ប្រធានគណៈកម្មាធិការសិទ្ធិមនុស្សរបស់រដ្ឋាភិបាល លោក កែវ រ៉េមី បានរំឭកថា សហរដ្ឋអាមេរិកធ្លាប់ផ្តល់សញ្ជាតិអាមេរិកឲ្យ តែលោកមិនទទួល។
លោក កែវ រ៉េមី បានសរសេរនៅលើទំព័រហ្វេសប៊ុក របស់លោកពីម្សិលមិញថា កាលពីឆ្នាំ១៩៩៨ ពោលគឺ២០ឆ្នាំកន្លងទៅ អាមេរិកបានផ្តល់សញ្ជាតិអាមេរិកកាំងឲ្យតែលោកមិនទៅទទួលនោះទេ រហូតដល់ធ្វើឲ្យអ្នករស់នៅទីនោះមួយចំនួនហួសចិត្តនឹងការសម្រេចចិត្តរបស់លោកទៀតផង។
ប្រធានគណៈកម្មាធិការសិទ្ធិមនុស្សរបស់រដ្ឋាភិបាលរូបនេះ បានសរសេរយ៉ាងដូច្នេះថា៖
« នៅឆ្នាំ ១៩៩៨ អាមេរិកបានផ្តល់សញ្ជាតិអាមេរិកាំងអោយខ្ញុំ តែខ្ញុំមិនទៅទទួលនោះទេ។ នេះជាការពិត មានសាក្សីនៅរស់មួយចំនួនដែលគេតែងតែហួសចិត្តជាមួយខ្ញុំ៕»
សាររបស់លោក កែវ រ៉េមី បានធ្វើឡើងក្រោយពីមានការរិះគន់តាមបណ្តាញសង្គម ទាក់ទងនឹងការ ត្អូញត្អែរ របស់លោក ពីការពិបាកសុំទិដ្ឋាការ (VISA) ទៅលេងកូននៅសហរដ្ឋអាមេរិក។ ការលំបាកនេះ លោក កែវ រ៉េមី បានចោទជាសំនួរថា «តើសិទ្ធិមនុស្សនៅឯណា» ?
មន្រ្តីអង្គការសង្គមស៊ីវិលមួយចំនួន បានផ្តល់យោបល់ទៅលោក កែវ រ៉េមី បើអាមេរិកមិនគោរពសិទ្ធិមនុស្ស គួរយកកូនមករស់នៅស្រុកខ្មែរវិញ ឬបញ្ជូនឲ្យទៅរៀននៅប្រទេសចិនក៏បាន។
នាយកប្រតិបត្តិអង្គការតម្លាភាពកម្ពុជា លោក ព្រាប កុល បានសរសេរនៅលើទំព័រហ្វេសរបស់លោកថា៖
«ខ្ញុំគ្រាន់តែជាសាមញជនម្នាក់ គ្មានមុខងារជាឧត្តមមន្ត្រីអី្វទេ ហើយកាន់លិខិតឆ្លងដែនរាស្ត្រដែលរលុបអក្សរនៅក្របខាងលើទៀត។ ប៉ុន្តែពេលខ្ញុំសុំទិដ្ឋាកា (VISA) ទៅអាមេរិកចំនួនត្រឹមតែ 3 ថ្ងៃ អាមេរិកយល់ព្រមឱ្យទិដ្ឋាកាខ្ញុំរហូតដល់ទៅ 3 ខែ […] ហេតុអ្វីអាមេរិក ធ្វើបែបហ្នឹងដាក់ឧត្តមមន្ត្រីខ្មែរ ដែលកាន់ប៉ាស្ព័រវការទូតអញ្ចឹង?មុិចក៏ធ្វើអញ្ចឹងអស់លោកអាគាំង?»។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស លោក មឿន តុលា បានចោទជាសំនួរដែរថា តើគាត់មិនដឹងខ្លួនថា គាត់ក៏អាចស្ថិតក្នុងបញ្ជីដែលអាមេរិកហាម ឬគាត់ធ្វើជាមិនដឹង តែយ៉ាងណារឿងនេះក៏ជាការផ្ញើរសារដល់មន្ត្រីរដ្ឋមួយចំនួនទៀតដែរ។
ចាប់ពីថ្ងៃទី១៣ ខែកញ្ញា ឆ្នាំ២០១៧ ស្ថានទូតសហរដ្ឋអាមេរិកប្រចាំកម្ពុជាបានផ្អាកលែងចេញទិដ្ឋាការប្រភេទ B1 ប្រភេទ B2 និងប្រភេទ B1/B2 ឬទិដ្ឋាការប្រភេទអន្តោប្រវសន៍ ប្រភេទទំនាក់ទំនងផ្នែកពាណិជ្ជកម្ម និងប្រភេទទេសចរណ៍ ដល់មន្ត្រីនៃក្រសួងការបរកម្ពុជា ដែលមានតួនាទីចាប់ពីថ្នាក់អគ្គនាយករហូតដល់ថ្នាក់ដឹកនាំកំពូល និងសមាជិកក្រុមគ្រួសាររបស់ពួកគេ។ ការផ្អាកចេញទិដ្ឋាការនេះក្រោយពេលកម្ពុជាស្នើឲ្យអាមេរិកពិចារណា ជុំវិញការបញ្ជូនពលរដ្ឋខ្មែរដែលប្រព្រឹត្តកំហុសពីអាមេរិកមកកម្ពុជាវិញ។
រដ្ឋសភាអាមេរិកកាលពីចុងខែកក្កដាឆ្នាំ២០១៨កន្លងទៅ បានអនុម័តច្បាប់មួយដោយស្នើដាក់ទណ្ឌកម្មប្រឆាំងប្រមុខរដ្ឋាភិបាលកម្ពុជាលោក ហ៊ុន សែន និងថ្នាក់ដឹកនាំកំពូលរបស់បក្សកាន់អំណាចចំនួន ១៦នាក់ផ្សេងទៀត ដោយហាមមិនឲ្យជាន់ទឹកដីអាមេរិក និងបង្កកទ្រព្យសម្បត្តិរបស់ពួកគេ ដោយចោទថា អ្នកទាំងនោះបានបំផ្លាញលទ្ធិប្រជាធិបតេយ្យ និងរំលោភសិទ្ធិមនុស្សធ្ងន់ធ្ងរ៕
