មន្ត្រីនគរបាលប្រឆាំងបទល្មើសសេដ្ឋកិច្ច និងមន្ត្រីកាំកុងត្រូល បានដុតកំទេចចោលសាច់សត្វគ្រួចខូចគុណភាព ជាង២តោនដែលនាំចូលពីប្រទេសវៀតណាមខណៈឈ្មួញព្យាយាមនាំពីវៀតណាមចូលចែកចាយលើទីផ្សារកម្ពុជា។
តាមការចុះផ្សាយរបស់អគ្គស្នងការដ្ឋាននគរបាលជាតិ ឲ្យដឹងថា នៅវេលាម៉ោង៥និង២០នាទីទៀបភ្លឺ ថ្ងៃទី៦ ខែវិច្ឆិកា កម្លាំងចម្រុះ បានចុះបង្រ្កាប និងរឹបអូសយកសាច់សត្វគ្រួចជាង២តោនកន្លះ នៅចំណុចផ្លូវ ជា សុផារ៉ា សង្កាត់ទួលសង្កែ ខណ្ឋឬស្សីកែវ រាជធានីភ្នំពេញ បន្ទាប់ពីឆែកឆេរឃើញថា សាច់សត្វគ្រួចដែលនាំចូលនោះ គ្មានច្បាប់អនុញ្ញាតិ ។
នគរបាលជាតិ ថា ក្រោយពីរឹបអូសបានសមត្ថកិច្ចចម្រុះ និងមន្ត្រីកាំកុងត្រូល បានយកសាច់សត្វគ្រួចទាំងអស់នោះទៅដុតកំទេចចោល នៅទីលានចាក់សំរាមបឹងជើងឯក និងបាននាំខ្លួនអ្នកបើកបររថយន្តម្នាក់ ទៅនាយកដ្ឋាន ដើម្បីបន្តនីតិវិធី។
កាលពីឆ្នាំ២០១៧ មន្ត្រីកាំកុងត្រូលប្រចាំក្រុងប៉ោយប៉ែត ខេត្តបន្ទាយជ័យចាប់បាននិងដុតបំផ្លាញចោលស្លាបនិងជង្គង់មាន់ខូចគុណភាពជាង៦០០គីឡូ បន្ទាប់ពីឈ្មួញបានដឹកពីថៃចូលចែកចាយលើទីផ្សារកម្ពុជា។