នគរបាលអះអាងថា កម្មករជិត ៤០នាក់បម្រើការងារនៅរោងចក្រមួយក្នុងខណ្ឌដង្កោ រាជធានីភ្នំពេញ បានដួលសន្លប់ជាបន្តបន្ទាប់អំឡុងពេលពួកគេកំពុងបំពេញការងារ។
អធិការនគរបាលខណ្ឌដង្កោ លោក ជឹម ស៊ីថា ប្រាប់វីអូឌីថា កម្មករ ៣៨នាក់ ក្នុងនោះមានបុរស ២នាក់ បម្រើការងារនៅរោងចក្រហ្គ្រីន មីដូវ ស្ថិតក្នុងសង្កាត់ពងទឹក បានដួលសន្លប់ជាបន្តបន្ទាប់ ប៉ុន្តែ លោកមិនអាចបញ្ជាក់ពីមូលហេតុច្បាស់លាស់នៅឡើយរហូតពេលនេះ។
លោកបន្តថា ក្រុមកម្មករដែលដួលសន្លប់ទាំងនោះ ត្រូវបានបញ្ជូនទៅសង្គ្រោះបន្ទាន់នៅតាមមន្ទីរពេទ្យនានានៅក្បែរៗនោះ។
លោកបន្ថែមថា៖ «តាមយើងសិក្សាលម្អិតទៅ មកពីអ្នកបកប្រែគាត់និយាយសំឡេងលឺៗពេក ដល់គាត់និយាយលឺៗទៅ ធ្វើឲ្យកម្មករកំពុងដេរភ្ញាក់ ដល់ភ្ញាក់ទៅបណ្តាលឲ្យសន្លប់តៗគ្នា។ អ្នកឈរសន្លប់ដែរអញ្ចឹងទៅ។ ទៅសម្រាកតែបន្តិចមកវិញហើយ អត់មានបញ្ហាអីទេ ពួកគាត់គ្រាន់តែមានអាការៈតឹងទ្រូង ទន់ដៃទន់ជើងតិចតួចទេ»។
ប្រធានសហភាពការងារកម្ពុជា លោក អាត់ ធន់ លើកឡើងថា តាមការស្រាវជ្រាវ កម្មករដួលសន្លប់ដោយសារបរិយាកាសទាំងក្នុង និងក្រៅរោងចក្រមិនល្អ ការប្រើប្រាស់ថ្នាំគីមីផ្សេង ធ្វើការហួសកម្លាំង ការហូបចុកមិនគ្រប់គ្រាន់ ការធ្វើការយូរឆ្នាំ និងច្រើនម៉ោងជាដើម។ មេដឹកនាំសហជីពរូបនេះ បានផ្តល់អនុសាសន៍ទៅក្រសួងការងារ និងភាគីរោងចក្រ ឲ្យធ្វើការកែលម្អលក្ខខណ្ឌទាំងនេះផងដែរ។
លោកបន្ថែមថា៖ «ដោយសារគាត់ធ្វើការក្នុងបរិយាកាសអាក្រក់ ដូចជា នៅក្នុងរោងចក្រនោះមានជាតិគីមី ធូលី កម្ដៅ ពន្លឺ និងអុកហ្សីុសែននៅកន្លែងខ្លះមិនគ្រប់គ្រាន់ ហើយអគារខ្លះបិទជិត មិនឲ្យខ្យល់អុកហ្សីុសែនចូលគ្រប់គ្រាន់ ធ្វើឲ្យកម្មករខ្សោយ ដល់អញ្ចឹង ពេលទៅជួបព្រឹត្តិការណ៍ ឬក្លិនអីថ្មីៗ ធ្វើឲ្យកម្មករសន្លប់តែម្តង។ ឧទាហណ៍ថា រោងចក្រខ្លះ ពេលល្ងាច គាត់បាញ់ថ្នាំមូស ឬថ្នាំសត្វល្អិត ព្រលឹមឡើងកម្មករចូលធ្វើការ គាត់បើក ពេលបើកក្លិនហ្នឹងចេញពីមកផ្លិតទឹកវាជះមកពេញឃ្លាំងធ្វើឲ្យកម្មករសន្លប់»។
របាយការណ៍បេឡាជាតិរបបសន្តិសុខសង្គមឆ្នាំ២០១៧ បង្ហាញថា កម្មការិនី ១១៦០នាក់បានដួលសន្លប់កាលពីឆ្នាំមុន បានថយចុះបើធៀបនឹងតួលេខឆ្នាំ២០១៦ ដែលមានកម្មការិនីដល់ទៅ ១៦០៣នាក់បានដួលសន្លប់៕
