លោកនាយករដ្ឋមន្ដ្រី ហ៊ុន សែន លើកឡើងថា ការព្រមានដកប្រព័ន្ធអនុគ្រោះពន្ធណាមួយនោះ គឺបណ្ដាលមកពីកត្ដាសេដ្ឋកិច្ចរបស់កម្ពុជាបន្ដកើនឡើង។
ក្នុងពិធីជួបសំណេះសំណាលជាមួយកុមារកំព្រា និងកុមារពិការគថ្លង់ នៅខណ្ឌសែនសុខ រាជធានីភ្នំពេញ នៅថ្ងៃនេះ លោកនាយករដ្ឋមន្ដ្រី ហ៊ុន សែន ថ្លែងថា សេដ្ឋកិច្ចរបស់កម្ពុជាបានបន្ដកើនឡើងទៅមុខជាលំដាប់ ដែលថា ជាហេតុធ្វើឲ្យសហគមន៍អន្ដរជាតិព្រមានដកហូតយកប្រព័ន្ធអនុគ្រោះពន្ធពីកម្ពុជាវិញ ដើម្បីយកទៅជួយដល់ប្រទេសក្រីក្រដែលមានសេដ្ឋកិច្ចអន់ថយជាងកម្ពុជា។
មេដឹកនាំគណបក្សកាន់អំណាចរូបនេះបន្ដថា រដ្ឋាភិបាលរបស់លោកបានត្រៀមខ្លួនរួចជាស្រេចក្នុងការទទួលយកការទទួលខុសត្រូវនេះ ប្រសិនបើកម្ពុជានឹងត្រូវបាត់បង់ប្រព័ន្ធអនុគ្រោះពន្ធណាមួយមែននោះ។
លោក ហ៊ុន សែន បន្ដថា៖ «ទាក់ទងនឹងជំនួយបរទេសក៏ដូចគ្នា គឺលក្ខខណ្ឌសេដ្ឋកិច្ចរបស់កម្ពុជាកើនឡើង តម្រូវឲ្យគេដកថយជំនួយនោះដើម្បីយកទៅប្រគល់ទៅឲ្យប្រទេសដទៃ ដែលមិនមានលក្ខខណ្ឌអនុគ្រោះដូចយើង។ […] ភាពអនុគ្រោះទាំងឡាយត្រូវបានផ្ដល់ទៅប្រទេសអភិវឌ្ឍតិចតួចតែប៉ុណ្ណោះ ពេលដែលមានការកើនឡើងនៃសេដ្ឋកិច្ចនៃប្រទេសនោះ គឺគេនឹងដកថយដើម្បីផ្ទេរជំនួយនោះទៅកាន់ទីកន្លែងផ្សេងដែលមានការលំបាកជាងយើង»។
រដ្ឋាភិបាលរបស់លោក ហ៊ុន សែន បានទទួលរងការថ្កោលទោស និងព្រមានទណ្ឌកម្មជាបន្ដបន្ទាប់ ក្រោយពីគណបក្សប្រជាជនកម្ពុជាឈ្នះការបោះឆ្នោតមួយ ដែលគ្មានវត្តមានអតីតគណបក្សសង្គ្រោះជាតិចូលរួម ហើយមេដឹកនាំអតីតបក្សប្រឆាំង គឺលោក កឹម សុខា ក៏នៅតែស្ថិតក្រោមការឃុំខ្លួននៅឡើយ។
ករណីនេះក៏បានជំរុញឲ្យសហគមន៍អន្ដរជាតិ រួមមានសហរដ្ឋអាមេរិក សហភាពអឺរ៉ុប និងអង្គការសហប្រជាជាតិជាដើមថ្កោលទោសរដ្ឋាភិបាលជុំវិញការធ្វើឲ្យធ្លាក់ចុះនៃបញ្ហាសិទ្ធិមនុស្ស និងលទ្ធិប្រជាធិបតេយ្យក្នុងប្រទេសនេះ។
កាលពីខែដើមខែតុលា ឆ្នាំ២០១៨ សហគមន៍អឺរ៉ុបបានជូនដំណឹងដល់រដ្ឋាភិបាលអំពីការចាប់ផ្ដើមដំណើរការដកប្រព័ន្ធអនុគ្រោះ EBA ពីកម្ពុជា និងជំរុញឲ្យរដ្ឋាភិបាលកែលម្អបញ្ហាសិទ្ធិមនុស្សរបស់ខ្លួនដើម្បីបន្ដទទួលបានប្រព័ន្ធអនុគ្រោះពន្ធនេះ៕
