សន្តិសុខ

អាជ្ញាធរឃាត់ខ្លួនមនុស្សជិត២០នាក់ ធ្វើការអប់រំនៅថ្ងៃទី២នៃពិធីបុណ្យអុំទូក

លោក ស៊ុន សុខេន
| ២៣ វិច្ឆិកា ២០១៨
ម៉ោង ១១:៣៣

កម្លាំងសមត្ថកិច្ចពាក់ព័ន្ធគ្រប់លំដាប់ថ្នាក់ ត្រួតពិនិត្យសណ្ដាប់ធ្នាប់ ក្នុងព្រះរាជពិធីបុណ្យអុំទូក បណ្តែបប្រទីប សំពះព្រះខែ និងអកអំបុក ថ្ងៃទី២ ត្រូវនឹងថ្ងៃទី២២ ខែវិច្ឆិកា ឆ្នាំ២០១៨។ រូបភាព៖ អគ្គស្នងការនគរបាលជាតិ

អាជ្ញាធរ បានឃាត់ខ្លួនមនុស្ស១៨នាក់មានទាំងជនជាតិខ្មែរនិងបរទេស យកទៅអប់រំ ក្រោយពីពួកគេបានធ្វើសកម្មភាពមួយចំនួនដោយគ្មានការអនុញ្ញាត អំឡុងថ្ងៃទី២នៃព្រះរាជពិធីបុណ្យអុំទូក។

របាយការណ៍របស់គណៈកម្មធិការជាតិរៀបចំបុណ្យជាតិ-អន្តរជាតិចេញផ្សាយកាលពីម្សិលមិញ បង្ហាញថាមនុស្ស៥នាក់ ដែលក្នុងនោះមានជនជាតិខ្មែរ៣នាក់និងបរទេស២នាក់ត្រូវបានអាជ្ញាធរឃាត់ខ្លួនយកមកអប់រំ ដោយសារតែពួកគេបានធ្វើសកម្មភាពថតរូបភាពពីចំណុចខ្ពស់(ជាន់ទី២៣)ដោយគ្មានការអនុញ្ញាត។ ប្រភពដដែល ឲ្យដឹងបន្ថែមថា កាលពីម្សិលមិញអាជ្ញាធរក៏បានធ្វើការឃាត់ខ្លួនជនស៊ីវិលពាក់អាវមានអក្សរ Police និងArmy ចំនួន១៣នាក់ ធ្វើការអប់រំ និងដកហូតអាវទាំងនោះពីពួកគេផងដែរ ហើយក្រោយពីការអប់រំរួចរាល់ អាជ្ញាធរបានអនុញ្ញាតឲ្យពួកគេត្រលប់ទៅផ្ទះវិញរៀងៗខ្លួន។

តាមការចុះផ្សាយលើគេហទំព័រអគ្គស្នងការដ្ឋាននគរបាលជាតិ កម្លាំងសមត្ថកិច្ចចម្រុះជាង១៣០០០នាក់ ត្រូវបានដាក់នៅតាមគោលដៅនានាសម្រាប់ការពារសន្តិសុខ និងសណ្តាប់ធ្នាប់ ក្នុងឱកាសព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឆ្នាំនេះ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។