មេដឹកនាំបក្សកាន់អំណាច និងអតីតមេដឹកនាំគណបក្សប្រឆាំង បានផ្ញើសារនិងការយល់ឃើញផ្សេងៗគ្នាទាក់ទិនទៅនឹងស្នាព្រះហស្ថរបស់ព្រះបរមរតនកោដ្ឋ ព្រះបាទនរោត្តម សីហនុ ដែលព្រះអង្គបានធ្វើក្នុងបុព្វហេតុទាមទារឯករាជ្យពីអាណានិគមនិយមបារាំង។
ក្នុងពិធីរំឭកខួន៦៥ឆ្នាំ ដែលធ្វើឡើងមុខព្រះបរមរាជវាំង នាថ្ងៃសុក្រនេះ នាយករដ្ឋមន្ត្រីនិងជាមេដឹកនាំបក្សកាន់អំណាច លោក ហ៊ុន សែន បានបង្ហាញពីកត្តញ្ញូតាធម៌ ដល់ព្រះរាជបូជនីយកិច្ចរបស់ព្រះអង្គថា ដែលបានដឹកនាំកងកម្លាំងប្រឆាំងអាណានិគមនិយមបារាំង រហូតប្រទេសដាក់អាណានិគមមួយនេះ ព្រមប្រគល់ឯករាជ្យទាំងស្រុងឲ្យកម្ពុជានៅថ្ងៃទី៩ ខែវិច្ឆិកា ឆ្នាំ១៩៥៣។
លោក ហ៊ុន សែន ថ្លែងទៀតថា រដ្ឋាភិបាលរបស់លោកអាណត្តិទី៦នេះ នឹងបន្តការពារសន្តិភាព ឯករាជ្យ តាមរយៈគោរពសិទ្ធិមនុស្ស ប្រជាធិបតេយ្យ ការពារបូរណភាពទឹកដី និងលើកកម្ពស់ជីវភាពប្រជាពលរដ្ឋជាដើម ។
លោកថា៖ «ការពារសមិទ្ធិផលសង្គមជាតិ លើកកម្ពស់កិត្យានុភាពជាតិ ទប់ស្កាត់ការជ្រៀតជ្រែកផ្ទៃក្នុងកម្ពុជា និងប្រឆាំងជាដាច់ខាតរាល់សកម្មភាពដែលពាក់ព័ន្ធនឹងបដិវត្តពណ៌ ឬការញុះញង់ណាមួយដែលបង្កឲ្យមានអស្ថិរភាពនយោបាយ ឬចលាចលក្នុងសង្គមជាតិកម្ពុជា»។
អតីតមេដឹកនាំបក្សប្រឆាំងលោក សម រង្ស៊ី ដែលកំពុងនិរទេសខ្លួន ដោយសាតែជម្លោះនយោបាយ បានបង្ហោះវីដេអូឃ្លីបលើហ្វេសប៊ុករបស់លោក ដោយអត្ថាធិប្បាយថា ថ្ងៃ០៩វិច្ឆិកានេះ ជាខួប៦៥ឆ្នាំបុណ្យឯករាជ្យជាតិ ដែលលោកថាជាស្នាព្រះហស្ថ របស់សម្តេច ព្រះនរោត្តម សីហនុ និងខ្មែរអ្នកស្នេហាជាតិមួយចំនួនទៀត ដែលបានតស៊ូជាមួយព្រះអង្គ ដណ្តើមបានពីអាណានិគមនិយមបារាំង។
លោក សម រង្ស៊ី បន្ថែមថានៅពេលដែលទទួលបានឯករាជ្យពីប្រទេសបារាំងហើយក្តី ក៏ក្រុមវៀតណាមកុម្មុយនីស្ត នៅតែបន្តមានវត្តមាននៅកម្ពុជាដដែល។
លោកថា៖ «ពេលដែលព្រះរាជាណាចក្រកម្ពុជាទទួលបានឯករាជ្យពេញលេញពីអាណានិគមនិយមបារាំង នៅថ្ងៃ៩ វិច្ឆិកា ឆ្នាំ១៩៥៣ ដែលជាស្នាព្រះហស្ថរបស់សម្តេចព្រះនរោត្តម សីហនុ រួចហើយយ៉ាងណាក៏ដោយ ក៏ពួកយួនកម្មុយនីស្ត ក្រោមស្លាកគណបក្សប្រជាជនកម្ពុជា នៅតែមិនព្រមចាកចេញពីប្រទេសកម្ពុជា»។
ចំណែកមេដឹកនាំបក្សប្រឆាំងម្នាក់ទៀត ដែលកំពុងជាប់ឃុំខ្លួននៅក្នុងផ្ទះ លោក កឹម សុខា ក៏បានផ្ញើសារអបអរសាទរខួបនៃទិវាបុណ្យឯករាជ្យជាតិផងដែរ។ ក្នុងលិខិតនោះ លោក កឹម សុខា អំពាវនាវឲ្យមានការបង្រួបបង្រួមជាតិ មេដឹកនាំដែលកំពុងឃាប់ឃុំក្នុងផ្ទះរូបនេះ រំឭកថា កម្ពុជានឹងមិនអាចមានឯករាជ្យជាតិពិតប្រាកដបានឡើយ បើខ្មែរបែកបាក់គ្នា។
នៅក្នុងខួបអនុស្សាវរីយ៍លើកទី៦៥ នៃទិវាបុណ្យឯករាជ្យជាតិ ថ្ងៃទី០៩ ខែវិច្ឆិកានេះ ព្រះករុណា សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានអំពាវនាវឲ្យប្រជាពលរដ្ឋខ្មែរគ្រប់និន្នាការទាំងអស់រស់នៅក្រោមច្បាប់រដ្ឋធម្មនុញ្ញ៕
