រដ្ឋាភិបាលកម្ពុជា បានអំពាវនាវទៅអាជ្ញាធរ និងក្រុមហ៊ុនដឹកជញ្ជូនឯកជន ឲ្យយកចិត្តទុកដាក់ខ្ពស់លើបញ្ហាសន្តិសុខ និងសុវត្ថិភាពភ្ញៀវទេសចរណ៍ជាតិ និងអន្តរជាតិ ដែលមកធ្វើដំណើរកម្សាន្តក្នុងពិធីបុណ្យអុំទូកនាពេលខាងមុខនេះ។
ក្នុងសេចរក្តីជូនដំណឹងរបស់ក្រសួងទេសចរណ៍ ចុះថ្ងៃទី១២ ខែវិច្ឆិកា ឆ្នាំ២០១៨នេះ បានណែនាំទៅដល់មន្ទីរទេសចរណ៍រាជធានី-ខេត្ត និងអ្នកស្ថិតក្នុងឧស្សាហកម្មទេសចរណ៍ទាំងអស់ ឲ្យប្រុងប្រយ័ត្នពីសុវត្ថិភាពធ្វើដំណើរតាមយានយន្តគ្រប់ប្រភេទ។
ក្រសួងដដែលនេះ បានជំរុញឲ្យពាក់មួកសុវត្ថិភាព កុំបើកបរក្រោមឥទ្ធិពលនៃគ្រឿងស្រវឹង ចេះថែរក្សាសម្ភារផ្ទាល់ខ្លួន និងកុំធ្វើដំណើរទៅកន្លែងដែលមានហានិភ័យខ្ពស់។
ពលរដ្ឋរាប់សិបម៉ឺននាក់ ត្រូវបានប៉ាន់ប្រមាណថា នឹងធ្វើដំណើរចូលមកលេងកម្សាន្តនៅក្នុងពិធីបុណ្យអុំទូករយៈពេល ៣ថ្ងៃចាប់ពីថ្ងៃទី២១ ដល់ថ្ងៃទី២៣ ខែវិច្ឆិកានេះ។
អាជ្ញាធររាជធានីភ្នំពេញបានឲ្យដឹងកាលពីថ្ងៃម្សិលមិញថា អាជ្ញាធរនឹងដាក់ពង្រាយកម្លាំងសមត្ថកិច្ចជាង ១ម៉ឺននាក់ សម្រាប់ការពារសន្តិសុខ និងរៀបចំសណ្ដាប់ធ្នាប់ជូនប្រជាពលរដ្ឋអំឡុងពិធីបុណ្យជាតិដ៏ធំមួយនេះ៕