ពលរដ្ឋម្នាក់ដែលអះអាងថា ជាតំណាងឲ្យប្រជាពលរដ្ឋមានជម្លោះដីធ្លីនៅឯស្រុករមាសហែក ខេត្តស្វាយរៀង បានឲ្យដឹងថា អភិបាលរងខេត្ត លោក ហែម ពិសិដ្ឋ បានសន្យាថា នឹងពន្លឿនដំណោះស្រាយវិវាទដីធ្លីរបស់ពួកគេជាមួយក្រុមហ៊ុនឯកជនមួយ។
តំណាងពលរដ្ឋមកពីឃុំអំពិល អ្នកស្រី ខៀវ សារ៉ុន ប្រាប់វីអូឌីនៅថ្ងៃនេះថា អភិបាលរងខេត្តស្វាយរៀងបានហៅរូបគាត់ និងអ្នកភូមិ ៧រូបទៀត ទៅប្រជុំនៅសាលាស្រុករហែកនៅថ្ងៃនេះ ដើម្បីធ្វើការដោះស្រាយបញ្ហាដីធ្លី ប៉ុន្តែ អ្នកស្រីថា មិនទាន់ទទួលបានលទ្ធផលអ្វីនោះទេ។
អ្នកស្រីថា៖ «គាត់និយាយថា ដោយសារ គាត់ទើបជាប់ថ្មី ដល់អញ្ចឹង គាត់អត់ទាន់ដឹងច្បាស់ពីព័ត៌មានលម្អិតទេ។ អញ្ចឹង គាត់សុំពេលដើម្បីគាត់សិក្សាអំពីការងារហ្នឹង ហើយតើត្រូវជជែកម៉េចជាមួយប្រជាពលរដ្ឋ។ ដល់ពេលគាត់សិក្សាដឹងច្បាស់ហើយ គាត់នឹងហៅប្រជាពលរដ្ឋទៅសម្របសម្រួលម្ដងទៀត»។
តំណាងប្រជាពលរដ្ឋម្នាក់ទៀត លោក ឡុង ផល លើកឡើងថា អភិបាលរងខេត្ត លោក ហែម ពិសិដ្ឋ បានសន្យាជាមួយពួកគាត់ថា នឹងធ្វើការដោះស្រាយវិវាទដីធ្លីនេះឲ្យបានឆាប់ដល់ពួកគាត់ ប៉ុន្តែ លោកថា ពួកគាត់នឹងនាំគ្នាឡើងមកតវ៉ានៅភ្នំពេញបន្តទៀត ប្រសិនបើនៅតែគ្មានដំណោះស្រាយនោះ។
លោកថា៖ «ក្នុងហ្នឹង ពួកខ្ញុំថា បើសិនគ្មានដំណោះស្រាយរយៈពេលយ៉ាងយូរកន្លះខែទៀត គឺយើងហ្នឹងទៅតាមដានញត្តិដែលដាក់នៅក្រសួងកសិកម្ម និងក្រសួងរៀបចំដែនដី»។
ការហៅតំណាងប្រជាពលរដ្ឋទៅប្រជុំនៅថ្ងៃនេះ ធ្វើឡើងបន្ទាប់ពីក្រុមប្រជាពលរដ្ឋបានប្រមូលគ្នាឡើងមកដាក់ញាត្តិនៅរាជធានីភ្នំពេញ កាលពីថ្ងៃទី៦ ខែវិច្ឆិកា ដើម្បីស្វែងរកិច្ចអន្តរាគមន៍ពីស្ថាប័នជាតិសំខាន់ៗឲ្យជួយដោះស្រាយបញ្ហាដីធ្លីរបស់ពួកគេ។
អភិបាលរងខេត្តស្វាយរៀង លោក ហែម ពិសិដ្ឋ បានប្រាប់វីអូឌីនៅថ្ងៃនេះថា លោកកំពុងធ្វើការសិក្សាទៅលើករណីជម្លោះដីធ្លីនេះ មុននឹងសម្រេចលើដំណោះស្រាយយ៉ាងណាសម្រាប់ប្រជាពលរដ្ឋទាំងនោះ។
លោកថា៖ «ខ្ញុំកំពុងយកបច្ចេកទេសមកគិតហើយ អញ្ចឹងខ្ញុំនឹងឲ្យដំណឹងពេលក្រោយ ពីព្រោះខ្ញុំបានប្រាប់ទៅគាត់អស់ហើយថា គាត់ត្រូវធ្វើយ៉ាងម៉េចៗ ខ្ញុំមានតែប៉ុណ្ណឹងទេ។ ឆាប់ដែលអាចធ្វើបាន ខ្ញុំនឹងប្រឹង»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន ចាត់ទុកការសន្យារបស់អភិបាលរងខេត្តដែលចុះទៅជួបប្រជាពលរដ្ឋថា ជារឿងល្អ ប៉ុន្តែ ប្រសិនខេត្តមិនធ្វើតាមការសន្យានោះ ប្រជាពលរដ្ឋនឹងនាំគ្នាឡើងមកតវ៉ានៅរាជធានីភ្នំពេញបន្តទៀត។
លោកក៏បានស្នើទៅតុលាការឲ្យទម្លាក់បទចោទប្រកាន់លើអ្នកភូមិ ដែលត្រូវបានម្ចាស់ក្រុមហ៊ុនប្ដឹងទៅសាលាដំបូងខេត្តស្វាយរៀងកន្លងមក ពាក់ព័ន្ធនឹងវិវាទដីធ្លីនេះផងដែរ។
លោកថា៖ «យើងចង់ឲ្យរដ្ឋបាលខេត្តក៏ដូចជាអាជ្ញាធរខេត្ត មេត្តាពន្លឿនអំពីដំណើរការដោះស្រាយតាមរយៈការជជែក និងការស្រាវជ្រាវព័ត៌មានឲ្យបានចប់សព្វគ្រប់ ហើយធ្វើការកាត់ឆ្វៀលដីរបស់ប្រជាពលរដ្ឋដែលរងផលប៉ះពាល់ជាមួយក្រុមហ៊ុនឲ្យបានឆាប់រហ័តផងដែរ ដើម្បីកុំឲ្យប្រជាពលរដ្ឋកាន់តែអូសពេលវេលាកាន់តែយូរ ហើយធ្វើឲ្យគាត់ធ្លាក់ខ្លួនក្រីក្រកាន់តែខ្លាំង ពីព្រោះពួកគាត់ត្រូវការដីធ្លីសម្រាប់ប្រើប្រាស់និងបង្កបង្កើនផលចិញ្ចឹមជីវិតរបស់ពួកគាត់»។
ជម្លោះដីធ្លីរវាងពលរដ្ឋនៅឃុំអំពិល និងក្រុមហ៊ុន អិន ខេវេនឈ័រ បានអូសបន្លាយអស់រយៈពេល ៨ឆ្នាំមកហើយ ហើយអ្នកភូមិ ៦នាក់ បានរងបណ្ដឹងពីសំណាក់ក្រុមហ៊ុននៅឯតុលាការផងដែរ។
សាលាដំបូងខេត្តស្វាយរៀង ក៏បានកោះប្រជាពលរដ្ឋចំនួន ៤នាក់ ឲ្យចូលបំភ្លឺនៅតុលាការក្រោមបទចោទថា បានធ្វើឲ្យខូចខាត និងរំលោភកាន់កាប់ដីឯកជនសាធារណៈរបស់រដ្ឋខុសច្បាប់ ស្ថិតក្នុងភូមិស្រែឬស្សី ឃុំអំពិល។
ពលរដ្ឋ អះអាងថា កាលពីឆ្នាំ២០១០ អ្នកភូមិ ៤៤០គ្រូសារ នៅឃុំអំពិល ចាប់ផ្តើមមានជម្លោះដីធ្លីជាមួយក្រុមហ៊ុន អិន ខេវេនឈ័រ បន្ទាប់ពីក្រុមហ៊ុននោះទទួលបានដីសម្បទានសេដ្ឋកិច្ចទំហំ ៦៧០ហិចតាពីរដ្ឋាភិបាល ដើម្បីអភិវឌ្ឍន៍ដំណាំកសិកម្ម ប៉ុន្តែ ក្រុមហ៊ុននេះបានផ្ទេរដីសម្បទាននោះទៅឲ្យក្រុមហ៊ុន ម៉េង ឆេងលីន គ្រុប៕