្ឋគាត់ធ្វើការតវ៉ា»។
នាយកប្រតិបត្តិក្លឹបអ្នកកាសែតកម្ពុជាលោក ឆាយ សុផល មានប្រសាសន៍ថា កន្លែងទីសាធារណៈគឺអ្នកសារព័ត៌មានគ្រប់រូបមានសិទ្ធទៅយក និងផ្តិតយករូបភាពដោយគ្មានការហាមឃាត់នោះទេ។
លោក ឆាយ សុផល យល់ថា ករណីអាជ្ញាធររារាំងមិនឲ្យអ្នកកាសែតចូលយកព័ត៌មានកន្លែងពលរដ្ឋមានជម្លោះ ដីធ្លីប្រមូលផ្តុំនោះអាចមិនមែនថ្នាក់លើជាអ្នកបញ្ជានោះទេ ហើយលោកឲ្យអ្នកសារព័ត៌មានត្រូវហ៊ានរាយការណ៍ហេតុការណ៍នោះដើម្បីឲ្យថ្នាក់លើដឹងអំពីបញ្ហានេះផងដែរ។
លោកបន្ថែមថា៖«ប្រសិនណាមិនចង់ឲ្យអ្នកសារព័ត៌មានចូលថត ឬចូលយកព័ត៌មានទេ យើងដាក់ផ្លាកកន្លែងហ្នឹងទៅថា អ្នកសារព័ត៌មានមិនអនុញ្ញាតឲ្យចូល។ ប្រសិនណាយើងមិនដាកផ្លាកទេ ទីកន្លែងសាធារណៈគឺអ្នកសារព័ត៌មានគាត់មានសិទ្ធផ្តិតយករូបភាពឬយកព័ត៌មានទៅបំពេញការងាររបស់គាត់។ ហើយខ្ញុំគិតថាករណីនេះជួន កាលមិនមែនជាការបញ្ជាពីថ្នាក់លើទេ ប្រហែលមកពីសន្តិសុខថ្នាក់ក្រោមខ្លួនឯងហ្នឹងគាត់ភ័យខ្លាចក្នុងប្រការណាមួយ។ សម្រាប់អ្នកសារព័ត៌មានគួរតែរាយការណ៍នៅអ្វីដែលយើងបានជួប ហើយពេលយើងរាយការណ៍ទៅថ្នាក់លើឃើញគាត់អនុញ្ញាតឲ្យយើងថតវិញ»។
អាជ្ញាធរមិនត្រឹមតែហាមមិនឲ្យអ្នកសារព័ត៌មានចូលយក និងផ្តិត យករូបភាពប៉ុណ្ណោះទេ សូម្បីមន្រ្តីអង្គការសហប្រជាជាតិ និងមន្រ្តីអង្គការសង្គមស៊ីវិលដែលចុះឃ្លាំមើលហេតុការណ៍នោះក៏ត្រូវអាជ្ញាធរដេញចេញ ដោយហាមមិនឲ្យចូលក្នុងរយៈពេលខ្លីផងដែរ។
វី.អូ.ឌី មិនអាចទាក់ទងសុំការអត្ថាធិប្បាយជុំវិញបញ្ហានេះពីអ្នកនាំពាក្យក្រសួងព័ត៌មានលោក អ៊ុក គឹមសេង បានទេ។
ពលរដ្ឋរាប់រយនាក់មកពីបណ្តាខេត្តនានានៅថ្ងៃនេះ បានឡើងមករកកិច្ចអន្តរាគមន៍តាមស្ថាប័នរដ្ឋកំពូលៗមួយ ចំនួននៅភ្នំពេញឲ្យជួយដោះស្រាយបញ្ចប់វិវាទដីធ្លីជូនពួកគេ៕
