ក្រសួងទេសចរណ៍និងអាជ្ញាធរខេត្តកោះកុងបានអំពាវនាវឲ្យម្ចាស់សណ្ឋាគារ និអាហារដ្ឋាន កុំដំឡើងថ្លៃក្នុងថ្ងៃបុណ្យសមុទ្រ នៅខែធ្នូខាងមុខនេះ។
យោងតាមហ្វេសប៊ុកផេករបស់ក្រសួងទេសចរណ៍កាលពីថ្ងៃទី ៤ ខែវិច្ឆិកា ឆ្នាំ២០១៨ រដ្ឋមន្ត្រីក្រសួងទេសចរណ៍លោក ថោង ខុន និង អភិបាលខេត្តកោះកុង លោកស្រី មិថុនា ភូថង បានបើកកិច្ចប្រជុំដើម្បីពិភាក្សាក្នុងការរៀបចំបុណ្យសមុទ្រដែលនឹងប្រព្រឹត្តពីថ្ងៃទី១៤ដល់១៦ ខែធ្នូ ឆ្នាំ២០១៨។
នៅក្នុងកិច្ចប្រជុំនាថ្ងៃទី៤ ខែវិច្ឆិកា ឆ្នាំ២០១៨ លោក ថោង ខុន បានអំពាវនាវដល់ម្ចាស់សណ្ឋាគារ ផ្ទះសំណាក់ និងអាហារដ្ឋានកុំឱ្យឡើងថ្លៃដើម្បីទាក់ទាញភ្ញៀវទេសចរ។
កន្លងមកប្រជាពលរដ្ឋមានការព្រួយបារម្ភផ្លូវធ្វើដំណើរទៅខេត្តកោះកុង ប៉ុន្តែលោក ថោង ខុន និងអ្នកស្រី មិថុនា ភូថង បានអះអាងថាក្រុមការងាររបស់ក្រសួងសាធារណការ និងដឹកជញ្ជូន រួមជាមួយរដ្ឋបាលខេត្តកោះកុង បាននិងកំពុងពន្លឿនការងារនេះ ហើយនឹងរួចរាល់មុនពិធីបុណ្យសមុទ្រមកដល់។
កាលពីឆ្នាំ២០១៧ ពិធីបុណ្យសមុទ្រប្រារព្ធនៅខេត្តកែប ហើយមានភ្ញៀវទេសចរប្រមាណ៥០ម៉ឺននាក់ចូលរួមទស្សនា។