រដ្ឋមន្ត្រីក្រសួងមហាផ្ទៃលោក ស ខេង ថ្លែងថា ជនខិលខូចកំពុងតែឆ្លៀតឱកាសផលិត និងចែកចាយឱសថក្លែងក្លាយ នាំឲ្យប្រជាពលរដ្ឋកំពុងតែរងគ្រោះលើបញ្ហាសុខភាព និងខាតបង់ថវិកាច្រើនលើបញ្ហានេះ។
ក្នុងកម្មវិធីបិទសន្និសីទអន្តរជាតិ ថ្នាក់តំបន់ស្តីពី ការប្រយុទ្ធប្រឆាំង ឱសថក្លែងក្លាយ និងអន់គុណភាព កាលពីម្សិលមិញ លោ ស ខេង ថ្លែងថា បើទោះបីជាអាជ្ញាធរកម្ពុជាកំពុងបន្តធ្វើការទប់ស្កាត់និងចាត់វិធានអ្នកផលិតឱសថក្លែងក្លាយ និងអន់គុណភាពក៏ដោយ ប៉ុន្តែការប្រើប្រាស់ទំនិញ និងឱសថនៅក្នុងប្រទេសកម្ពុជាមានការកើនឡើងជាងមុន ទើបធ្វើឲ្យជនខិលខូលមួយចំនួនបានឆ្លៀតឱកាសផលិតឱសថក្លែងក្លាយលក់។
លោកថា៖ «ក្នុងនោះឱសថជាតម្រូវការយ៉ាងសំខាន់និងចាំបាច់មិនអាចខ្វះបានសម្រាប់ជីវភាពប្រចាំថ្ងៃ។ ទន្ទឹមនឹងតម្រូវការនៃការប្រើប្រាស់ឱសថ ទើបជនល្មើសឆ្លៀតឱកាសខិតខំធ្វើការផលិតចរាចរ និងចែកចាយនូវឱសថក្លែងក្លាយ និងអន់គុណភាព លើទីផ្សារ ដែលនាំឲ្យពលរដ្ឋរងគ្រោះដោយសារឱសថទាំងនោះ និងថែមទាំងខាតថវិកា យ៉ាងច្រើនសន្ធឹកសន្ធាប់ និងករណីខ្លះបណ្តាលឲ្យប៉ះពាល់ដល់អាយុជីវិតថែមទៀតផង» ។
ប្រធានសមាគមគ្រូពេទ្យគុណធម៌លោកវេជ្ជបណ្ឌិត អ៊ូច វុទ្ធី មានប្រសាសន៍ថា បច្ចុប្បន្ន ប្រជាពលរដ្ឋ រួមទាំងគ្រូពេទ្យមួយចំនួនមិនបានដឹងថាឱសថដែលទិញទៅប្រើប្រាស់ជាឱសថពិតឬក្លែងក្លាយនោះទេ ករណីនេះ នឹងធ្វើឲ្យប្រជាពលរដ្ឋកម្ពុជានឹងប្រឈមគ្រោះថ្នាក់ធ្ងន់ធ្ងរ។
លោកថា៖ «វាអាចបង្កទៅជំងឺមហារីក ឱសថខ្លះវាបន្លំទៅជាឱសថញៀន វាអាចធ្វើឲ្យក្មេងអ្នកជំងឺទាំងអស់ហ្នឹង ទៅជាញៀនឱសថអស់ហ្នឹង វាមិនមែនទៅជាឱសថវាទៅថ្នាំញៀន។ កន្លែងហ្នឹងដែលយើងបារម្ភមែនទែន ហើយទៅអនាគតរបស់ប្រជាពលរដ្ឋយើងទៅថ្ងៃក្រោយ»។
លោកបន្តថា ប្រសិនបើអាជ្ញាធរ និងស្ថាប័នពាក់ព័ន្ធមិនមានវិធានការច្បាស់លាស់ក្នុងការទប់ស្កាត់ឱសថទាំងអស់នេះទេ ប្រជាពលរដ្ឋទាំងអស់នឹងទទួលរងគ្រោះ ដោយសារ ឱសថក្លែងក្លាយដែលកំពុងដាក់លើកនៅលើទីផ្សារបច្ចុប្បន្ន។
កាលពីថ្ងៃទី៥ ខែតុលា លោក ហ៊ុន សែន បានអំពាវនាវទៅកាន់សហគមន៍អន្តរជាតិឲ្យចូលរួមលុបបំបាត់ឱសថក្លែងក្លាយ និងខូចគុណភាព ដើម្បីជួយទ្រទ្រង់ដល់សុខភាព ក៏ដូចជាសេដ្ឋកិច្ចរបស់ពលរដ្ឋផងដែរ ខណៈបច្ចុប្បន្ន ឱសថក្លែងក្លាយបានបង្កគ្រោះថ្នាក់យ៉ាងធ្ងន់ធ្ងរចំពោះអ្នកប្រើប្រាស់។
វីអូឌី មិនមានរបាយការណ៍ពីក្រសួងស្ថាប័នពាក់ព័ន្ធពីចំនួនឱសថក្លែងក្លាយដែលបង្ក្រាបបានទេ ប៉ុន្តែប្រព័ន្ធផ្សព្វផ្សាយបានចុះផ្សាយជាហូរហែពីការបង្ក្រាបលើកន្លែងលក់និងចែកចាយឱសថក្លែងក្លាយ។
កាលពីថ្ងៃទី១៦ ខែសីហា ឆ្នាំ២០១៨ កម្លាំងសមត្ថកិច្ចចម្រុះ បានចុះបង្ក្រាបទីតាំងនាំចូល និងចែកចាយឱសថមួយកន្លែង នៅសង្កាត់អូរបែកក្អម ខណ្ឌសែនសុខ រាជធានីភ្នំពេញ។ ក្នុងការចុះបង្រ្កាបនោះ អាជ្ញាធរបានរកឃើញឱសថក្លែងក្លាយ និងខូចគុណភាពចំនួន៣៥ប្រភេទ។
