អង្គការអន្ដរជាតិមួយ បានជំរុញទៅអ្នករាយការណ៍ពិសេសអង្គការសហប្រជាជាតិ លោកស្រី រ៉ូណា ស្មីត ឲ្យដាក់បញ្ចូលបញ្ហាជម្លោះដីធ្លីលើកសិករ និងជនជាតិដើមភាគតិច ទៅក្នុងរបាយការណ៍សិទ្ធិមនុស្សថ្មីស្ដីពីស្ថានភាពសិទ្ធិមនុស្សនៅក្នុងប្រទេសកម្ពុជា។
ក្នុងសេចក្ដីថ្លែងការណ៍នៅថ្ងៃនេះ សម្ព័ន្ធប្រជាជនដើម្បីអធិបតេយ្យភាពស្បៀងពិភពលោក (People’s Coalition on Food Sovereignty) បានជំរុញទៅលោកស្រី រ៉ូណា ស្មីត ឲ្យដាក់បញ្ចូលបញ្ហាជម្លោះដីធ្លីនៅកម្ពុជាទៅក្នុងរបាយការណ៍របស់លោកស្រី ដែលគ្រោងលើកឡើងក្នុងកិច្ចប្រជុំត្រួតពិនិត្យជាសកលនៅឯក្រុមប្រឹក្សាសិទ្ធិមនុស្សអង្គការសហប្រជាជាតិនាខែមករា ឆ្នាំ២០១៩ខាងមុខ។
ក្នុងសេចក្ដីថ្លែងការណ៍ដដែលនោះ អង្គការ PCFS ក៏បានថ្កោលទោសអាជ្ញាធរកម្ពុជា ដែលបានរារាំងក្រុមអ្នកមានជម្លោះដីធ្លី និងក្រុមជនជាតិដើមភាគតិតមកពីខេត្តព្រះវិហារ កំពង់ធំ ស្វាយរៀង ខេត្តព្រះសីហនុ និងខេត្តកណ្ដាលជាដើម ដែលបានឡើងមកតវ៉ាដើម្បីសុំដំណោះស្រាយនៅរាជធានីភ្នំពេញ កាលពីថ្ងៃទី៦ ខែវិច្ឆកាកន្លងទៅ។
ក្រៅពីនេះ អង្គការអន្ដរជាតិមួយនេះក៏ជំរុញឲ្យលោកស្រី រ៉ូណា ស្មីត ឲ្យពិនិត្យមើលផងដែរអំពីការចោទប្រកាន់លើមេដឹកនាំសហគមន៍ ៤រូបនៅខេត្តព្រះវិហារ និងបុគ្គលិក ២រូបរបស់អង្គការពន្លកខ្មែរ ដែលត្រូវបានតុលាការខេត្តនេះកោះហៅកាលពីថ្ងៃទី៥ ខែវិច្ឆិកា ពាក់ព័ន្ធនឹងសំណុំរឿងកាលពី ៤ឆ្នាំមុនជាមួយនឹងក្រុមហ៊ុនចិនឈ្មោះ Guangdong Hengfu Group Sugar Industry។
លោកស្រី រ៉ូណា ស្មីត ទើបតែបានបញ្ចប់បេសកម្មរយៈពេល ១១ថ្ងៃនៅកម្ពុជា ដែលចាប់ផ្ដើមពីថ្ងៃទី២៩ តុលា ដល់ថ្ងៃទី៨ ខែវិច្ឆិកាកន្លងទៅនេះ។
ដំណើរទសន្សកិច្ចមកកម្ពុជាជាលើកទី៦ របស់លោកស្រី រ៉ូណា ស្មីត គឺដើម្បីធ្វើរបាយការណ៍សិទ្ធិមនុស្សនៅកម្ពុជា និងផ្ដោតសំខាន់លើគោលដៅអភិវឌ្ឍប្រកបដោយចីរភាព (SDGs)។
លោកស្រីក៏គ្រោងលើកយកបញ្ហាដែលលោកស្រីរកឃើញដាក់ជូនទៅក្រុមប្រឹក្សាសិទ្ធិមនុស្សអង្គការសហប្រជាជាតិនាដើមឆ្នាំក្រោយនេះ៕