អនុរដ្ឋមន្ដ្រីការបរទេសអាមេរិក លោក John Sullivan បានបន្ដជំរុញជាថ្មីម្ដងទៀតទៅរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ឲ្យបញ្ឈប់នូវរាល់ការរឹតត្បិតលំហប្រជាធិបតេយ្យ និងបញ្ហាមួយចំនួនទៀត ដើម្បីលើកស្ទួយមិត្តភាពប្រទេសទាំងពីរ។
សេចក្ដីប្រកាសព័ត៌មានរបស់ក្រសួងការបរទេសកម្ពុជា ឲ្យដឹងថា ក្នុងជំនួបមួយជាមួយរដ្ឋមន្ដ្រីការបរទេសកម្ពុជា លោក ប្រាក់ សុខុន កាលពីថ្ងៃទី១៥ ខែវិច្ឆិកា នៅក្រៅកិច្ចប្រជុំកំពូលអាស៊ាននៅប្រទេសសិង្ហបុរីនោះ អនុរដ្ឋមន្ដ្រីការបរទេសអាមេរិក លោក John Sullivan បានលើកឡើងនូវក្ដីបារម្ភមួយចំនួនពាក់ព័ន្ធនឹងសិទ្ធិសេរីភាពនយោបាយ អង្គការសង្គមស៊ីវិល និងសារព័ត៌មាននៅក្នុងប្រទេសកម្ពុជា។
បើតាមសេចក្ដីប្រកាសព័ត៌មាន លោក John Sullivan ក៏បានបង្ហាញក្ដីបារម្ភពាក់ព័ន្ធនឹងព័ត៌មានដែលចុះផ្សាយថា នឹងមានមូលដ្ឋានយោធាបរទេសនៅក្នុងប្រទេសនេះ។
លោក ប្រាក់ សុខុន បានគូសបញ្ជាក់ក្នុងសេចក្ដីប្រកាសព័ត៌មានដដែលនេះថា រដ្ឋាភិបាលដឹកនាំដោយគណបក្សប្រជាជនកម្ពុជា មានឆន្ទៈក្នុងការលើកស្ទួយបញ្ហាសិទ្ធិមនុស្សរបស់ខ្លួន។ ការលើកឡើងនេះ ដោយលោកសំអាងលើរបាយការណ៍របស់ គ.ជ.ប. ដែលថា ពលរដ្ឋ ៨៣ភាគរយចេញទៅបោះឆ្នោត កិច្ចខិតខំរបស់រដ្ឋាភិបាលក្នុងការរក្សាសន្ដិភាព និងការបន្ដអនុស្សារណៈស្ដីពីការយោគយល់ ដើម្បីបន្ដអាណត្តិរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកកិច្ចការសិទ្ធិមនុស្សនៅកម្ពុជាចំនួន ២ឆ្នាំបន្ដទៀត។
រដ្ឋមន្ដ្រីក្រសួងការបរទេសកម្ពុជារូបនេះ ក៏បានច្រានចោលព័ត៌មានថា មានការរៀបចំមូលដ្ឋានកងទ័ពជើងទឹកនៅតំបន់ឆ្នេរសមុទ្រកម្ពុជា ដោយលោកចាត់ទុកថា នេះជាពាក្យចចាមរាមដែលកើតចេញពីទំហំវិនិយោគដ៏ធំរបស់ចិននៅក្នុងតំបន់នេះ។
សហគមន៍អន្ដរជាតិនាំមុខដោយសហរដ្ឋអាមេរិក សហភាពអឺរ៉ុប និងអង្គការសហប្រជាជាតិ បានថ្កោលចំពោះចំណាត់ការរបស់រដ្ឋាភិបាលជុំវិញការធ្លាក់ចុះនៃស្ថានភាពសិទ្ធិមនុស្ស និងប្រជាធិបតេយ្យ បន្ទាប់ពីអតីតគណបក្សប្រឆាំងដ៏ធំមួយនៅតែត្រូវបានរំលាយ ហើយមេដឹកនាំអតីតបក្សប្រឆាំង លោក កឹម សុខា ក៏ស្ថិតក្រោមការឃុំខ្លួននៅឡើយ៕
