តុលាការក្រុងភ្នំពេញ សម្រេចបញ្ជូនជនត្រូវចោទជាង១០នាក់ និងសំណុំរឿងពាក់ព័ន្ធនឹងការលក់ដូរមនុស្សសម្រាប់ឆ្លងដែន និងស្ត្រីពពោះជំនួស ទៅចៅក្រមស៊ើបសួរដើម្បីចាត់ការតាមនីតិវិធី ។
អ្នកនាំពាក្យសាលាដំបូងរាជធានីភ្នំពេញលោក លី សុផាណា បានឆ្លើយប្រាប់អ្នកសារព័ត៌មានតាមបណ្ដាញតេឡេក្រាមនៅថ្ងៃនេះថា តំណាងអយ្យការអមសាលាដំបូងរាជធានីភ្នំពេញបានសម្រេចបើកការស៊ើបសួរដោយចោទប្រកាន់ទៅលើជនសង្ស័យចំនួន ១៤ នាក់ ពីបទ លក់ដូរមនុស្សសម្រាប់ឆ្លងដែន និងបទធ្វើអន្តរការីរវាងអ្នកសុំកូននិងស្រ្តីពពោះ តាមមាត្រា ១៦ នៃច្បាប់ស្តីពីការទប់ស្កាត់អំពើជួញដូរមនុស្ស និងមាត្រា ៣៣២ នៃក្រមព្រហ្មទណ្ឌ។
លោក សុផាណា បញ្ជាក់ថា តុលាការនឹងបញ្ជូនជនត្រូវចោទជាង១០នាក់ និងសំណុំរឿងទៅចៅក្រមស៊ើបសួរដើម្បីចាត់ការបន្តតាមនីតិវិធី។
អ្នកនាំពាក្យតុលាការរូបនោះអះអាងថា ដោយឡែក ជនសង្ស័យចំនួន ៤ នាក់ ផ្សេងទៀត ក៏ជាប់ពាក់ព័ន្ធនឹងបទល្មើស សមគំនិតក្នុងអំពើលក់ដូរមនុស្សសម្រាប់ឆ្លងដែន និងធ្វើអន្តរការីរវាងអ្នកសុំកូននិងស្រ្តីពពោះផងដែរ។ នេះបើយោង តាមមាត្រា ១៦ នៃច្បាប់ស្តីពីការទប់ស្កាត់អំពើជួញដូរមនុស្ស មាត្រា ២៩ និងមាត្រា ៣៣២ នៃក្រមព្រហ្មទណ្ឌផងដែរ។
តុលាការក្រុងភ្នំពេញ កាលពីថ្ងៃទី៥ ខែកក្កដា ឆ្នាំ២០១៨ បានសម្រេចចោទប្រកាន់ស្រ្តីស៊ីឈ្នួលពពោះជំនួស៣២នាក់ ដោយចោទពីបទ «ការជួញដូរមនុស្សដោយឆ្លងដែន» ដែលស្ថិតក្នុងមាត្រា ១៦ នៃច្បាប់ស្តីពីការបង្រ្កាបការជួញដូរមនុស្សនិងអំពើធ្វើអាជីវកម្ម៕