រដ្ឋាភិបាលដឹកនាំដោយគណបក្សប្រជាជនកម្ពុជា បានបន្ដតែងតាំងរដ្ឋលេខាធិការ និងអនុរដ្ឋលេខាធិការបន្ថែមទៀតនៅក្នុងក្រសួងមួយចំនួន ខណៈអ្នកតាមដាន បានបង្ហាញក្ដីបារម្ភថា ការតែងតាំងមន្ត្រីដ៏ច្រើនបែបនេះ កាន់តែជំរុញឲ្យមានអំពើពុករលួយនៅក្នុងស្ថាប័នរដ្ឋ ហើយបង្កើនការចំណាយថវិកាជាតិ។
ក្នុងព្រះរាជក្រឹត្យចុះថ្ងៃទី១០ ខែវិច្ឆិកា លោកនាយករដ្ឋមន្ដ្រី ហ៊ុន សែន បានស្នើតែងតាំងរដ្ឋលេខាធិការ ៤រូប និងអនុរដ្ឋលេខាធិការ ៥រូបបន្ថែមទៀត នៅក្នុងក្រសួងមហាផ្ទៃ ខណៈដែលក្រសួងមួយនេះមានរដ្ឋលេខាធិការចំនួន ១៨រូប និងអនុរដ្ឋលេខាធិការចំនួន ៣២រូបរួចទៅហើយនោះ។
ក្នុងព្រះរាជក្រឹត្យដាច់ដោយឡែកមួយទៀតចុះកាលពីថ្ងៃទី១០ ខែវិច្ឆិកាដែរនោះ រដ្ឋាភិបាលក៏បានស្នើតែងតាំងរដ្ឋលេខាធិការចំនួន ៧រូប និងអនុរដ្ឋលេខាធិការ ១០រូបថែមទៀតនៅក្នុងក្រសួងព័ត៌មានផងដែរ ខណៈក្រសួងនេះមានរដ្ឋលេខាធិការ ៨នាក់ និងអនុរដ្ឋលេខាធិការ ២៥នាក់រួចមកហើយនោះ។
បើទោះបីជាធ្លាប់បានប្រកាសអំពីការធ្វើកំណែទម្រង់ក្បាលម៉ាស៊ីនគណៈរដ្ឋមន្ដ្រីថ្មីក៏ដោយ ប៉ុន្ដែ រដ្ឋាភិបាលអាណត្តិទី៦នេះនៅតែរក្សាទុកសមាសភាពរដ្ឋមន្ដ្រីដដែល ហើយបានពង្រីកចំនួនរដ្ឋលេខាធិការ និងអនុរដ្ឋលេខាធិការកាន់តែធំជាងមុន។
ចាប់តាំងពីបង្កើតរដ្ឋាភិបាលថ្មីក្រោយការបោះឆ្នោតកាលពីខែកក្កដាកន្លងមក លោក ហ៊ុន សែន បានស្នើតែងតាំងអនុរដ្ឋលេខាធិការដល់ទៅ ៣៩១នាក់ និងរដ្ឋលេខាធិការចំនួន២៤១នាក់រួចមកហើយនៅតាមក្រសួង និងស្ថាប័នរដ្ឋនានា។
អតីតតំណាងរាស្ដ្រគណបក្សសង្គ្រោះជាតិ លោក អ៊ូ ច័ន្ទរ័ត្ន រិះគន់ថា ការតែងតាំងមន្ដ្រីក្នុងជួររដ្ឋាភិបាលច្រើនពេកបែបនេះ គឺនាំឲ្យខាតបង់ថវិកាជាតិ ខណៈប្រសិទ្ធិភាពការងារក៏មិនសូវមាន។ លោកថា ការតែងតាំងមន្ដ្រីកន្លងមក គឺធ្វើឡើងតាមខ្សែបក្ស និងមិនដែលយកអ្នកមានជំនាញ និងសមត្ថភាពពិតប្រាកដនោះទេ។
លោកបន្ដថា៖ «មានន័យថា អ្នកតាមបក្ស អ្នកហ្នឹងទទួលបានការងារ ចៅហ្វាយត្រូវតែទៅរកការងារឲ្យ ត្រូវការតែងតាំងដើម្បីជាគុណបំណាច់សម្រាប់បុគ្គលមួយចំនួន ដែលនៅក្បែរអ្នកដឹកនាំហ្នឹង។ អាហ្នឹង ត្រូវបានទទួលការងារហ្នឹងហើយ។ ទី២ ពាក់ព័ន្ធនឹងសាច់ញាតិខ្សែស្រឡាយហ្នឹង កាលណាបក្សកាន់រដ្ឋាភិបាលហើយ គេតែងតាំងអញ្ចឹងទៅ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មើលឃើញថា ការតែងតាំងមន្ដ្រីជាបន្ដបន្ទាប់ មានចំនួនច្រើនពេក និងមិនសូវចាំបាច់សម្រាប់តម្រូវការជាក់ស្ដែងនោះទេ។ លោកក៏បង្ហាញក្ដីបារម្ភផងដែរថា វាកាន់តែធ្វើឲ្យស្ថាប័នរដ្ឋមានអំពើពុករលួយ ខណៈរដ្ឋាភិបាលថ្មីមានបក្សតែមួយដឹកនាំ។
លោកបន្ដថា៖ «យើងឃើញហើយថា ការតែងតាំងថ្នាក់រដ្ឋលេខាធិការក៏មានលក្ខណៈខ្សែស្រឡាយនិយមនៅក្នុងក្រសួងនីមួយៗ ដូចជាក្រសួងរ៉ែ និងថាមពលអីហ្នឹងជាដើម ឪពុកជារដ្ឋមន្ដ្រី ហើយកូនជារដ្ឋលេខាធិការ។ ខ្ញុំគិតថា ជាទិដ្ឋភាពមួយដែលមានការប្រែប្រួលខ្លាំង នៅពេលដែលការដឹកនាំក្បាលម៉ាស៊ីនរដ្ឋសភា គឺជាសភាឯកបក្ស»។
កាលពីថ្ងៃទី២២ ខែកញ្ញាកន្លងទៅ លោក ហ៊ុន សែន ក៏បានស្នើតែងតាំងមន្ត្រី ២០៧នាក់ទៀត ឲ្យធ្វើជាទីប្រឹក្សារដ្ឋាភិបាល ដែលមានឋានៈស្មើនឹងរដ្ឋលេខាធិការ រហូតដល់ឋានៈស្មើឧបនាយករដ្ឋមន្ត្រី។
ក្រៅពីនេះ កាលពីពាក់កណ្ដាលខែកញ្ញាផងដែរនោះ លោក ហ៊ុន សែន ក៏បានតែងតាំងមន្ត្រីជិត ៣០០នាក់ផ្សេងទៀតឲ្យធ្វើជាទីប្រឹក្សាផ្ទាល់ ជំនួយការ លេខា និងសមាជិកក្នុងក្រុមពិធីការក្នុងខុទ្ទកាល័យរបស់លោកផងដែរ។
ទោះជាយ៉ាងណា មន្ត្រីកាន់តំណែងអនុរដ្ឋលេខាធិការ និងរដ្ឋលេខាធិការ មិនត្រូវបានចាត់ចូលក្នុងសមាជិករដ្ឋាភិបាលនោះឡើយសម្រាប់អាណត្តិទី៦នេះ បន្ទាប់ពីរដ្ឋសភាកម្ពុជាដឹកនាំដោយគណបក្សប្រជាជនកម្ពុជា បានសម្រេចកែប្រែច្បាប់ស្ដីពីការរៀបចំ និងការប្រព្រឹត្តទៅនៃគណៈរដ្ឋមន្ត្រី និងមាត្រា ១១៨នៃរដ្ឋធម្មនុញ្ញ ដែលពុំតម្រូវឲ្យមានការស្នើសុំការយល់ព្រមពីរដ្ឋសភា សម្រាប់ការតែងតាំងមន្ត្រីណាម្នាក់ឲ្យកាន់តំណែងរដ្ឋលេខាធិការនោះឡើយ៕