ទូកងវែងជាងគេរបស់កម្ពុជា ត្រូវបានចុះក្នុងបញ្ជីកំណត់ត្រាពិភពលោកនៅព្រឹកថ្ងៃនេះ។ នេះបើតាមការចុះផ្សាយរបស់ទីភ្នាក់ងារព័ត៌មានកម្ពុជា AKP។
ទូកងដែលត្រូវបានប្រសិទ្ធនាមថា «កម្ពោជិកបុត្តាខេមរាតរី» ឬដែលមានន័យថា «ទូកងរបស់កូនខ្មែររស់នៅក្នុងដែនដីខ្មែរ» ត្រូវបានសាងសង់ឡើងពីដើមឈើគគី មានប្រវែងដល់ទៅ ៨៧.៣ម៉ែត្រ និងទទទឹង ១.៩៤ម៉ែត្រ។
បើតាម AKP ទូកងដែលផ្ទុកចំណុះទូកបានដល់ទៅ ១៧៩នាក់នោះ ត្រូវបានចុះក្នុងកំណត់ត្រាពិភពលោក ជាទូកងវែងជាងគេនៅលើពិភពលោក នៅក្នុងពិធីមួយនៅឃុំព្រែកខ្សាយ ស្រុកពាមរក៍ ខេត្តព្រៃវែង នៅព្រឹកថ្ងៃនេះ។
តំណាងរាស្ត្រខេត្តព្រៃវែង លោក ស សុខា ដែលជាអនុប្រធានសហភាពសហព័ន្ធយុវជនកម្ពុជាផងដែរនោះ បានថ្លែងក្នុងសន្និសីទសារព័ត៌មានកាលពីថ្ងៃទី៧ វិច្ឆិកា ថា ទូកងវែងជាងគេនេះ ត្រូវបានសង់ឡើងពីដើមគគី ៦ដើម និងចំណាយថវិកាអស់ចន្លោះពី ៥ ទៅ ៦ម៉ឺនដុល្លារ។
ទូកងវែងជាងគេនេះ ត្រូវបានចុះក្នុងសៀវភៅកំណត់ត្រា Guinness Record បន្ទាប់ពីកម្ពុជាបានបំបែកឯគទគ្គកម្មពិភពលោកចំនួន ៣លើករួចមកហើយ មាននំអន្សមយក្ស ការប្រមូលផ្ដុំមហាជនរាំមាឌីហ្សូនដ៏ច្រើន និងការផលិតក្រមាវែងជាងគេលើពិភពលោក៕