លោកនាយករដ្ឋមន្ត្រី ហ៊ុន សែន បានបញ្ជាទៅរដ្ឋមន្ត្រីក្រសួងពាក់ព័ន្ធចំនួនពីរ ឲ្យពិនិត្យឡើងវិញសំណុំរឿងចោទប្រកាន់មេដឹកនាំសហជីព ដើម្បីជំរុញដល់ការបើកលំហសេរីភាព ក្នុងវិស័យការងារមួយនេះ។
លោក ហ៊ុន សែន ក្នុងពិធីសំណេះសំណាលជាមួយកម្មករ នៅខេត្តតាកែវ ព្រឹកនេះ បានថ្លែងបែបក្រើនរំឭកថា ថៅកែរោងចក្រ គួរជ្រើសរើសយកវិធីចរចាពេលមានវិវាទការងារ ជាជាងយកបញ្ហាប្តឹងទៅតុលាការ ដែលលោកថាដើម្បីកុំឲ្យសហជីពចោទថា ពួកគេត្រូវបានចាប់ជាចំណាប់ខ្មាំង ក្នុងសកម្មភាពជំរុញលក្ខខណ្ឌការងារ។
លោក ហ៊ុន សែន ថ្លែងទៀតថា កន្លងទៅមានមេដឹកនាំសហជីពខ្លះ បានជាប់បណ្តឹងនៅតុលាការ ដូចជា លោក អាត់ ធន់ និងលោកស្រី យ៉ាង សុភ័ណ្ឌ ជាដើម ។
មេដឹកនាំរូបនេះ បញ្ជាទៅរដ្ឋមន្ត្រីក្រសួងការងារ លោក អ៊ិត សំហេង និងរដ្ឋមន្ត្រីក្រសួងយុត្តិធម៌លោក អង្គវង្ស វឌ្ឍានា ឲ្យពន្លឿនរកដំណោះស្រាយបញ្ហានេះ ឬអាចតម្កល់សំណុំរឿងមិនចាត់ការក៏បាន ដើម្បីបើកលំហសេរីភាពសហជីព ក្នុងវិស័យកាត់ដេរ។
លោកថា៖ «បើថាកាត់ៗឲ្យវាស្រូត បើថាមិនកាត់ទេ គឺបានសេចក្តីថា តម្កល់មិនចាត់ការទៅ ឲ្យវារួចៗ កុំឲ្យមេដឹកនាំសហជីពនានាយល់ឃើញថា ខ្លួនស្ថិតក្នុងចំណាប់ខ្មាំងនៃបញ្ហាពាក់ព័ន្ធទៅនឹងតុលាការ»។
ក្រោយការថ្លែងរបស់នាយករដ្ឋមន្ត្រីនេះ រដ្ឋមន្ត្រីនៃក្រសួងទាំងពីរដែលអមដំណើរ បានក្រោកឈរ ហាក់បង្ហាញកាយវិការទទួលយកបញ្ជាផ្ទាល់មាត់នេះ។
មេដឹកនាំសហជីពមួយចំនួន ដូចជា លោក រ៉ុង ឈុន លោក ជា មុន្នី លោក ប៉ាវ ស៊ីណា លោកស្រី យ៉ាង សុភ័ណ្ឌ លោកស្រី ម៉ម ញឹម លោក អាត់ ធន់ និងមន្ត្រីសហជីពមួយចំនួនទៀត ត្រូវថៅកែរោងចក្រប្តឹងទៅតុលាការជាបន្តបន្ទាប់ ក្រោយពីដឹកនាំទាមទារលក្ខខណ្ឌការងារ និងប្រាក់ឈ្នួល កាលពីចុងឆ្នាំ២០១៣ និងដើមឆ្នាំ២០១៤ ខណៈអតីតបក្សប្រឆាំងកំពុងដឹកនាំបាតុកម្មចូលទីក្រុងភ្នំពេញ ប្រឆាំងលទ្ធផលបោះឆ្នោត និងស្របពេលបក្សកាន់អំណាចបើកយុទ្ធនាការបង្ក្រាបចលនាអ្នកប្រឆាំង។
ប្រធានសហភាពការងារកម្ពុជាលោក អាត់ ធន់ បានសាទរទៅនឹងប្រសាសន៍នាយករដ្ឋមន្ត្រីនេះ។ ប៉ុន្តែលោកថា នៅមានការព្រួយបារម្ភពីការអនុវត្តជាក់ស្តែងរបស់មន្ត្រីថ្នាក់ក្រោម ដោយថាការស្តារសេរីភាពសហជីពឡើងវិញពេលនេះអាចជួបការលំបាកច្រើន ដោយសារមាត្រាមួយចំនួនដែលមានការរឹតបន្តឹងក្នុងច្បាប់សហជីពមិនទាន់មានការកែប្រែ។
លោកថា៖ «យើងមិនទាន់សប្បាយចិត្ត១០០%ទេ។ នៅពេលនេះយើងត្រូវពិនិត្យមើលសំណុំរឿងទាំងអស់ហ្នឹងត្រូវបានដោះស្រាយយ៉ាងម៉េចហ្នឹងរឿងទី១។ រឿងទី២ តើប៉ុន្មានរឿងដែលត្រូវបានដោះស្រាយ ហើយថាតើមានសម្ពាធអ្វីផ្សេងទៀតនៅក្នុងហ្នឹង ឬក៏រឿងហ្នឹងត្រូវបានដោះស្រាយទាំងអស់ដោយយុត្តិធម៌សម្រាប់យើង ។ ហើយយើងមានសេរីភាពមែន យើងចាំមើល តទៅទៀត»។
ដូចគ្នានេះដែរនាយកប្រតិបត្តិមជ្ឈមណ្ឌលសម្ព័ន្ធភាពការងារនិងសិទ្ធិមនុស្ស លោក មឿន តុលា មានប្រសាសន៍ថា ការក្រើនរំឭករបស់នាយករដ្ឋមន្ត្រីនេះ ជាសារវិជ្ជមានមួយ ដែលជំរុញដល់ការស្តារសេរីភាពសហជីពឡើងវិញផង និងជាការឆ្លើយតបជាវិជ្ជមានផង ដោយថាថ្មីៗនេះអ្នកបញ្ជាទិញមួយចំនួន ជំរុញឲ្យរដ្ឋាភិបាលទម្លាក់បទចោទលើមេដឹកនាំសហជីព ដែលពួកគេយល់ថាការចោទប្រកាន់កន្លងទៅ ជាចេតនានយោបាយ ។
លោកថា៖ «ខ្ញុំចង់ឲ្យរដ្ឋាភិបាល លោកពិចារណាទៅលើសំណើរបស់អ្នកបញ្ជាទិញដែរ ពាក់ព័ន្ធនឹងការធ្វើវិសោធនកម្មឡើងវិញ ដើម្បីឲ្យសហជីព ឬកម្មករហ្នឹងលោកមានលទ្ធភាពគ្រប់គ្រាន់ដែលធានាក្នុងរដ្ឋធម្មនុញ្ញហ្នឹង ក្នុងការអនុវត្តសិទ្ធិជាមូលដ្ឋានចូលរួមសកម្មភាពសហជីព ចរចាជាសមូហភាព ក្នុងការបញ្ចេញមតិតាមរយៈការធ្វើកូដកម្មដោយសន្តិវិធី»។
កាលពីថ្ងៃទី៥ខែតុលា សហភាពអឺរ៉ុប បានគំរាមដកប្រព័ន្ធអនុគ្រោះពន្ធ ទុកពេលឲ្យ១ឆ្នាំ ក្រោយពីរកឃើញថា រដ្ឋាភិបាលកម្ពុជា នៅតែបន្តរំលោភសិទ្ធិការងារ សិទ្ធិមនុស្ស និងប្រជាធិបតេយ្យ។ ប្រព័ន្ធអនុគ្រោះពន្ធ ត្រូវរដ្ឋាភិបាលកម្ពុជា ប៉ាន់ប្រមាណថា ប្រាក់ជិត៧០០លានដុល្លារ ក្នុង១ឆ្នាំកម្ពុជាបានចំណេញពីការមិនបង់ពន្ធ ។
សមាគមរោងចក្រកាត់ដេរកម្ពុជា GMAC កាលពីថ្ងៃទី២០ខែតុលា បានដាក់លិខិតទៅសហភាពអឺរ៉ុប ស្នើឲ្យពិចារណាឡើងវិញ ពីវិធានការរបស់ខ្លួន ដោយ GMACព្រួយបារម្ភថា ការដកប្រព័ន្ធអនុគ្រោះពន្ធ បង្កផលប៉ះពាល់ដល់កម្មករជាង៧០ម៉ឺននាក់ រយៈពេលយូរ និងក្រុមគ្រួសាររបស់ពួកគេ។
ទោះជាយ៉ាងណា ក្នុងពិធីនោះដែរ លោក ហ៊ុន សែន បានអំពាវនាវជាថ្មីទៀត ឲ្យភាគីពាក់ព័ន្ធត្រូវធ្វើយ៉ាងណា ឲ្យវិស័យកាត់ដេរ ក្លាយជាសហគមន៍សុខសាន្ត គ្មានគ្រឿងញៀន គ្មានបងធំកាងរោងចក្រ និងមិនត្រូវរារាំងដល់សកម្មភាពជំរុញលក្ខខណ្ឌការងារ ឬរំខានដល់ការប្រមូលផ្តុំណាមួយនោះឡើយ៕
