ក្រុមមេធាវីការពារក្ដីឲ្យមេដឹកនាំអតីតគណបក្សសង្គ្រោះជាតិ លោក កឹម សុខា បានប្រតិកម្មទៅនឹងការភ្នាល់គ្នារវាងលោកនាយករដ្ឋមន្ត្រី ហ៊ុន សែន និងអតីតមេដឹកនាំបក្សប្រឆាំង លោក សម រង្ស៊ី ជុំវិញការដោះលែង ឬមិនដោះលែងលោក កឹម សុខា នាពេលខាងមុខនេះ។
ក្នុងសេចក្ដីថ្លែងការណ៍កាលពីថ្ងៃម្សិលមិញ ក្រុមមេធាវីការពារក្ដីឲ្យលោក កឹម សុខា បានហៅល្បែងភ្នាល់នយោបាយនេះថា ធ្វើឲ្យជាតិកាន់តែបែកបាក់។
ក្រុមមេធាវីទាំងនោះ បានលើកឡើងក្នុងសេចក្ដីថ្លែងការណ៍នោះបន្តទៀតថា ការដោះលែង ឬចោទប្រកាន់ទៅលើលោក កឹម សុខា គឺជាសមត្ថកិច្ចរបស់តុលាការ ហើយល្បែងភ្នាល់នយោបាយនេះ អាចនឹងធ្វើឲ្យប៉ះពាល់ដល់នីតិវិធីស៊ើបសួររបស់តុលាការ។
ក្រុមមេធាវីការពារបន្ដថា អ្នកនយោបាយគួរប្រកាន់ខ្ជាប់នូវគុណធម៌ និងសីលធម៌ និងអំពាវនាវដល់ប្រជាពលរដ្ឋ កុំវាយតម្លៃចំពោះការភ្នាល់នេះ។
លោកនាយករដ្ឋមន្ត្រី ហ៊ុន សែន កាលពីថ្ងៃម្សិលមិញនេះ បានសម្រេចភ្នាល់ជាមួយអតីតមេដឹកនាំបក្សប្រឆាំង លោក សម រង្ស៊ី ដោយថា ប្រសិនបើលោក កឹម សុខា ដែលកំពុងជាប់ឃុំនៅក្នុងផ្ទះ ត្រូវបានដោះលែងនៅចុងខែធ្នូខាងមុខនេះ នោះលោក ហ៊ុន សែន នឹងចុះចេញពីតំណែង។
លោកនាយករដ្ឋមន្ត្រី ហ៊ុន សែន បានសម្រេចភ្នាល់បែបនេះ បន្ទាប់ពីលោក សម រង្ស៊ី ដែលកំពុងរស់នៅនិរទេសខ្លួននៅឯបរទេសនោះ បានប្រកាសនៅលើទំព័រហ្វេសប៊ុកផ្លូវការរបស់លោកថា លោកនឹងដើរចូលឲ្យគេចាប់ខ្លួនយកទៅឃុំជាមួយនឹងលោក កឹម សុខា ប្រសិនបើគ្មានការដោះលែងលោក កឹម សុខា៕
