ប្រធានគណៈកម្មាធិការសិទ្ធិមនុស្សកម្ពុជា បានត្អូញត្អែរថា ពេលនេះពិបាកជាងមុនក្នុងការសុំទិដ្ឋាការ (VISA) ទៅលេងកូនរបស់លោកនៅសហរដ្ឋអាមេរិក។
លោក កែវ រ៉េមី បានសរសេរនៅលើហ្វេសប៊ុករបស់លោកនៅថ្ងៃនេះថា ពីមុនរាល់ការ សុំទិដ្ឋាការទៅអាមេរិកមិនពិបាកទេ តែថាពេលនេះប្លែកគឺពន្យារពេលពិនិត្យរហូតដល់៣សប្តាហ៍។
លោក កែវ រ៉េមី៖ «នឹកកូនពេក រត់ទៅសុំ VISA អាមេរិក។ ពីមុនសុំបានៗ តែពេលនេះប្លែក គេពន្យាពេល3សប្តាហ៍ ថាអោយឬមិនអោយ។ ចូលជិត10ថ្ងៃហើយៗនៅមិនទាន់ទទួលដំណឹង។ នៅសល់តែ 2ថ្ងៃទៀតទោះជាអោយក៏ទៅមិនបានដែរពីព្រោះរវល់ខ្លាំង។ សិទ្ធិមនុស្សនៅឯណា?។»
ចាប់ពីថ្ងៃទី១៣ ខែកញ្ញា ឆ្នាំ២០១៧ ស្ថានទូតសហរដ្ឋអាមេរិកប្រចាំកម្ពុជាបានផ្អាកលែងចេញទិដ្ឋាការប្រភេទ B1 ប្រភេទ B2 និងប្រភេទ B1/B2 ដល់មន្ត្រីនៃក្រសួងការបរទេសកម្ពុជាដែលមានតួនាទីចាប់ពីថ្នាក់អគ្គនាយករហូតដល់ថ្នាក់ដឹកនាំកំពូលនៃក្រសួងនេះ និងសមាជិកក្រុមគ្រួសាររបស់ពួកគេ ដោយមានករណីលើកលែងតិចតួចប៉ុណ្ណោះ។
ការផ្អាកចេញទិដ្ឋាការនេះក្រោយពេលកម្ពុជាស្នើឲ្យអាមេរិពិចារណា ជុំវិញការបញ្ជូនពលរដ្ឋខ្មែរដែលប្រព្រឹត្តកំហុសពីអាមេរិកមកកម្ពុជាវិញ។
ចំណែកមន្ត្រីជាន់ខ្ពស់កម្ពុជា១៧រូបផ្សេងទៀត ក៏ត្រូវបានអាមេរិកដាក់ក្នុងបញ្ជីខ្មៅរឹតត្បិត ទិដ្ឋាការដែរដោយចោទថា ជាអ្នករំលោភសិទ្ធិមនុស្ស និងបំផ្លាញប្រជាធិបតេយ្យ។ ប៉ុន្តែក្នុង ចំណោម១៧រូបនោះ មិនមានឈ្មោះលោក កែវ រ៉េមី ទេ។
លោក កែវ រ៉េមី ជាអតីតមន្ត្រីជាន់ខ្ពស់គណបក្ស សម រង្ស៊ី ហើយបានចេញពីគណបក្ស សម រង្ស៊ី ទៅចូលរួមជាមួយគណបក្សសិទ្ធិមនុស្សរបស់លោក កឹម សុខា នៅឆ្នាំ២០០៧ ហើយបាន ទៅចូលរួមជាមួយគណបក្សប្រជាជនកម្ពុជា។ នៅឆ្នាំ២០១៦ លោកទទួលបានការតែងតាំងជា ប្រធានគណៈកម្មាធិការសិទ្ធិមនុស្សកម្ពុជា។