រដ្ឋាភិបាលតែងតាំងនាយទាហាន២រូបឲ្យធ្វើជាមេទ័ពតាមការស្នើសុំរបស់រដ្ឋមន្រ្តីក្រសួងការពារជាតិលោក ទៀ បាញ់។
ក្នុងអនុក្រឹត្យចុះថ្ងៃទី១៩ ខែវិច្ឆិកា រដ្ឋាភិបាលសម្រេចតែងតាំងនាយទាហាន២រូប នៃកងយោធពលខេមរភូមិន្ទគឺ លោក ពៅ ហេង ពីឧត្តមសេនីយ៍ទោទៅជាមេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ ខណៈលោក សុក រីនណា តែងតាំងពីឧត្តមសេនីយ៍ទោទៅជាមេបញ្ជាការរង និងជានាយសេនាធិការយោធភូមិភាគទី៤។
កាលពីថ្ងៃទី១៧ ខែកញ្ញា មេបញ្ជាការកងទ័ពជើងគោក លោក ហ៊ុន ម៉ាណែត ក៏បានស្នើទៅអគ្គមេបញ្ជាការនៃកងយោធពលខេមរភូមិន្ទ សុំតែតាំងឧត្តមសេនីយ៍ឯក៥នាក់ ជាមេបញ្ជាការរងកងទ័ពជើងគោកបន្ថែមលើមុខងារបច្ចុប្បន្ន រួមមាន លោក កែវ ធី មេបញ្ជាការកងពលធំលេខ២ លោក ស្រី ឌឹក មេបញ្ជាការកងពលធំលេខ៣ លោក ព្រហ្ម ផេង មេបញ្ជាការកងពលតូចអន្តរាគមន៍លេខ១ លោក ម៉ៅ សុផាន់ មេបញ្ជាការកងពលតូចថ្មើរជើងលេខ៧០ និងលោក ចាប ភក្តី មេបញ្ជាការកងពលតូចទ័ពឆ័ត្រយោងពិសេសលេខ៩១១៕
