ដ្ឋាភិបាលកម្ពុជាបានព្រមានចាត់វិធានការច្បាប់លើម្ចាស់យានយន្តគ្រប់ប្រភេទ ដែលខកខានមិនបង់ពន្ធផ្លូវតាមការកំណត់របស់អគ្គនាយកដ្ឋានពន្ធដារក្នុងឆ្នាំ២០១៨នេះ។
ក្នុងសេចក្តីជូនដំណឹងចុះថ្ងៃទី១៣ ខែវិច្ឆិកា ឆ្នាំ២០១៨ អគ្គនាយកដ្ឋានពន្ធដារ បានឲ្យដឹងថា ការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ នឹងត្រូវបិទបញ្ចប់នៅត្រឹមថ្ងៃ៣០ ខែវិច្ឆិកាខាងមុខនេះ។
ខណៈដែលពេលវេលាផុតកំណត់កាន់តែខិតជិតមកដល់នោះ អគ្គនាយកដ្ឋានពន្ធដារ បានព្រមានថា បើម្ចាស់យានយន្តទាំងអស់មិនទៅបង់ពន្ធតាមកាលកំណត់ទេ នឹងត្រូវទទួលរងទោសទណ្ឌតាមច្បាប់ស្តីពីពន្ធដារ។
សេចក្តីជូនដំណឹងដដែលបញ្ជាក់ថា បន្ទាប់ពីបិទបញ្ចប់ការប្រមូលពន្ធ អគ្គនាយកដ្ឋានពន្ធដារ នឹងសហការជាមួយអាជ្ញាធរមានសមត្ថកិច្ច ជាពិសេសនគរបាលចរាចរណ៍ ដើម្បីចុះត្រួតពិនិត្យការអនុវត្តប្រមូលពន្ធនេះតាមដងផ្លូវនានាផងដែរ។
អគ្គនាយកដ្ឋានពន្ធដារ បានឲ្យដឹងបន្ថែមថា ម្ចាស់យានយន្តទាំងអស់អាចទៅបង់ពន្ធបាននៅតាមសាខាពន្ធដារខេត្ត ខណ្ឌ ឬតាមសាខានៃធនាគារដែលបានចុះកិច្ចព្រមព្រៀងជជាមួយរដ្ឋាភិបាលនៅទូទាំងប្រទេស។
ទោះជាយ៉ាងណាក្នុងសេចក្តីជូនដំណឹងនោះ អគ្គនាយកដ្ឋានពន្ធដារ មិនបានបញ្ជាក់ពីចំនួនយានយន្តដែលបង់ពន្ធផ្លូវរួច និងមិនទាន់ទៅបង់មានចំនួនប៉ុន្មាននៅឡើយ។
អគ្គនាយក នៃអគ្គនាយកដ្ឋានពន្ធដារ លោក គង់ វិបុល បានថ្លែងកាលពីឆ្នាំមុនថា មានយានយន្តប្រមាណ ៥២ម៉ឺនគ្រឿង បានជាប់កាតព្វកិច្ចបង់ពន្ធលើមធ្យោបាយដឹកជញ្ជូនក្នុងឆ្នាំ២០១៧ ប៉ុន្តែ លោកថា ម្ចាស់យានយន្តដែលបានបង់ពន្ធរួចរាល់ក្នុងឆ្នាំ២០១៧នោះ មានចំនួន៤៨២,០៣៨គ្រឿង ខណៈម្ចាស់យានយន្តចំនួនប្រមាណ ៤ម៉ឺនទៀត មិនបានបង់ពន្ធមធ្យោបាយដឹកជញ្ជូននោះទេ៕
