ប្រមុខរដ្ឋាភិបាលអំពាវនាវទៅប្រជាពលរដ្ឋឲ្យថតរូបភាពស្អាតៗពីទិដ្ឋភាព និងសកម្មភាពសប្បាយៗ នៃព្រះរាជពិធីបុណ្យអុំទូក មកផ្សព្វផ្សាយ ដើម្បីទាក់ទាញភ្ញៀវទេសចរបរទេសឲ្យមកទស្សនាកម្ពុជាកាន់តែច្រើន។
លោកនាយករដ្ឋមន្រ្តី ហ៊ុន សែន សសេរលើទំព័រហ្វេសប៊ុករបស់លោកកាលពីម្សិលមិញថា នៅថ្ងៃទី២នៃព្រះរាជពិធីបុណ្យអុំទូក គឺមានមានប្រជាពលរដ្ឋចាស់ក្មេង ប្រុសស្រី រួមទាំងទេសចរជាតិ និងទេសចរបរទេស ជាច្រើនបានមកដល់បរិវេណប្រណាំងទូកនៅមាត់ទន្លេមុខព្រះបរមរាជវាំងប្រកបដោយទឹកមុខញញឹមស្រស់ថ្លា។
លោក ហ៊ុន សែន សរសេរបន្តថា ការដាក់តាំងបង្ហាញស្តង់ពិពណ៌ទំនិញគ្រប់ប្រភេទ និងការប្រគុំតន្ត្រីគឺបានទាក់ទាញទេសចរជាតិ និងអន្តរជាតិយ៉ាងច្រើនមកទស្សនាពិធីបុណ្យអុំទូកផ្ទាល់។ លោកបន្តថា តាមរយៈពិធីបុណ្យអុំទូកនេះ វាគឺជាឱកាសល្អមួយសម្រាប់កម្ពុជាផ្សព្វផ្សាយនូវសិល្បៈ វប្បធម៍ ប្រពៃណីជាតិខ្មែរ ឲ្យពិភពលោកស្គាល់កម្ពុជាកាន់តែច្បាស់។
លោកបានសរសេរបន្តយ៉ាងដូច្នេះថា៖ «សូមពលរដ្ឋ ជាពិសេសយុវជន យុវតី ចូលរួមថតរូបភាពល្អៗស្អាតៗអំពីពិធីបុណ្យ ក៏ដូចជាសកម្មភាពសប្បាយរីករាយដើម្បីផ្សព្វផ្សាយទាក់ទាញទេសចរបរទេសអោយបានមកទស្សនាកម្ពុជាផងដែរ។ កម្ពុជាត្រូវការការចូលរួមពីបងប្អូនប្រជាពលរដ្ឋដែលមិនអាចខ្វះបានឡើយ។»
ប្រធានក្រុមការងារទេសចរណ៍វិស័យឯកជន លោក ហូ វណ្ណី មានប្រសាសន៍ជាទូទៅថា មានកត្តាចំនួន៥ដែល ជំរុញការទាក់ទាញភ្ញៀវទេសចរបរទេសមកកម្ពុជាគឺ ទំនាក់ទំនងការទូតល្អ សុខសុវត្ថិភាព ការជំរុញលើកទឹកចិត្ត ការវិនិយោគ ការអនុវត្តច្បាប់ និងការផ្សព្វផ្សាយ។
លោកបន្ថែមថា៖ «កត្តាទី១ គឺការទំនាក់ទំនងការទូតល្អដែលវានាំឲ្យមានសុខសន្ថិភាពគ្រប់ទីកន្លែងទាំងភ្ញៀវទេសចរក្នុងស្រុក និងបរទេស។ កត្តាមួយទៀត គឺការជំរុញលើកទឹកចិត្តក្នុងការវិនិយោគទាំងក្នុងតំបន់ក្តីទាំងក្នុងពិភពលោកក្តី ។ កត្តាច្បាប់ដែលយើងបានក្លាយទៅជាសមាជិក នៃអង្គការអន្តរជាតិផង និងក្នុងសហគមន៍តំបន់ផង ។ ហើយទី៤ ពាក់ព័ន្ធជាមួយនឹង ដោយសារយើងមានច្បាប់ទំលាប់ យើងមានការលើកទឹកចិត្តទៅ លើអ្នកវិនិយោគ ទាំងក្នុងស្រុក និងក្រៅស្រុកហ្នឹង អញ្ចឹងធ្វើឲ្យជនបទេសមានសិទ្ធិមកវិនិយោគទាំងខ្នាតតូច និងមធ្យម ហើយទី៥ ពាក់ព័ន្ធការផ្សព្វផ្សាយទូលំទូលាយហ្នឹងឯង»។
តួលេខរបស់ក្រសួងទេសចរណ៍ចេញកាលពីដើមខែនេះបានឲ្យដឹងថា ក្នុងរយៈពេល ៩ខែនៃឆ្នាំ២០១៨នេះ ចំនួនភ្ញៀវទេសចរអន្តរជាតិដែលបានមកដល់ប្រទេសកម្ពុជាមានចំនួនជាង ៤លាន ៣សែននាក់ កើនជិត១២ភាគរយបើធៀបនឹងរយៈពេលដូចគ្នាកាលពីឆ្នាំ២០១៧ ក្នុងនោះភ្ញៀវជនជាតិចិនមានដល់ទៅជាង ១លាន ២១ម៉ឺននាក់ ឬស្មើនឹង ២១.៦ភាគរយ នៃចំនួនភ្ញៀវទេសចរបរទេសសរុបដែលបានមកដល់កម្ពុជា៕