អ្នកដើរកំសាន្តក្នុងព្រះរាជពិធីបុណ្យអុំទូកមួយចំនួន ត្អូញត្អែរថា ម្ចាស់ភាស៊ីផ្ញើយានជំនិះបានយកថ្លៃសេវាខ្ពស់ ចន្លោះពី៣០០០រៀល ទៅ១០០០០រៀល ក្នុងមួយលើក ខណៈដែលតម្លៃផ្ញើថ្ងៃធម្មតា ពី ៥០០ ទៅ ១០០០រៀល តែប៉ុណ្ណោះ។
អ្នកដើរកំសាន្ត ក្នុងថ្ងៃបុណ្យអុំទូកម្នាក់គឺលោក លោក រិន មករា បានរៀបរាប់ថា នៅអំឡុងពេលបុណ្យអុំទូកនេះ ម្ចាស់ភាស៊ីយកថ្លៃផ្ញើម៉ូតូ១គ្រឿងតម្លៃ៣ពាន់រៀល ទៅ៥០០០រៀល។ ករណីនេះ លោករិះគន់ថា អ្នកផ្ញើឈ្លៀតឱកាស យកថ្លៃផ្ញើច្រើនហួសហេតុ ធ្វើឲ្យប៉ះពាល់អារម្មណ៍អ្នកផ្ញើ។
លោកនិយាយថា៖ «មានអារម្មណ៍ថា ថ្លៃខុសពីថ្ងៃធម្មតា ហើយបើថា ទូទៅសមរម្យ តម្លៃទូទៅសមរម្យ ៥០០រៀល ឬ១០០០រៀល សម្រាប់ម៉ូតូ បើលើសប៉ុណ្នឹង វាដូចចង់បានពេកហើយ ពេលដែលបុណ្យទាន គេយកឱកាសដើម្បីរកលុយ ដូចគៀបសង្កត់»។
អ្នកផ្ញើម៉ូតូ អះអាង ប្រហាក់ប្រហែលគ្នាថា ពួកគាត់ផ្ញើម៉ូតូនៅកន្លែងទូទៅ ជាពិសេសថ្ងៃធម្មតា ចន្លោះពី ៥០០រៀល ទៅ ១០០០រៀល តែប៉ុណ្ណោះ។
លោក ឱន ដារ៉ា ដែលបានផ្ញើម៉ូតូគាត់នៅម្តុំវិទ្យាល័យចតុមុខ លើដងផ្លូវនរោត្តម និយាយថា ការផ្ញើយានជំនិះនៅឆ្នាំនេះ ថ្លៃ៥០០០រៀលក្នុងមួយគ្រឿង។ លោកថា មិនហ៊ានតថ្លៃនោះទេ ដោយសារគ្មានជម្រើសត្រូវផ្ញើ ដើម្បីនាំគ្រួសារ និងបងប្អូនដើរកំសាន្តនៅតាមមាត់ទន្លេ ជាពិសេសនៅមុខព្រះបរមរាជវាំង។
លោកមានប្រសាសន៍ថា៖ «ប៉ះដែរ ប៉ុន្តែយើងមិនដឹងធ្វើម៉េច យើងអត់មានកន្លែងដាក់[…] យើងត្រូវតែផ្ញើ […]ដើរដល់យប់»។
ម្ចាស់ភាស៊ីផ្ញើម៉ូតូមួយកន្លែងនៅម្តុំចតុមុខ លោក ថៃ ហ៊ាង បានរៀបរាប់ថា ដើមចមដែលនាំឲ្យលោក កំណត់យកថ្លៃខ្ពស់បែបនេះ ដោយសារលោកត្រូវការចំណាយកម្លាំងពលកម្មច្រើននាក់ និងត្រូវការពេលវេលាច្រើន ដើម្បីថែរក្សាយានជំនិះដោយមានទំនួលខុសត្រូវខ្ពស់។
លោកមានប្រសាសន៍ថា៖ «សំខាន់សុវត្ថិភាពគាត់ ហើយប្រាក់ចំនេញដែលយើងចែកទៅពួកគាត់[កម្មករយាមយាន្តជំនិះ] ខ្ញុំជឿថា យើងហត់ ក្នុងមួយថ្ងៃឲ្យគាត់២០ដុល្លារ គាត់អត់សប្បាយចិត្តទេ ដោយសារកម្លាំងគាត់បញ្ចេញខ្លាំង ហើយគាត់អត់ងងុយទៀត។ យើងផ្ញើមិនមែនផ្ញើត្រឹមម៉ោង៥យើងឈប់ទេ យើងនៅដល់ម៉ោង១-២យប់ចាំគាត់។ យើងខាតពេលធ្វើអ្វីទេ ចឹងជំរុញឲ្យយើងយកតម្លៃខ្ពស់»។
ចំណែកម្ចាស់ភាស៊ីផ្ញើយានជំនិះមួយទៀតនៅម្តុំបូឌីញ លោក សំរិត វី អះអាងថា លោក បានជួលចំនីផ្លូវពីម្ចាស់ផ្ទះ ចំនួន៣យប់៣ថ្ងៃតម្លៃ២៥០ដុល្លារ ករណីនេះលោកថា ត្រូវតែយកថ្លៃផ្ញើម៉ូតូ១គ្រឿង តម្លៃ៥ពាន់រៀល ទើបធ្វើឲ្យចំនេញ។
លោកមានប្រសាសន៍ថា៖ «ខ្ញុំគិតថា បើចិត្តខ្ញុំវាថ្លៃដែរ ប៉ុន្តែធ្វើម៉េច បើយើងមិនយកចឹង វាមិនកើត យើងជួលគេដែរ […] ចប់អុំទូក២៥០ដុល្លារ អ្នកដើរលេងគេអត់ខ្វល់ពីរឿងលុយទេ សំខាន់ធានារបស់គេ។ បើយើងមិនយកចឹងវាមិនកើត យើងជួលគេដែរ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង មានប្រសាសន៍ថា ដើម្បីកុំឲ្យប៉ះពាល់ដល់អារម្មណ៍ប្រជាពលរដ្ឋដើរកំសាន្តនៅថ្ងៃបុណ្យអុំទូកសាលារាជធានីភ្នំពេញគួរតែដាក់ដេញថ្លៃឲ្យក្រុមហ៊ុនឯកជន ទើបទប់ស្កាត់បញ្ហានោះមានប្រសិទ្ធិភាព។
លោកមានប្រសាសន៍ថា៖ «សាលារាជធានីគួរតែដាក់ដេញថ្លៃទៅ ម៉ូតូកន្លែងណា ដាក់កន្លែងណា កំណត់តម្លៃទៅ ប្រហែលជាប្រសើរជាង បានអាចគ្រប់គ្រងបាន។ បើសិនមិនចឹងទេ គឺមករៀបចំផ្ញើខ្លួនឯង ធ្វើតាមអំពើចិត្ត ហើយធ្វើឲ្យប៉ះពាល់ដល់អ្នកដែលទៅទស្សនាបុណ្យអុំទូក»។
វី.អូ.ឌី មិនអាចទាក់ទងសុំការបំភ្លឺពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេនៅរសៀលថ្ងៃនេះ។
ក្រសួងសេដ្ឋកិច្ចបានកំណត់នៅក្នុងសៀវភៅបន្ទុករបស់រដ្ឋថា តម្លៃផ្ញើម៉ូតូ១គ្រឿង តម្លៃ៥០០រៀល និងរថយន្ត១គ្រឿង តម្លៃ១០០០រៀលប៉ុណ្ណោះ ៕