លោកនាយករដ្ឋមន្ដ្រី ហ៊ុន សែន បានច្រានចោលចំពោះសារព័ត៌មានបរទេស ដែលបានចុះផ្សាយថា ចិនកំពុងប្រើប្រាស់ទឹកដីកម្ពុជាធ្វើជាមូលដ្ឋានយោធារបស់ខ្លួន ដែលអាចឈានទៅបង្កើតជាសង្គ្រាមត្រជាក់រវាងចិន និងសហរដ្ឋអាមេរិក។
ក្នុងកិច្ចប្រជុំគណៈរដ្ឋមន្ត្រីនៅថ្ងៃចន្ទនេះ លោក ហ៊ុន សែន បានថ្លែងថា រដ្ឋធម្មនុញ្ញរបស់កម្ពុជាមិនអនុញ្ញាតឲ្យមានវត្តមានកងទ័ព ឬមូលដ្ឋានយោធាបរទេសណាមួយនៅលើទឹកដីរបស់ខ្លួនឡើយ។ លោកថា រដ្ឋធមម្មនុញ្ញកម្ពុជា ក៏បានហាមឃាត់កងទ័ពកម្ពុជា មិនឲ្យចូលរួមក្នុងប្រតិបត្តិការជាមួយយោធាបរទេសនោះឡើយ វាលែងតែការចូលរួមក្រោមឆ័ត្រអង្គការសហប្រជាជាតិតែប៉ុណ្ណោះ។
លោក ហ៊ុន សែន ថ្លែងដូច្នេះថា៖ «រដ្ឋធម្មនុញ្ញរបស់កម្ពុជា ដែលបានហាមឃាត់ជាមួយវត្តមានរបស់កងទ័ព ឬមូលដ្ឋានយោធាបរទេសនៅលើទឹកដីរបស់ខ្លួន […] ក្រោមនយោបាយរួមរបស់គណបក្សប្រជាជនកម្ពុជា និងនយោបាយដោយឡែកដឹកនាំដោយខ្ញុំ ហ៊ុន សែន ខ្ញុំអត់ត្រូវការឱ្យបរទេសមកវ៉ៃគ្នាលើទឹកដីកម្ពុជាទេ»។
លោកនាយករដ្ឋមន្ត្រី ហ៊ុន សែន បានអះអាងបែបនេះ បន្ទាប់ពីសារព័ត៌មានបរទេស Asia Times បានចុះផ្សាយកាលពីសប្ដាហ៍មុនថា កម្ពុជាបានអនុញ្ញាតឲ្យចិនកសាងមូលដ្ឋានកងទ័ពជើងរបស់គេនៅលើទឹកដីកម្ពុជា។
ព័ត៌មានមួយនេះ ក៏ត្រូវបានក្រសួងការពារជាតិកម្ពុជាបដិសេធម្ដងរួចមកហើយកាលពីចុងសប្ដាហ៍កន្លងមកនេះ ដោយចាត់ទុកព័ត៌មានមួយនេះថា ជា«ព័ត៌មានក្លែងក្លាយ»៕