មន្ត្រីក្រសួងមហាផ្ទៃ បានព្រមានចាត់វិធានការច្បាប់ទៅលើមន្ត្រីនគរបាលណាដែលយកលុយពីប្រជាពលរដ្ឋជាថ្នូរនឹងការផ្ដល់អត្តសញ្ញាប័ណ្ណ ខណៈក្រសួងបានអំពាវនាវទៅពលរដ្ឋឲ្យទៅស្នើសុំអត្តសញ្ញាប័ណ្ណ ឬក៏ប្តូរអត្តសញ្ញាណប័ណ្ណថ្មី ដើម្បីទទួលបានប្រយោជន៍ស្របច្បាប់។
ក្នុងសេចក្ដីជូនដំណឹងកាលពីថ្ងៃម្សិលមិញនេះ អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ បានប្រកាសថា អត្តសញ្ញាណប័ណ្ណសញ្ជាតិខ្មែរគំរូចាស់ទាំងអស់ នឹងត្រូវអស់សុពលភាពប្រើប្រាស់នៅថ្ងៃទី៣១ ខែធ្នូ ឆ្នាំ២០១៨នេះ។
អគ្គនាយកដ្ឋានអត្តសញ្ញាណកម្ម បានជំរុញទៅពលរដ្ឋដែលកំពុងកាន់អត្តសញ្ញាណប័ណ្ណចាស់ ឲ្យទៅប្ដូរយកអត្តសញ្ញាណប័ណ្ណថ្មី ហើយក៏ជំរុញទៅពលរដ្ឋដែលពុំទាន់មានអត្តសញ្ញាណប័ណ្ណ ឲ្យទៅស្នើសុំអត្តសញ្ញាណប័ណ្ណផងដែរ។
បើតាមសេចក្ដីជូនដំណឹងនោះ ប្រជាពលរដ្ឋកម្ពុជា អាចស្នើសុំអត្តសញ្ញាប័ណ្ណនៅតាមប៉ុស្តិ៍នគរបាលនៅតាមមូលដ្ឋាន ស្រុកខណ្ឌ និងស្នងការដ្ឋាននគរបាលខេត្តក្រុងទាំងអស់ ឬក៏អាចស្នើសុំនៅស្នាក់ការផ្ដល់អត្តសញ្ញាណប័ណ្ណសញ្ញាតិខ្មែរគំរូថ្មី នៅផ្សារទំនើបអ៊ីអនម៉ល ២ ស្ថិតក្នុងខណ្ឌសែនសុខ។
សេចក្តីអំពាវនាវដដែល បញ្ជាក់ថា ប្រជាពលរដ្ឋដែលទៅស្នើសុំធ្វើអត្តសញ្ញាណប័ណ្ណគំរូថ្មី ត្រូវភ្ជាប់ឯកសារទៅជាមួយរួមមាន សំបុត្រកំណើត ឬសំបុត្របញ្ជាក់កំណើត និងសៀវភៅគ្រួសារ ឬសៀវភៅស្នាក់នៅ ឬលិខិតបញ្ជាក់ទីលំនៅ និងអត្តសញ្ញាណប័ណ្ណគំរូចាស់។
ប្រធាននាយកដ្ឋានអត្តសញ្ញាណប័ណ្ណ លោក ឃៀង សុគន្ធា បានព្រមានចាត់វិធានការចំពោះមន្ត្រីនគរបាលណាដែលយកលុយពីប្រជាពលរដ្ឋ ដែលទៅស្នើសុំអត្តសញ្ញាណប័ណ្ណនេះ ដោយលោកថា ក្រសួងមហាផ្ទៃបានផ្ដល់សេវាសាធារណៈឥតគិតថ្លៃជូនពលរដ្ឋទូទៅ។
លោកមានប្រសាសន៍ថា៖ «ក្រសួងពិតជាមានវិធានការ ច្បាប់ប្រឆាំងអំពើពុករលួយមាន។ ឧទាហរណ៍ថា គាត់យកលុយគេ មានទោសប៉ុន្មាន មានចែងអស់ហើយ។ យើងមានអីពិបាកអនុវត្ត។ ខ្ញុំថា មិនពិបាកទេ បើសិនជារកឃើញ[មន្ត្រីអត្តសញ្ញាណប័ណ្ណយកលុយពីពលរដ្ឋ]គឺដាក់ពិន័យ។ បើកន្លែងណាពិន័យរដ្ឋបាល គឺពិន័យរដ្ឋបាល»។
មន្ត្រីរូបនេះ បញ្ជាក់ថា ប្រជាពលរដ្ឋអាចរាយការណ៍ទៅក្រសួងមហាផ្ទៃបានតាមរយៈទំព័រហ្វេសប៊ុករបស់ក្រសួង ប្រសិនបើប្រជាពលរដ្ឋរូបណា ត្រូវបានសមត្ថកិច្ចបដិសេធផ្ដល់អត្តសញ្ញាប័ណ្ណ ឬក៏ផ្ដល់សេវាមិនល្អ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ បានឲ្យដឹងថា កន្លងមក ប្រជាពលរដ្ឋដែលទៅធ្វើអត្តសញ្ញាណប័ណ្ណត្រូវចំណាយថិវកាឲ្យទៅមន្ត្រីសមត្ថកិច្ចមួយចំនួន ដោយថា ជាថ្នូនឹងការធ្វើអត្តសញ្ញាណប័ណ្ណជាដើម។
លោកបានជំរុញទៅរដ្ឋាភិបាល ឲ្យបង្កើតកម្មវិធីចុះឈ្មោះធ្វើអត្តសញ្ញាណប័ណ្ណតាមប្រព័ន្ធអនឡាញ ដោយលោកថា ដើម្បីកាត់បន្ថយអំពើពុករលួយ និងធ្វើឲ្យប្រជាពលរដ្ឋចំនេញពេលវេលា។
លោកមានប្រសាសន៍ថា៖ «បើជាលទ្ធភាពអាចធ្វើទៅបាន ការពិនិត្យមើលទៅលើតម្រូវការបែបទំនើប។ ទីមួយសន្សំសំចៃពេលវេលាដល់អ្នករកសេវា ទីពីរអាចកាត់បន្ថយនូវអំពើពុករលួយ ហើយការិយាធិបតេយ្យ គឺរួមចំណែកនូវអ្វីដែលរដ្ឋាភិបាលអះអាងថា ជាប្រភេទសេវាមួយដែលផ្តល់ដោយទម្រង់ E-Government Electronic government»។
របាយការណ៍នៃអគ្គនាយកដ្ឋានអត្តសញ្ញាណកម្មកាលពីដើមឆ្នាំ២០១៨នេះ បានឲ្យដឹងថា ក្រសួងមហាផ្ទៃ បានអត្តសញ្ញាណប័ណ្ណជិត ៩លាន ៧សែនសន្លឹក ត្រូវបានផ្ដល់ជូនប្រជាពលរដ្ឋនៅទូទាំងប្រទេសនៅចន្លោះឆ្នាំ២០១៤ដល់ចុងឆ្នាំ២០១៧ ហើយអត្តសញ្ញាណប័ណ្ណចំនួនជាង ៥ម៉ឺនសន្លឹក ត្រូវបានបោះពុម្ពឡើងវិញ៕
