ក្រសួងធនធានទឹក និងឧតុនិយ ប្រកាសឲ្យប្រជាពលរដ្ឋមានការប្រុងប្រយ័ត្នពីឥទ្ធិពលព្យុះត្រូពិចទី២៧ ដែលបង្កឲ្យមានជំនន់ទឹកភ្លៀងនិងខ្យល់ខ្លាំងក្នុងសប្តាហ៍នេះ។
យោងតាមសេចក្តីជូនដំណឹងរបស់ក្រសួងធនធានទឹក និងឧតុនិយម កូនព្យុះតូរ៉ាហ្ស៊ី (TORAJI) នឹងមានឥទ្ធិពលមកលើកម្ពុជាចាប់ពីថ្ងៃទី១៨ដល់២០ ខែវិច្ឆិកា ឆ្នាំ២០១៨។ កម្ពុជានឹងមានភ្លៀងធ្លាក់ច្រើន ខ្យល់បក់បោកខ្លាំង និងរលកសមុទ្រមានកម្ពស់ខ្ពស់នៅតំបន់មាត់សមុទ្រ។ រីឯខេត្តកំពតនិងកំពង់ស្ពឺអាចមានភ្លៀងធ្លាក់ខ្លាំងនិងអាចបង្កជាជំនន់ទឹកភ្លៀង។
សេចក្តីជូនដំណឹងដដែលបានឲ្យដឹងថាព្យុះតូរ៉ាហ្ស៊ីកំពុងស្ថិតនៅក្បែរឆ្នេរភាគអាស៊ីអាគ្នេយ៍ប្រទេសវៀតណាមហើយព្យុះនេះនឹងធ្វើដំណើរឆ្លងកាត់លើភាគខាងត្បូងប្រទេសកម្ពុជាមុននឹងថយឥទ្ធិពលជាវិសម្ពាធវិញនៅថ្ងៃទី១៩ ខែវិច្ឆិកា ២០១៨។
យោងតាមសារព័ត៌មានវៀតណាម (vnexpress.net) ចេញផ្សាយនៅថ្ងៃនេះ ព្យុះតូរ៉ាហ្ស៊ីបានសម្លាប់ប្រជាជនវៀតណាម១៣ នាក់ និង៤នាក់ទៀតបាត់ខ្លួន។